ការចោទប្រកាន់នេះបានធ្វើឡើងក្នុងកម្មវិធី «ទំនាក់ទំនងរវាងអ្នកតំណាងរាស្ត្រ និងម្ចាស់ឆ្នោត» នៅឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។
លោក ឈួ សំអាត ជាប្រជាពលរដ្ឋនៅភូមិប៉ាក់ឡាង ឃុំក្រាំងលាវ។ លោកបានលើកឡើងក្នុងកម្មវិធីទំនាក់ទំនងរវាងអ្នកតំណាងរាស្ត្រ និងម្ចាស់ឆ្នោតថា អាជ្ញាធរស្ទើរតែគ្រប់ភូមិ ឃុំ ក្នុងស្រុករលាប្អៀរ បានទាមទារតម្លៃសេវាខ្ពស់ក្នុងការធ្វើសំបុត្រការ សំបុត្របុណ្យ ឬក្នុងការបញ្ជាក់លិខិតស្នាមផ្សេងៗ។ លោកថា ការយកតម្លៃសេវាអត្រានុកូលដ្ឋាន និងលិខិតស្នាមផ្សេងៗខ្ពស់ ធ្វើឲ្យប៉ះពាល់ដល់ជីវភាពប្រចាំថ្ងៃរបស់ប្រជាពលរដ្ឋ។
លោកបានសំណូមពរឲ្យអ្នកតំណាងរាស្ត្រជួយធ្វើអន្តរាគមន៍បញ្ចុះតម្លៃសេវានេះ៖ «ច្បាប់បុណ្យច្បាប់ការនៅស្រុករលាប្អៀរ មូលហេតុអីបានជាអាជ្ញាធរមូលដ្ឋានគាត់យកខុសពីផ្លូវច្បាប់? តាមច្បាប់ឲ្យយកតែ ១.៥០០រៀលទេ ក្នុង១ច្បាប់ ហើយច្បាប់បុណ្យមិនឲ្យយកថ្លៃសេវាទេ ចុះហេតុអ្វីបានជានៅឃុំមួយចំនួនបានយកពី ២ ទៅ ៣ម៉ឺនរៀល?»។
មេឃុំក្រាំងលាវ គឺលោក កែ រិន បានបដិសេធការចោទប្រកាន់។ លោកមានប្រសាសន៍ថា អាជ្ញាធរឃុំក្រាំងលាវ បានប្រកាសជាសាធារណៈចំពោះតម្លៃសេវាអត្រានុកូលដ្ឋាន និងសេវាប្រថាប់ត្រាផ្សេង។ លោកថា បញ្ហានេះមិនមានកើតឡើងក្នុងឃុំក្រាំងលាវ នោះទេ៖ «រាល់ពេលប្រជុំមហាជន ខ្ញុំបានប្រកាសឲ្យដឹងទាំងអស់ហើយថា រាល់ការប្រថាប់ត្រា គឺមិនយកថ្លៃសេវាទេ...»។
ផ្ទុយពីការអះអាងរបស់លោក កែ រិន តំណាងរាស្ត្រគណបក្សប្រឆាំង សម រង្ស៊ី គឺលោក គីមសួរ ភីរិទ្ធ បានទទួលស្គាល់ថា បញ្ហានេះកើតមានមិនមែនតែក្នុងខេត្តកំពង់ឆ្នាំង នោះទេ តែវាកើតមានស្ទើរតែគ្រប់ទិសទីក្នុងទូទាំងប្រទេស៖ «នៅខេត្តបន្ទាយមានជ័យ ខេត្តកំពង់ចាម គឺមិនមែនរឿងបុគ្គលទេ សឹងតែទូទៅ។ ឥឡូវសួរមើលអ្នកដែលមកនេះ អ្នកណាមួយដែលទៅធ្វើសំបុត្រការកូនអស់លុយតិចជាង ១ម៉ឺន មិនមែនជារឿងសាមញ្ញនោះទេ។យើងត្រូវទទួលស្គាល់ថា ការទារថ្ងៃសេវានេះ មានកើតនៅគ្រប់ឃុំទាំងអស់ គ្រាន់តែឃុំខ្លះយកតិចឃុំខ្លះយកច្រើនប៉ុណ្ណោះ...»។
យ៉ាងនេះក្ដី អភិបាលស្រុករលាប្អៀរ គឺលោក ឈឹម វុទ្ធា ពន្យល់ចំពោះបញ្ហានេះថា ករណីទាមទារប្រាក់សេវាអត្រានុកូលដ្ឋាន និងសេវាប្រថាប់ត្រាផ្សេងខុសពីតម្លៃកំណត់ដោយច្បាប់នោះ អាចកើតមានជាលក្ខណៈបុគ្គល។ លោកបានសំណូមពរឲ្យប្រជាពលរដ្ឋរាយការណ៍ឲ្យចំឈ្មោះអ្នកដែលបានប្រព្រឹត្តខុសការកំណត់ដោយច្បាប់នេះ ដើម្បីឲ្យលោកមានមូលដ្ឋានចាត់ការតាមផ្លូវច្បាប់៖ «ចំណុចខ្វះខាតនេះ គឺកើតមានជាលក្ខណៈបុគ្គល មិនមែនអង្គភាពនោះទេ។ សូមកុំឲ្យលើកជាទូទៅ សូមលើកឲ្យចំៗបុគ្គលនោះមក ងាយស្រួលខ្ញុំចាត់ការតាមផ្លូវច្បាប់»។
មន្ត្រីសម្របសម្រួលសមាគមអាដហុក ខេត្តកំពង់ឆ្នាំង លោក សំ ច័ន្ទគា មានប្រសាសន៍ថា ដើម្បីទប់ស្កាត់ករណីនេះ អាជ្ញាធរភូមិ ឃុំ ត្រូវបង្ហាញពីតម្លាភាពដោយការបិទតារាងតម្លៃសេវាជាសាធារណៈ នៅមុខការិយាល័យផ្ដល់សេវានេះឲ្យប្រជាពលរដ្ឋបានដឹង។ នៅពេលមានការទាមទារតម្លៃលើស ប្រជាពលរដ្ឋមានមូលដ្ឋានសំអាងដើម្បីការតវ៉ា៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។