សង្គមស៊ីវិល ស្នើឲ្យឯកអគ្គរាជទូតប្រទេសមួយចំនួនដែលមានបញ្ហារំលោភសិទ្ធិពលករចំណាកស្រុក មានការប្ដេជ្ញាចិត្តក្នុងការជួយការពារដល់ពលករខ្មែរ ដែលកំពុងធ្វើការនៅក្រៅប្រទេស។
ការលើកឡើងនេះ ស្របពេលដែលឯកអគ្គរាជទូតខ្មែរចំនួន ៧រូប គ្រោងចេញទៅកាន់ការងារប្រចាំប្រទេសចំនួន៨ គឺសហរដ្ឋអាមេរិក ប្រទេសគុយវ៉េត (Kuwait) ប៊ែលហ្ស៊ីក (Belgium) ឥណ្ឌូនេស៊ី (Indonesia) ឥណ្ឌា (India) ជប៉ុន (Japan) អូស្ត្រាលី (Australia) និងប្រទេសណូវែលហ្សេឡង់ដ៍ (New Zealand)។
នាយកប្រតិបត្តិអង្គការខារ៉ាមកម្ពុជា (CARAM Cambodia) លោក យ៉ា ណាវុធ ថ្លែងនៅថ្ងៃទី២៩ ឧសភា ថា ប្រទេសចំនួន៨ ដែលបានរៀបរាប់នេះ លោកពុំឃើញមានករណីរំលោភបំពានសិទ្ធិពលករនោះទេ។ ប៉ុន្តែដោយឡែក បើសិនមានការផ្លាស់ប្ដូរឯកអគ្គរាជទូតប្រចាំប្រទេសថៃ ប្រទេសម៉ាឡេស៊ី ឬប្រទេសកូរ៉េខាងត្បូង ក្ដី លោកលើកទឹកចិត្តឲ្យមានការពង្រឹងកិច្ចការពារដល់ពលករចំណាកស្រុក ឲ្យបានខ្លាំងក្លាជាងមុនបន្ថែមទៀត ពិសេសប្រទេសថៃ និងប្រទេសម៉ាឡេស៊ី៖ «គួរតែបណ្ដុះបណ្ដាលមន្ត្រីទូតហ្នឹង ឲ្យគាត់មានជំនាញពាក់ព័ន្ធទៅនឹងផ្នែកពលករចំណាកស្រុក ជួយសង្គ្រោះពលករ និងផ្នែកទទួលពាក្យបណ្ដឹងជាដើម»។
ទាក់ទងព័ត៌មាននេះ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង ដែលជាឯកអគ្គរាជទូតមួយរូបនឹងត្រូវទៅប្រចាំការនៅប្រទេសអូស្ត្រាលី និងប្រទេសនូវែលហ្សេឡង់ មានប្រសាសន៍ថា មន្ត្រីទាំង ៧រូប បានប្ដេជ្ញាចិត្តលើការពង្រឹងការងារពលករចំណាកស្រុក ក្រៅពីនោះ ក៏នឹងផ្ដោតលើកិច្ចការទំនាក់ទំនងទ្វេភាគី នយោបាយ ការទូត សេដ្ឋកិច្ច និងពាណិជ្ជកម្ម ជាដើម។
ឯកអគ្គរាជទូតទាំង ៧រូប នឹងចេញទៅកាន់ប្រទេសរៀងៗខ្លួននៅអំឡុងខែមិថុនា និងខែកក្កដា បន្ទាប់ពីចូលក្រាបបង្គំលាព្រះមហាក្សត្រជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។