សង្គម​ស៊ីវិល​ស្នើ​រដ្ឋាភិបាល​បន្ថែម​ថវិកា​សម្រាប់​ជួយ​ស្ត្រី​នៅ​ថ្នាក់ក្រោម​ជាតិ

ដោយ វ៉ាន វណ្ណដេត
2017-04-21
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
នាយិកា​ប្រតិបត្តិ​អង្គការ​សីលការ អ្នកស្រី ធីតា ឃិះ ថ្លែង​ក្នុង​សិក្ខាសាលា​ពិគ្រោះ​យោបល់​អំពី​ថវិកា ឆ្លើយតបនឹងយេនឌ័រ​នៅថ្នាក់​ក្រោម​ជាតិ នៅ​ថ្ងៃ​ទី​២១ ខែ​មេសា ឆ្នាំ​២០១៧។ RFA
នាយិកា​ប្រតិបត្តិ​អង្គការ​សីលការ អ្នកស្រី ធីតា ឃិះ ថ្លែង​ក្នុង​សិក្ខាសាលា​ពិគ្រោះ​យោបល់​អំពី​ថវិកា ឆ្លើយតបនឹងយេនឌ័រ​នៅថ្នាក់​ក្រោម​ជាតិ នៅ​ថ្ងៃ​ទី​២១ ខែ​មេសា ឆ្នាំ​២០១៧។ RFA
Photo: RFA

ក្រុម​សង្គម​ស៊ីវិល​ដែល​ធ្វើ​ការ​ផ្នែក​លើក​ស្ទួយ​ស្ត្រី​ក្នុង​វិស័យ​នយោបាយ បាន​ជំរុញ​ឲ្យ​រដ្ឋាភិបាល​បន្ថែម​ថវិកា​សម្រាប់​ជួយ​ស្ត្រី​នៅ​ថ្នាក់​ក្រោម​ជាតិ​តាម​មូលដ្ឋាន។ សង្គម​ស៊ីវិល​រក​ឃើញ​ថា ថវិកា​សម្រាប់​ផ្នែក​យេនឌ័រ​នៅ​មូលដ្ឋាន​មាន​តិច ឬ​គ្មាន​តែម្ដង។ តែ​មន្ត្រី​ក្រសួង​ហិរញ្ញវត្ថុ​ថា លុះត្រាតែ​ថ្នាក់ក្រោម​ជាតិ​ដាក់​សំណើ​ទើប​អាច​បន្ថែម​បាន។

ការ​ទាមទារ​ថវិកា​បន្ថែម ឬ​ការ​ទាមទារ​លុយ​បន្ថែម​សម្រាប់​លើក​ស្ទួយ​យេនឌ័រ ឲ្យ​មាន​ប្រសិទ្ធភាព​នៅ​ថ្នាក់ក្រោម​ជាតិ ធ្វើ​ឡើង​ស្រប​ពេល​ដែល​ការ​បោះឆ្នោត​ក្រុមប្រឹក្សា​ឃុំ-​សង្កាត់ កាន់​តែ​ខិត​ជិត​មក​ដល់ ហើយ​ក៏​ស្រប​ពេល​ដែល​គណបក្ស​នយោបាយ​បាន​ចាប់​ផ្ដើម​បង្អួត​គោលនយោបាយ​ដើម្បី​អភិវឌ្ឍន៍​ថ្នាក់​មូលដ្ឋាន​ដែរ។

​ក្រុម​ស្ត្រី​ដែល​ធ្វើការ​ក្នុង​វិស័យ​សង្គម​ស៊ីវិល​នៅ​ព្រឹក​ថ្ងៃ​ទី​២១ ខែ​មេសា បាន​រៀបចំ​សិក្ខាសាលា​ពិគ្រោះ​យោបល់​អំពី​ថវិកា​ឆ្លើយតប​នឹង​យេនឌ័រ​នៅ​ថ្នាក់ក្រោម​ជាតិ។ សិក្ខាសាលា​នេះ ដើម្បី​ស្នើ​ឲ្យ​ក្រសួង​សេដ្ឋកិច្ច បន្ថែម​ថវិកា​ពី ២,៧​ភាគរយ​នៃ​ថវិកា​ជាតិ​ក្នុង​មួយ​ឆ្នាំ​ឡើង​ទៅ យ៉ាង​ហោច​ណាស់ ៥​ភាគរយ ដល់​ថ្នាក់​មូលដ្ឋាន ដើម្បី​ឲ្យ​ពួកគេ​មានលទ្ធភាព​ខ្ពស់​ក្នុង​ការ​ជួយ​លើក​ស្ទួយ និង​ជួយ​សង្គ្រោះ​ស្ត្រី​ដែល​រងគ្រោះ​នៅ​តាម​មូលដ្ឋាន។ សង្គម​ស៊ីវិល​យល់​ថា កញ្ចប់​ថវិកា​យេនឌ័រ ៥​ភាគរយ​នៅ​ថ្នាក់​មូលដ្ឋាន​នឹង​អាច​ជួយ​កាត់​បន្ថយ​ការ​ចំណាកស្រុក​របស់​ពលការិនី​នៅ​មូលដ្ឋាន។

​នាយិកា​ប្រតិបត្តិ​អង្គការ​សីលការ អ្នកស្រី ធីតា ឃិះ ថា ថវិកា​សម្រាប់​យេនឌ័រ​ដែល​ថ្នាក់​ឃុំ-​សង្កាត់​​បច្ចុប្បន្ន​មាន​តិចតួច​បំផុត ឬ​ស្ទើរ​តែ​គ្មាន​ផង។ អ្នកស្រី ធីតា ឃិះ យល់​ថា គណបក្ស​នយោបាយ​ចំនួន​ពីរ​គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ សុទ្ធ​តែ​បង្ហាញ​គោលនយោបាយ​ល្អៗ​ជា​ច្រើន​សម្រាប់​ស្ត្រី។ ប៉ុន្តែ​ការ​អនុវត្ត​ជាក់ស្ដែង​នៅ​មិន​ទាន់​ល្អ​ដូច​គោលនយោបាយ​ដែល​សរសេរ​នោះ​ទេ។ ដោយសារ​គណបក្ស​ប្រជាជន​ជា​បក្ស​កំពុង​កាន់​អំណាច ដូច្នេះ​លោកស្រី​ចង់​ឃើញ​គណបក្ស​ប្រជាជន​អនុវត្ត​គោលនយោបាយ​លើក​ស្ទួយ​ស្ត្រី​ឲ្យ​បាន​ល្អ ដូច​គោលនយោបាយ​ដែល​លើក​ឡើង«យើង​ចង់​ឃើញ​ការ​កែ​ទម្រង់​គោល​នយោបាយ​ខ្លះ​ដែល​ខ្ញុំ​និយាយ​ហ្នឹង ដំឡើង​ថវិកា​ដល់​ថ្នាក់​ឃុំ-សង្កាត់​ហ្នឹង​ឲ្យ​បាន​យ៉ាង​ហោច​ណាស់ ៥​ភាគរយ ប៉ិន​អា​រឿង​សំខាន់​គឺ​រឿង​ថវិកា តើ​គណបក្ស​នយោបាយ​ណា​ដែល​មាន​គោល​នយោបាយ​បង្កើន​ថវិកា​នេះ​ដល់​ក្រុម​ប្រឹក្សា​ឃុំ-សង្កាត់»

​មិន​មែន​មាន​ត្រឹមតែ​គោលនយោបាយ​របស់​គណបក្ស​កាន់​អំណាច​ទេ ដែល​លើកស្ទួយ​ស្ត្រី។ គោលនយោបាយ​របស់​រដ្ឋាភិបាល​ដែល​លើក​កម្ពស់​ស្ត្រី ដាក់​ចេញ​ដោយ​ក្រសួង​កិច្ចការ​នារី ក៏​ត្រូវ​បាន​ក្រសួង​មួយ​នេះ​ចែង​យ៉ាង​ល្អ​ដែរ។

នាយិកា​នៃ​អង្គការ​យេនឌ័រ និង​អភិវឌ្ឍន៍​ដើម្បី​កម្ពុជា អ្នកស្រី រស់ សុភាព ថា គោលនយោបាយ​នារីរតនៈ ដំណាក់កាល​ទី​៤ របស់​ក្រសួង​កិច្ចការ​នារី និង​គោលនយោបាយ​យុទ្ធសាស្ត្រ​ចតុកោណ​របស់​រដ្ឋាភិបាល​សុទ្ធតែ​ចែង​យ៉ាង​ល្អ​ពី​ការ​លើក​ស្ទួយ​ស្ត្រី។ ក៏ប៉ុន្ដែ​សកម្មភាព​នៃ​ការអនុវត្ត​វិញ ហាក់​ដើរ​មិន​បាន​ល្អ​ដូច​គោលនយោបាយ​ដែល​បាន​ដាក់​ចេញ​ទេ«ប៉ុន្តែ​អនុម័ត​តែ​ផែនការ​យុទ្ធសាស្ត្រ អនុម័ត​តែ​គោល​នយោបាយ​ទេ លុយ​អត់​មាន​សោះ។ ចឹង​លុយ​ទៅ​ណា​ឯណា​ណោះ​វិញ? ដល់​ដាក់​ឯណា​អ៊ីចឹង​ទៅ ដល់​ពេល​គ្នា​ទៅ​ធ្វើ ទៅ​យក​ពី​កន្លែង​ណា​មក? រក​អត់​ឃើញ ទាំង​យើង​ទាំង​អី វង្វេង»

កាល​ពី​ថ្ងៃ​ទី​២០ ខែ​មេសា លោក​នាយករដ្ឋមន្ត្រី ហ៊ុន សែន បាន​រិះគន់​អ្នក​អត្ថាធិប្បាយ​ច្បោលៗ​ដែល​ហ៊ាន​រិះគន់​គោលនយោបាយ​របស់​រដ្ឋាភិបាល។ លោក​នាយករដ្ឋមន្ត្រី​ចាត់​ទុក​ការ​ធ្វើ​អត្ថាធិប្បាយ​រិះគន់​គោល​ច្បោលៗ ពី​គោលនយោបាយ​រដ្ឋាភិបាល​របស់​លោក​ថា ជា​រឿង​ដ៏​គួរ​ឲ្យ​ខ្មាសអៀន។

​ប្រធាន​ការិយាល័យ​តាមដាន និង​ត្រួត​ពិនិត្យ​ថវិកា​ឃុំ-​សង្កាត់​នៃ​ក្រសួង​សេដ្ឋកិច្ច និង​ហិរញ្ញវត្ថុ លោក ថន ចាន់រិទ្ធិ ថា ក្រសួង​សេដ្ឋកិច្ច​មាន​សិទ្ធិ​តែ​ទម្លាក់​លុយ​ទៅ​ថ្នាក់​ក្រោម​ជាតិ តាម​សំណើ​របស់​ក្រសួង​មហាផ្ទៃ តែប៉ុណ្ណោះ ឯ​ការ​ត្រួត​ពិនិត្យ ការ​ចាយវាយ​ថា​គ្រប់ ឬ​មិន​គ្រប់ ក្រសួង​សេដ្ឋកិច្ច​គ្មាន​សិទ្ធិ​ត្រួតពិនិត្យ​ទេ។ លោក​ថា បើ​ឃុំ​សង្កាត់​ណា​ចង់​បង្កើន​ថវិកា ត្រូវ​ធ្វើ​គម្រោង​ជា​មុន ឯ​ការ​ចាយវាយ​របស់​ឃុំ-​សង្កាត់ លោក​ថា​ជា​ឯករាជភាព​ក្នុង​ការ​ចាយវាយ​របស់​ថ្នាក់​ក្រោម​ជាតិ«អ្នក​គ្រោង​ហ្នឹង​ណា​គាត់​ឲ្យ​តម្លៃ​ទៅ​ខាង​ណា បើ​គាត់​ឲ្យ​តម្លៃ​ទៅ​លើ​ស្ត្រី និង​កុមារ​សំខាន់ ចឹង​ពេល​ដែល​គាត់​គ្រោង​ហ្នឹង គាត់​ត្រូវ​ដាក់​សកម្មភាព​ការងារ​ហ្នឹង ថវិកា​គាត់​ហ្នឹង​ចូល​ទៅ​ក្នុង​សកម្មភាព​ហ្នឹង»

បើ​ទោះ​ជា​បែប​នេះ​ក្ដី នាយិកា​ប្រតិបត្តិ​អង្គការ​សីលការ លោកស្រី ធីតា ឃឹះ ថា ការ​ទម្លាក់​ថវិកា​ផ្នែក​យេនឌ័រ ពី​ក្រសួង​ទៅ​ថ្នាក់​ក្រោម​ជាតិ ក្រៅ​ពី​នៅ​មាន​ចំនួន​តិច ប្រព័ន្ធ​នៃ​ការ​ដក​លុយ​សម្រាប់​ជួយ​ស្ត្រី​នៅ​ថ្នាក់ក្រោម​ជាតិ ក៏​នៅ​មាន​ការពិបាក​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល