អង្គសិក្ខាសាលាពិសេសមួយដឹកនាំដោយគណៈកម្មាធិការព្រំដែនកម្ពុជា ដែលមានខ្មែរចូលរួមប្រមាណ ២០០នាក់នៅទីក្រុងប៊ុស្ស៊ីសាំងហ្ស័ក ថ្មីៗនេះ ទើបបានចេញផ្សព្វផ្សាយនូវអនុសាសន៍ ដែលជាលទ្ធផលនៃកិច្ចពិភាក្សាផ្តោតអំពីវិបត្តិសង្គមនៅកម្ពុជា រួមមានបញ្ហាការអភិវឌ្ឍសេដ្ឋកិច្ច ការធ្លាក់ចុះគុណភាពនៃវិស័យវប្បធម៌និងព្រះពុទ្ធសាសនាខ្មែរ ស្ថានភាពលំបាកវេទនារបស់ស្រ្តីខ្មែរ អ្នកក្រីក្រ ការបាត់បង់ទឹកដីដោយសារការឈ្លានពានពីសំណាក់ប្រទេសជិតខាងដែលនៅតែបន្តគម្រោងនៃការធ្វើអាជីវកម្មប្រេងកាតដែលគ្មានតម្លាភាព ការឡើងថ្លៃនៃតម្លៃប្រេងសាំងនៅស្រុកខ្មែរ ខ្ពស់ជាងប្រទេសជិតខាង ការក្តោបក្តាប់របស់វៀតណាមលើស្ថាប័នជាតិខ្មែរ និងបញ្ហានិគមជនវៀតណាមនៅក្នុងប្រទេសកម្ពុជា ។
សិក្ខាកាមដែលជាអ្នកតំណាងអង្គការសង្គមស៊ីវិល បញ្ញាជន និងអ្នកបច្ចេកទេសខ្មែរ បញ្ជាក់ថា បញ្ហាទាំងអស់នេះ គឺជាគ្រោះថ្នាក់ចំពោះមុខសម្រាប់ប្រជាជាតិខ្មែរ ។ ហេតុនេះហើយ ទើបគេរួមគ្នាពិភាក្សា បង្ហាញនូវកង្វល់រួម ហើយផ្ញើសារនេះ ជូនទៅលោកនាយករដ្ឋមន្ត្រីខ្មែរ ហ៊ុន សែន ជូនទៅប្រធាននិងសមាជិកសភានិងព្រឹទ្ធសភាខ្មែរ និងថ្វាយជូនព្រះមហាក្សត្រខ្មែរ ដើម្បីឲ្យលោកបានជ្រាបនិងដោះស្រាយ ។
មិនតែប៉ុណ្ណោះ អង្គសិក្ខាសាលាក៏បានផ្ញើសារដដែលនេះជូនទៅអគ្គលេខាធិការអង្គការសហប្រជាជាតិ ជូនទៅសហប្រធាននៃសន្ធិសញ្ញាក្រុងប៉ារីសស្តីពីកម្ពុជាឆ្នាំ១៩៩១ និងផ្ញើជូនទៅកាន់រដ្ឋាភិបាលនៃប្រទេសហត្ថលេខីនៃកិច្ចព្រមព្រៀងក្រុងប៉ារីសនោះដែរ ដើម្បីឲ្យគេជួយជំរុញឲ្យរដ្ឋាភិបាលកម្ពុជាសព្វថ្ងៃដោះស្រាយបញ្ហាទាំងនេះ ឲ្យបានទាន់ពេលវេលា ៕