សមាគមខ្មែរកម្ពុជាក្រោមគ្រោងតវ៉ាប្រឆាំងនឹងការបំភ្លៃប្រវត្តិសាស្ត្រនៅដើមខែតុលា
2014.08.31
អង្គការសមាគមខ្មែរកម្ពុជាក្រោម និងយុវជនសម្រេចថា នឹងចាប់ផ្ដើមធ្វើការតវ៉ាប្រឆាំងនឹងការបំភ្លៃប្រវត្តិសាស្ត្រទឹកដីកម្ពុជាក្រោមនៅដើមខែតុលា ឆ្នាំ២០១៤ បន្តទៀត។ ការសម្រេចចិត្តពន្យារពេលយូរដូចនេះ ដោយសារពួកគេចង់ទុកពេលមួយខែទៀតឲ្យក្រសួងការបរទេសកម្ពុជា ធ្វើការជាមួយរដ្ឋាភិបាលវៀតណាម ជុំវិញការទាមទាររបស់ពួកគេ។ ម្យ៉ាងដោយសារក្នុងខែកញ្ញា ខាងមុខនេះ ប្រជាពលរដ្ឋខ្មែរត្រូវនាំគ្នាប្រារព្ធពិធីបុណ្យដាក់បិណ្ឌ និងភ្ជុំបិណ្ឌផង។
គម្រោងការធ្វើបាតុកម្មប្រឆាំងរដ្ឋាភិបាលវៀតណាម អំពីបញ្ហាប្រវត្តិសាស្ត្រទឹកដីកម្ពុជាក្រោម ដែលអង្គការសមាគមខ្មែរកម្ពុជាក្រោម ពលរដ្ឋ និងយុវជន មានគម្រោងធ្វើនៅដើមខែកញ្ញា គ្រោងលើកទៅធ្វើនៅដើមខែតុលាវិញ ប្រសិនបើពួកគេនៅតែមិនទទួលបានការឆ្លើយតបចាប់ពីពេលនេះរហូតដល់ចុងខែកញ្ញា។
ការអះអាងបែបនេះ ធ្វើឡើងបន្ទាប់ពីអង្គការសមាគមខ្មែរកម្ពុជាក្រោម បានជួបប្រជុំគ្នាជាមួយក្រុមយុវជនទាំង៩ នៅរសៀលថ្ងៃទី៣១ សីហា នៅភោជនីយដ្ឋានបៃតង។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍ថា ខ្មែរក្រោមនិងយុវជនសម្រេចចិត្តប្រមូលផ្តុំគ្នាជាថ្មីទៀតនៅដើមខែតុលា ដោយសារតែក្នុងខែកញ្ញា ប្រជាពលរដ្ឋខ្មែរត្រូវនាំគ្នារៀបចំធ្វើពិធីបុណ្យភ្ជុំបិណ្ឌ និងដើម្បីទុកពេលឲ្យក្រសួងការបរទេសកម្ពុជា បានច្រើនបន្តិច ដើម្បីធ្វើការជាមួយរដ្ឋាភិបាលវៀតណាម។
តែទោះយ៉ាងណាក៏ដោយ លោក ថាច់ សេដ្ឋា ឲ្យដឹងថា ខ្មែរក្រោមនិងយុវជន នឹងរៀបចំវេទិកាពិភាក្សាមួយនៅថ្ងៃទី៦ ខែកញ្ញា ខាងមុខ នៅទីលានប្រជាធិបតេយ្យ ដើម្បីនិយាយពីប្រវត្តិសាស្ត្រទឹកដីកម្ពុជាក្រោម និងពីអន្តោប្រវេសន៍ខុសច្បាប់នៅកម្ពុជា៖ «វាហាក់ដូចជារយៈពេលវែងសម្រាប់ទាំងយួនដែលគេគិតអំពីបញ្ហារកដំណោះស្រាយហ្នឹង ក៏ដូចជាជាមួយរដ្ឋាភិបាល ហើយបើមិននៅតែមិនចេញទេ គឺអាហ្នឹងក្នុងចុងខែ៩ហ្នឹង គឺយើងនឹងចាប់ផ្ដើមធ្វើតាមការកំណត់ទៅ នឹងអាចគ្រោងធ្វើនៅថ្ងៃទី២ ទី៣ ទី៤ ទី៥ នៅខែ១០ អាហ្នឹងយុវជនបានសម្រេចអម្បាញ់មិញ»។
អង្គការសមាគមខ្មែរកម្ពុជាក្រោម និងយុវជន កាលពីថ្ងៃទី១១ សីហា បានដាក់ញត្តិទៅក្រសួងការបរទេសកម្ពុជា ដើម្បីឲ្យក្រសួងកោះហៅមន្ត្រីស្ថានទូតវៀតណាម ប្រចាំកម្ពុជា ធ្វើកំណត់ទូតដើម្បីបញ្ចប់ការបំភ្លៃប្រវត្តិសាស្ត្រខ្មែររបស់រដ្ឋាភិបាលវៀតណាម និងដើម្បីជៀសវាងការភ័ន្តច្រឡំក្នុងការសិក្សារៀនសូត្រ និងការស្រាវជ្រាវរបស់សិស្សនិស្សិតខ្មែរក្នុងពេលខាងមុខ។ ក្រុមអ្នកតវ៉ាបានទុកពេលឲ្យក្រសួងការបរទេសរហូតដល់ដំណាច់ខែសីហា ដើម្បីធ្វើការងារនេះ ហើយថា ប្រសិនបើគ្មានវិធានការណាមួយទេ ពួកគេនឹងធ្វើការតវ៉ាបន្តទៀត។
ប្រធានសហព័ន្ធនិស្សិតនិងបញ្ញវន្តកម្ពុជា លោក ម៉ៅ ពិសេស ដែលបានដឹកនាំសមាជិករបស់ខ្លួនចូលរួមការតវ៉ារបស់ខ្មែរក្រោមដែរនោះ កត់សម្គាល់ថា សហព័ន្ធរបស់លោកមិនបោះបង់ចោលឡើយនូវគម្រោងទាមទារឲ្យវៀតណាម ទទួលស្គាល់ប្រវត្តិសាស្ត្រទឹកដីខ្មែរ។ លោកសង្ឃឹមថា ក្នុងរយៈពេល ១ខែ ចាប់ពីពេលនេះ រហូតដល់ចុងខែកញ្ញា ក្រសួងការបរទេសកម្ពុជា អាចដោះស្រាយបញ្ហានេះបាន។
លោក ម៉ៅ ពិសេស៖ «ខ្ញុំគ្រាន់តែចង់អំពាវនាវដល់រដ្ឋាភិបាលកម្ពុជា ធ្វើយ៉ាងម៉េចជំរុញឲ្យរដ្ឋាភិបាល វៀតណាមហ្នឹង គោរពប្រទេសកម្ពុជា ហើយទទួលស្គាល់ការពិតប្រវត្តិសាស្ត្រ អ៊ីចឹងគឺគាត់ត្រូវដើរតួផ្នែកការទូតឲ្យបានប្រសើរ ឲ្យឆ្លាត ដើម្បីធ្វើយ៉ាងម៉េចកុំឲ្យមើលមកថា ប្រទេសកម្ពុជា ក៏ដូចជារដ្ឋាភិបាលហ្នឹង មិនស្ដាប់វៀតណាម ហើយការពារផលប្រយោជន៍របស់ខ្មែរពិតប្រាកដ ហើយអ៊ីចឹងរយៈពេលប្រហែលជាងមួយខែទៀតហ្នឹង គឺជាពេលវេលាហាក់ដូចជាសមរម្យ គ្រប់គ្រាន់សម្រាប់គាត់ធ្វើហើយ បើគាត់មានឆន្ទៈ»។
ពលរដ្ឋខ្មែរនិងខ្មែរក្រោម បានតវ៉ាចំនួន ៣លើកមកហើយ ដើម្បីទាមទារឲ្យរដ្ឋាភិបាលវៀតណាម សុំទោសចំពោះការបំភ្លៃប្រវត្តិសាស្ត្រទឹកដីកម្ពុជាក្រោម។ សន្ទុះនៃការតវ៉ាហាក់បានឡើងកម្ដៅកាន់តែខ្លាំងឡើងៗ រហូតដល់មានការដុតទង់ជាតិវៀតណាម។ ទោះជាយ៉ាងណា រដ្ឋាភិបាលវៀតណាម មិនបានឆ្លើយតបឡើយ ផ្ទុយទៅវិញ ពួកគេបានទទូចឲ្យរដ្ឋាភិបាលកម្ពុជា ចាត់វិធានការកុំឲ្យមានបាតុកម្មប្រឆាំងពួកគេ និងចាត់វិធានការចំពោះអ្នកដុតទង់ជាតិវៀតណាម។
យ៉ាងណាក៏ដោយ រដ្ឋាភិបាលកម្ពុជា បដិសេធមិនធ្វើតាមការស្នើរបស់វៀតណាម នោះទេ ដោយលើកហេតុផលថា កម្ពុជាជាប្រទេសប្រជាធិបតេយ្យ។ ចំណែកការដុតទង់ជាតិវិញ ក៏ជារឿងសកលទៅហើយ ដែលសូម្បីតែពលរដ្ឋវៀតណាម ខ្លួនឯង ក៏បានដុតទង់ជាតិចិនដែរ ក្នុងពេលបាតុកម្មតវ៉ាកន្លងមក៕