សិស្សវិទ្យាល័យ ពីរនាក់ មកពីខេត្តផ្សេងគ្នា បានជាប់ឆ្នោតទៅចូលរួមប្រជុំជាមួយអង្គការអាយខេន អំពីការគ្រប់គ្រងប្រព័ន្ធផ្សព្វផ្សាយសង្គម ដែលបង្ហោះរូបភាពពាក់ព័ន្ធការរំលោភសិទ្ធិកុមារ នៅទីក្រុងប៉េកាំង នៃប្រទេសចិន ប្រជាមានិត។
ការប្រជុំនោះ នឹងមានកុមារមកពីប្រទេសនានាក្នុងពិភពលោកចំនួន ១០ក្រុម ដែលក្នុងមួយប្រទេសឲ្យមានកុមារ ២នាក់ បានចូលរួមប្រជុំ។
យុវសិស្សថ្នាក់ទី១១ វិទ្យាល័យស្វាយរៀង ឈ្មោះ គង់ សុវណ្ណដា ថ្លែងថា គាត់ត្រូវបានកុមារជាច្រើនបោះឆ្នោតឲ្យឈ្មោះគាត់ចេញទៅចូលរួមប្រជុំតំណាងឲ្យកុមារទូទាំងប្រទេសកម្ពុជា ដើម្បីពិនិត្យមើលពីប្រព័ន្ធផ្សព្វផ្សាយសង្គម ដែលបង្ហោះរូបភាពធ្វើឲ្យប៉ះពាល់សិទ្ធិកុមារ។ ពួកគាត់នឹងចងក្រងគ្នាជាក្រុមនៅក្នុងតំបន់ ដើម្បីគ្រប់គ្រងប្រព័ន្ធផ្សព្វផ្សាយនោះ៖ «និយាយពីការទទួលព័ត៌មានពីប្រព័ន្ធអ៊ីនធឺណិត ដែលកុមារអាចធ្វើអីខ្លះនៅក្នុងប្រព័ន្ធអ៊ីនធឺណិត អាចយល់ដឹងពីសិទ្ធិកុមារ ឬផ្ទេរចំណេះដឹងផ្សេងៗទៀត»។
យុវតីឈ្មោះ រស់ ស្រីនុត ថ្នាក់ទី១០ វិទ្យាល័យព្រះម្លូ ស្រុកបាកាន ខេត្តពោធិ៍សាត់ ថ្លែងថា យុវជន និងកុមារកម្ពុជា កំពុងតែរត់តាមបច្ចេកវិទ្យាទំនើប ដែលនាំឲ្យពួកគេវក់លេងល្បែងតាមអ៊ីនធឺណិត ឬទាញយករឿងតាមទូរស័ព្ទដៃមកមើល នាំឲ្យភ្លេចការសិក្សា។ រឿងខ្លះក៏ជួយអប់រំកុមារ រឿងខ្លះជំរុញឲ្យកុមារធ្លាក់ខ្លួនប្រព្រឹត្តអំពើមិនគប្បីជាដើម។ ហេតុនេះ ការចូលរួមប្រជុំនៅប្រទេសចិន នោះ យុវតីនឹងស្នើសុំឲ្យកុមារ និងយុវជនក្នុងពិភពលោក នាំគ្នាគិតពីការបង្ហោះរូបភាពអាក្រក់ពង្វក់កុមារ និងយុវជនឲ្យភ្លេចការសិក្សា ឬបោះបង់ចោលការសិក្សា៖ «ទោះបីខ្ញុំគិត តែខ្ញុំមិនដឹងថាដោះស្រាយដោយរបៀបម៉េច។ ព្រោះអីយើងមិនអាចទៅបញ្ជាពួកគាត់ថាឲ្យឈប់មើលអីចឹងបានទេ ព្រោះអីគេមានសិទ្ធិដូចយើងដែរ អីចឹងទៅ ខ្ញុំគិតថា ពីមុនខ្ញុំអត់អាចដោះស្រាយបាន តែពេលនេះខ្ញុំមានការទៅចូលរួមនៅថ្នាក់តំបន់។ អីចឹងខ្ញុំមានសង្ឃឹមច្រើនក្នុងការជួយដល់ការដោះស្រាយក្នុងសហគមន៍នោះ»។
អ្នកស្រី ភោគ សាវឿន មកពីភូមិតាណរ សង្កាត់ស្វាយតឿ ក្រុងស្វាយរៀង ត្រូវជាម្តាយយុវជន គង់ សុវណ្ណដា ថ្លែងថា កូនគាត់អាយុ ១៦ឆ្នាំ រស់នៅជាមួយគាត់ជាគ្រួសារក្រីក្រ។ គាត់គ្មានលទ្ធភាពបង់លុយឲ្យកូនរៀនភាសាបរទេសទេ គឺចេះតែឲ្យកូនចូលរួមជាមួយអង្គការនានា ដើម្បីស្វែងរកចំណេះផ្សេងៗ។ នេះជាលើកទី១ ដែលក្រុមគ្រួសារគាត់មានកិត្តិយសបានកូនប្រុសចេញទៅបរទេស។
លោក ធឿង សុខា មកពីភូមិតាមុំ ឃុំមេទឹក ស្រុកបាកាន ខេត្តពោធិ៍សាត់ ថ្លែងថា រស់ ស្រីនុត អាយុ ១៥ឆ្នាំ ជាកូនភ្លោះទី២ របស់គាត់ ដែលមានសំណាងបានចេញទៅប្រជុំនៅទីក្រុងប៉េកាំង ពីការគ្រប់គ្រងសិទ្ធិកុមារ តាមការត្រួតពិនិត្យប្រព័ន្ធអ៊ីនធឺណិត។
ប្រធានសម្ព័ន្ធអង្គការមិនមែនរដ្ឋាភិបាលដើម្បីសិទ្ធិកុមារ លោក ស៊ុន ពេញ ថ្លែងថា អង្គការនេះបានជួយគាំពារសិទ្ធិកុមារ និងបានបញ្ជូនកុមារឲ្យបានទៅចូលរួមប្រជុំនៅបរទេសក្នុង១ឆ្នាំៗ យ៉ាងហោច ៤ ទៅ ៥នាក់ ដើម្បីឲ្យកុមារបានយល់ដឹងអំពីសិទ្ធិរបស់ពួកគេ និងរកវិធីការពារសិទ្ធិកុមារ។ លោកបន្តថា នៅថ្ងៃខាងមុខ នឹងមានកុមារ ២នាក់ទៀត ទៅចូលរួមប្រជុំនៅក្នុងតំបន់អាស៊ាន ពាក់ព័ន្ធនឹងសិទ្ធិកុមារដែរ។ លោកឲ្យដឹងថា ក្នុងការធ្វើដំណើររបស់កុមារទាំង ២នាក់នេះ ទៅប្រទេសចិន គឺអង្គការផ្លេន (Plan) ជួយឧបត្ថម្ភថវិកា ហើយការស្នាក់នៅប្រទេសចិន ពីថ្ងៃទី៧ ដល់ថ្ងៃទី១១ ខែមេសា នោះ គឺអង្គការអាយខេន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។