យុវជនម្នាក់នៅក្រុងសួង ខេត្តកំពង់ចាម ត្រូវបានប៉ូលិសបាញ់ឲ្យរបួសជើង កាលពីយប់ថ្ងៃទី១២ ខែមិថុនា ក្នុងពេលដែលយុវជននោះបានជិះម៉ូតូឆ្លងកាត់កន្លែងត្រួតពិនិត្យរបស់ប៉ូលិស ដែលកំពុងចាំស្ទាក់ចាប់មុខសញ្ញាប្លន់ ត្រូវប៉ូលិសអះអាងថា ជាការច្រឡំដោយអចេតនា។
យុវជន ឃួន ណារិន អាយុ ២១ឆ្នាំ បានផ្ទល់សម្ភាសន៍ពីមន្ទីរពេទ្យខេត្តថា ខ្លួន និងគូកនម្នាក់ទៀត បានជិះម៉ូតូក្នុងល្បឿនលឿន លុះនៅសល់ប្រមាណពី ២ ទៅ ៣ម៉ែត្រដល់កន្លែងត្រួតពិនិត្យ ប៉ូលិសជាច្រើននាក់បានច្របាច់ពិលចេញពីទីពួន ហើយឃាត់ ដែលខ្លួនថា មិនអាចទប់ល្បឿនបាន ក៏បណ្ដាលឲ្យប៉ូលិសបាញ់តែម្ដង។
យុវជន ឃួន ណារិន ឲ្យដឹងដូច្នេះ ៖ «គេបាញ់ ខ្ញុំបន្ថែមល្បឿនតែម្ដងទៅ។ គេថា ពួកអាចោរ ពួកអ្ហែងសមមុខហើយ បន្ទាប់មកគេបាញ់ចំនួន ២គ្រាប់ទៀតគំរាម ។ ទាត់ខ្ញុំមួយជើង។ អ្នកទាត់ខ្ញុំហ្នឹងឈ្មោះ ឆាយ ភឿន គេថា ខ្ញុំជិះបុកបារាសគេ បើបារាសគាត់អត់មានដាក់សញ្ញាពីចម្ងាយផង»។
លោក ឃួន ណារិទ្ធ ជាឪពុកជនរងគ្រោះបានឲ្យដឹងថា លោកចង់ប្ដឹងឲ្យមានការទទួលខុសត្រូវលើការព្យាបាលកូន និងជួយសងការខូចខាតម៉ូតូតែមិនហ៊ាន ដោយគេបានឲ្យលោកផ្ដិតមេដៃថាមិនប្តឹង តែក្រោយមកដោយទទួលពាក្យគំរាមជាច្រើនពីប៉ូលិស ដែលថា នឹងចាប់កូនមកដាក់គុកវិញបើនៅតែប្ដឹងនោះ ទើបលោកសម្រេចថាប្ដឹងវិញ។
លោក ឃួន ណារិទ្ធ មានប្រសាសន៍ថា ៖ «ពីម្សិលម្ង៉ៃនោះគំរាមកំហែងខ្ញុំថា បើអ្ហែងប្ដឹងមិនឈ្នះអញទេ ព្រោះអញជាក្រសួងសមត្ថកិច្ច កូនអ្ហែងជិះហៅមិនឈប់ អញត្រូវបាញ់អ៊ីចឹង ចោទថា កូនអ្ហែងចោរក៏បានដែរ។ គេបន្តទៀតថា អ្ហែងប្ដឹងយ៉ាងម៉េចក៏មិនឈ្នះអញដែរ ព្រោះអញអ្នកធ្វើការ សែអញក៏អ្នកធំដែរ បើអ្ហែងប្ដឹង ម៉ូតូហ្នឹងអញអត់ឲ្យ ហើយកូនអ្ហែងអញយកមកដាក់ខ្នោះវិញ»។
លោក លាង អេង អធិការក្រុងសួង បានបំភ្លឺថា លោកបានរៀបចំជារបាំងបីកន្លែងនៅកន្លែងនៅចំណុចមុខហាងលំអងមាស ក្បែរផ្លូវបត់ចូលវត្តវិហារខ្ពស់ ឃុំសួង កាលពីយប់ថ្ងៃទី១២ ខែមិថុនានេះ បន្ទាប់ពីទទួលដំណឹងថា មានមុខសញ្ញាចោរប្លន់ឆ្លងកាត់ទីនោះ លុះប្រមាណជាម៉ោងជាង ៨ ក៏មានម៉ូតូពីរគ្រឿងឆ្លងកាត់ ដោយមិនឈប់ ថែមទាំងបាញ់ទៅលើប៉ូលិសម្នាក់ឲ្យរបួសជើងជាទម្ងន់ ហើយប៉ូលិសក៏បាញ់ទៅលើម៉ូតូ ណារិន វិញ ដោយងងឹតមើលមិនដឹងច្បាស់ ហើយថា ជារឿងអចេតនាបែបនេះ ប៉ូលិសមិនទទួលសងការខូចខាតនោះឡើយ។
លោក លាង អេង មានប្រសាសន៍ដូច្នេះ ៖ «ម៉ូតូមកទាំងពីរ។ ម៉ូតូមួយនោះបាញ់ប៉ូលិសខ្ញុំបាក់ជើង ដល់ប៉ូលិសបាញ់ម៉ូតូមួយដែលមកជាមួយគ្នាហ្នឹង ហៅមិនឈប់ទាំងពីរនាក់ទាំងកូនគាត់អីហ្នឹង អ៊ីចឹងប៉ូលិសខ្ញុំត្រូវបាញ់វិញ ដល់បាញ់ទៅត្រូវកូនគាត់។ នេះជាអចេតនាទេ បើសិនជាប៉ូលិសខ្ញុំទៅបាញ់គេទាំងស្រស់នោះ ខ្ញុំត្រូវតែសងគាត់ហើយ។ កូនហ្នឹងខុស គឺបទល្មើស ប៉ូលិសខ្ញុំហៅ ៣ដំណាក់ហើយអត់ឈប់។ ឪពុកវាមកសំណូមពរថា មិនមានអ្វីប្ដឹងផ្ដល់ទេ គាត់សុំទោសថា កូនគាត់ខុស វាចប់ហើយទេតើ ឥឡូវទៅជាប្ដឹងផ្ដល់យ៉ាងម៉េចវិញ?»។
ទោះជាមានការអះអាងបែបនេះក៏ដោយ ក៏លោក ចាន់ សុវ៉េត មន្ត្រីសិទ្ធិមនុស្សនៃសមាគមអាដហុក ហាក់ដូចជាបានទម្លាក់ទម្ងន់ទាំងនេះទៅលើប៉ូលិសថា ខ្វះការទទួលខុសត្រូវច្បាស់លាស់ ៖ «នេះសំណាងហើយមិនស្លាប់ ចុះបើស្លាប់វិញយ៉ាងម៉េច? សុំទោសដែរ? គោរពអនុវត្តសិទ្ធិមនុស្សឲ្យបានត្រឹមត្រូវ ហើយត្រូវទទួលខុសត្រូវទាំងរឿងព្រហ្មទណ្ឌ ទាំងចេញសំណងរដ្ឋប្បវេណី ទាំងការដាក់ពិន័យផ្សេងៗទៀតដែលបានប្រើអាវុធខុសច្បាប់»។
លោក ចាន់ សុវ៉េត បន្ថែមថា បើប្រជាពលរដ្ឋមានការខ្លាចរអាថ្ងៃក្រោយគេនឹងគំរាមកំហែងលើសនេះទៀត ប៉ុន្តែបើមានពាក្យបណ្ដឹងដល់តុលាការលើករណីប្រើអាវុធខុសច្បាប់ គេនឹងចាត់វិធានការហើយ៕