បន្ថែមលើនេះទៀត លោកក៏បានទទូចសុំឲ្យអាជ្ញាធរ រដ្ឋាភិបាល យកចិត្តទុកដាក់ការពារកុមារ និងស្ត្រីពីការចាប់រំលោភសេពសន្ថវៈ និងអំពើហិង្សាលើស្ត្រី ព្រមទាំងលើកស្ទួយតម្លៃស្ត្រីនៅក្នុងសង្គមកម្ពុជា។
ប្រមុខរដ្ឋាភិបាលលោក ហ៊ុន សែន បានមានប្រសាសន៍ផ្តល់អាទិភាពបែបនេះ នៅគ្រាដែលក្រសួងកិច្ចការនារី បានរៀបចំរំលឹកខួបលើកទី១០២ នៃទិវានារីអន្តរជាតិ នៅថ្ងៃទី៨ ខែមីនា ឆ្នាំ២០១៣។ ពិធីនេះមានការចូលរួមដោយប្រធានកាកបាទក្រហមកម្ពុជា អ្នកស្រី ប៊ុន រ៉ានី ហ៊ុន សែន រដ្ឋមន្ត្រីក្រសួងកិច្ចការនារី អ្នកស្រី អ៊ឹង កន្ថាផាវី សមាជិកសភាជាតិ និងតំណាងស្ថានទូតបរទេសនានា តំណាងអង្គការមិនមែនរដ្ឋាភិបាល និងនិស្សិតជាស្ត្រីជាច្រើននាក់ទៀតនៅឯវិមានសន្តិភាព។
ការប្រារព្ធទិវានារីអន្តរជាតិនៅពេលនេះ គឺក្រោមប្រធានបទថ្មីមួយឈ្មោះថា សិទ្ធិស្មើគ្នា និងឱកាសដូចគ្នា ដើម្បីពន្លឿនកិច្ចអភិវឌ្ឍន៍នៅកម្ពុជា។ របាយការណ៍របស់ក្រសួងកិច្ចការនារី បានឲ្យដឹងថា ស្ត្រីកម្ពុជា មានចំនួន ៥២% គឺជាងពាក់កណ្ដាលនៅក្នុងចំណោមប្រជាពលរដ្ឋខ្មែរសរុបជាង ១៤លាននាក់។
លោក ហ៊ុន សែន បានមានប្រសាសន៍ថា ស្ត្រីកម្ពុជា កំពុងតែដើរតួនាទីយ៉ាងសកម្ម ដើម្បីអភិវឌ្ឍន៍សង្គម និងសេដ្ឋកិច្ចជាតិ ប៉ុន្តែស្ត្រី និងកុមារកំពុងតែប្រឈមមុខនឹងបញ្ហាធ្ងន់ធ្ងរមួយចំនួន ដូចជាការជួញដូរស្ត្រី និងកុមារជាដើម៖ «កំពុងតែពង្រឹងការអនុវត្តបទបញ្ញានានា សំដៅការពារសិទ្ធិ និងផ្តល់ប្រយោជន៍របស់ស្ត្រី និងជំរុញការផ្តល់សេវាកម្មច្បាប់ និងសង្គមកិច្ចជូនជនរងគ្រោះឲ្យទាន់ពេលវេលា ក្នុងន័យនេះ ការអនុវត្តគោលនយោបាយភូមិ ឃុំ មានសុវត្ថិភាព គឺពិតជាបានរួមចំណែកយ៉ាងពិតប្រាកដក្នុងការពង្រឹងសណ្ដាប់ធ្នាប់សង្គម និងធានាសុវត្ថិភាពជូនប្រជាជន ជាពិសេសស្ត្រី និងលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ»។
ជាមួយគ្នានេះ ប្រធានអង្គការការពារសិទ្ធិមនុស្សលីកាដូ (Licadho) អ្នកស្រី ពុង ឈីវកេក បានមានប្រសាសន៍ថា ស្ត្រី និងកុមារ នៅតែជាកម្មវត្ថុនៃការចាប់រំលោភផ្លូវភេទ និងការជួញដូរផ្លូវភេទ និងអំពើអាណាចារ៖ «ឥឡូវហ្នឹង ស្ត្រីនៅតែរងគ្រោះនៃអំពើហិង្សាក្នុងគ្រួសារ ដោយសារការរំលោភសេពសន្ថវៈ ពិសេសកុមារី ហើយនិងជួញដូរ។ ហើយឥឡូវនេះ មានស្ត្រីដែលរងគ្រោះដោយសារបាត់បង់ផ្ទះសម្បែងហ្នឹង ស្ត្រីគឺប្រឈមមុខណាស់។ មិញ សម្ដេចនាយករដ្ឋមន្ត្រី ហ៊ុន សែន បានទទួលស្គាល់ លោកក៏បានមានប្រសាសន៍ដែរថា នៅតែមានបញ្ហាអីចឹង យើងឃើញថា រដ្ឋាភិបាលលោកប្រឹងប្រែងដើម្បីដោះស្រាយ ប៉ុន្តែមានការងារត្រូវធ្វើច្រើនតទៅទៀត មិនទាន់គ្រប់គ្រាន់ទេ អីចឹងត្រូវការឲ្យមានការសហការគ្នាទាំងអស់ រវាងស្ថាប័នជាតិ និងសង្គមស៊ីវិល»។
របាយការណ៍របស់ក្រសួងកិច្ចការនារី បានឲ្យដឹងថា ស្ត្រីនៅក្នុងឆាកនយោបាយ និងរដ្ឋបាលសាធារណៈបានកើនឡើងដល់ចំនួន ៣២% ទៅ ៣៥% នៅឆ្នាំ២០១២ កន្លងមកនេះ។ កម្ពុជា បានបង្កើតឲ្យមានគណៈកម្មាធិការជាតិមួយ ដើម្បីលើកកម្ពស់តម្លៃស្ត្រី និងគ្រួសារខ្មែរ ដែលមានអ្នកស្រី ប៊ុន រ៉ានី ហ៊ុន សែន ជាប្រធានកិត្តិយស ដើម្បីទប់ស្កាត់រាល់បទល្មើសលើស្ត្រីតាមបច្ចេកវិទ្យាទំនើប អំពើហិង្សាលើស្ត្រី អំពើអាណាចារលើស្ត្រី និងកុមារ។
ដោយឡែក អង្គការការពារសិទ្ធិមនុស្សលីកាដូ បានចេញផ្សាយរបាយការណ៍មួយសម្ដែងនូវការព្រួយបារម្ភថា នៅពាក់កណ្ដាលឆ្នាំ២០១២ កន្លងមកនេះ អ្នកទោសជាស្ត្រីបានកើនដល់ចំនួន ១.២៧០នាក់ នៅក្នុងពន្ធនាគារនៅទូទាំងប្រទេសកម្ពុជា គឺកើនឡើង ៣៩% គិតពីខែធ្នូ ឆ្នាំ២០១០ កន្លងមក។ នៅក្នុងនោះ មានស្ត្រីរស់នៅជាមួយកូនតូចៗចំនួន ៦៧នាក់ និងស្ត្រី ១៤នាក់មានផ្ទៃពោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។