លោក ហ៊ុន សែន មានប្រសាសន៍ថា ឧត្តមសេនីយ៍ក្រសួងមហាផ្ទៃរូបនោះ មានទំនាស់ដីធ្លីជាមួយពលរដ្ឋ ៩គ្រួសារនៅខេត្តពោធិ៍សាត់ ហើយរូបគាត់បានប្រើប្រាស់តួនាទីរបស់ខ្លួន ដោយចេញលិខិតគំរាមកំហែងអាជ្ញាធរ និងក្រុមយុវជនស្ម័គ្រចិត្ត ដែលចុះវាស់វែងដីធ្លីជូនប្រជាពលរដ្ឋ។ លោកបន្តថា លោកសុំឲ្យរដ្ឋមន្ត្រីក្រសួងដែនដីនគរូបនីយកម្ម និងសំណង់ ដាក់ពាក្យបណ្ដឹងទៅតុលាការប្រឆាំងនឹងឧត្តមសេនីយ៍ផ្កាយ៣ និងបានបញ្ជាឲ្យអគ្គស្នងការនគរបាលជាតិ តាមឃ្លាំមើលកុំឲ្យរត់គេចខ្លួនថែមទៀត។
លោក ហ៊ុន សែន៖ «អាហ្នឹងវាស្ថិតនៅសមត្ថកិច្ចរបស់អាជ្ញាធរ អាជ្ញាធរមានសិទ្ធិឃុំមុនបញ្ជូនទៅតុលាការ ទោះបីជាព្រះមហាក្សត្រមិនទាន់ដកតំណែង ក៏យើងមានសិទ្ធិចាប់ដែរ ហើយយុវជននេះមិនមែនអ្នកណាមានសិទ្ធិចេះតែប្រើបានទេណា តំបន់មានមីនវាហ៊ានប្រើគេទៅវាស់ដី?»។
ការប្រកាសអំពីបញ្ហានេះ បានធ្វើឡើងក្នុងពេលចុះទៅចែកប័ណ្ណកម្មសិទ្ធិដីជូនប្រជាពលរដ្ឋក្នុងខេត្តកំពង់ចាម នាព្រឹកថ្ងៃ១៣ តុលា។ ឧត្តមសេនីយ៍រូបនេះ ជាបុគ្គលទី៣ហើយ ដែលរដ្ឋាភិបាលចាត់ការតាមផ្លូវច្បាប់ ក្នុងសំណុំរឿងទាក់ទងនឹងនិស្សិតចុះវាស់វែងដី បន្ទាប់ពីសំណុំរឿងនៅខេត្តស្ទឹងត្រែង និងខេត្តក្រចេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។