សហព័ន្ធខ្មែរកម្ពុជាក្រោម ដែលមានមូលដ្ឋានក្នុងសហរដ្ឋអាមេរិក ប្ដេជ្ញាថា នឹងពង្រីកបណ្ដាញខ្មែរកម្ពុជាក្រោមបន្ថែមទៀត ដើម្បីប្រមូលការគាំទ្រ និងបង្រួបបង្រួមគ្នា ឲ្យជួយគិតគូរអំពីជោគវាសនាខ្មែរក្រោម ដែលកំពុងរងការគាបសង្កត់សិទ្ធិសេរីភាពពីសំណាក់រដ្ឋាភិបាលវៀតណាម។
សហព័ន្ធខ្មែរក្រោមកាលពីដើមខែមីនា បានបោះឆ្នោតជ្រើសរើសលោក ថាច់ ខេ ជាតំណាងរបស់ក្រុមខ្មែរក្រោមប្រចាំទីក្រុង ហ្គ្រីនស្បូរូ (Greensboro) នៃរដ្ឋ នស៍ ឃែរូឡាយណា (North Carolina) ជារដ្ឋដែលមានពលរដ្ឋខ្មែរក្រោមប្រមាណ ៥០គ្រួសារកំពុងរស់នៅ។ មន្ត្រីសហព័ន្ធមានបំណងនឹងបង្កើតឲ្យមានសាខាតាមបណ្ដារដ្ឋណាដែលមានខ្មែរកម្ពុជាក្រោម រស់នៅច្រើន។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុកថាច់ បានសម្ដែងសុទិដ្ឋិនិយមថា ការបោះឆ្នោតជ្រើសរើសតំណាងរបស់សហព័ន្ធខ្មែរក្រោមប្រចាំទីក្រុង ហ្គ្រីនស្បូរូ កាលពីចុងសប្ដាហ៍កន្លងទៅនេះ បានសម្រេចតាមឆន្ទៈលទ្ធិប្រជាធិបតេយ្យក្នុងអាណត្តិពីរឆ្នាំម្ដង។
លោក ថាច់ ង៉ុកថាច់៖ «បាទ! លទ្ធផលទីមួយ គឺបានជ្រើសរើសគណៈកម្មការសហព័ន្ធថ្មីនៅទីក្រុងហ្គ្រីនស្បូរូ ដែលវាជាជោគជ័យមួយដែលមានការផ្លាស់ប្តូរ ហើយសប្បាយចិត្តទាំងអស់គ្នា។ គណៈកម្មការចាស់ក៏ទទួលស្គាល់ និងលាលែង ហើយអ្នកធ្វើបន្តហ្នឹង គឺថាជាលទ្ធផលមួយដ៏ល្អ។ លទ្ធផលទីពីរ គឺខ្ញុំបាទបានជម្រាបជូននូវផែនការរបស់សហព័ន្ធឆ្នាំ២០១៤ និងឆ្នាំ២០១៥ និងសេចក្តីសង្ឃឹមដែលសហព័ន្ធធ្វើបាន ហើយលទ្ធផលដែលយើងធ្វើនេះ គឺដើម្បីលើកទឹកចិត្តឲ្យបងប្អូនយើងបានដឹងថា ការតស៊ូនេះបានទទួលលទ្ធផលប្រសើរ»។
សាខារបស់សហព័ន្ធខ្មែរកម្ពុជាក្រោម ក្នុងរដ្ឋ នស៍ ឃែរូឡាយណា មានពីរ គឺនៅទីក្រុងឆាឡុត (Charlotte) និងទីក្រុងហ្គ្រីនស្បូរូ។ ពលរដ្ឋខ្មែរក្រោមក្នុងរដ្ឋនេះ ភាគច្រើនប្រកបរបរអាជីវកម្មខាងផ្នែកកែសម្ផស្ស ភោជនីយដ្ឋាន ហាងកាហ្វេ ឬលក់គ្រឿងទេសជាដើម។
លោក ថាច់ ង៉ុកថាច់ ក៏បានជំរុញឲ្យប្រធានសាខាសហព័ន្ធខ្មែរក្រោមប្រចាំទីក្រុងហ្គ្រីនស្បូរូ (Greensboro) ដែលទើបជាប់ឆ្នោតថ្មី ធ្វើយ៉ាងណាត្រូវបង្កើនការទទួលខុសត្រូវ និងភាពស្មោះត្រង់ក្នុងការងាររបស់ខ្លួន ដើម្បីភាពជោគជ័យទៅថ្ងៃមុខ។
លោក ថាច់ ង៉ុកថាច់៖ «ការបោះឆ្នោតថ្ងៃនេះ គឺខ្ញុំបានផ្ដាំផ្ញើដល់គណៈកម្មការថ្មីឲ្យមានស្មារតីរឹងមាំឡើងថា យើងមានសមត្ថភាព គឺយើងមានសមត្ថភាពតាំងពីយើងមិនដែលស្គាល់ស្រុកអាមេរិក រហូតដល់យើងបាននាំកូននាំចៅមកដល់ស្រុកអាមេរិក ហើយបានរៀនសូត្រ ហើយបានដឹកនាំរហូតដល់បានប្រមែប្រមូលថវិកាទៅសង់វត្ត និងសង់សាលានៅក្នុងស្រុកវិញ បង្ហាញថា យើងមានសមត្ថភាពរួចទៅហើយ»។
ជាមួយគ្នានេះផងដែរ លោក ថាច់ ខេ បានសម្ដែងភាពប្ដេជ្ញាចិត្តរបស់ខ្លួនថា នឹងប្រមូលកម្លាំងគាំទ្ររបស់ខ្មែរក្រោមដើម្បីគិតគូរខ្ពស់ដល់ប្រយោជន៍ជាតិ៖ «ដូច្នេះខ្ញុំត្រូវខិតខំប្រមែប្រមូលបងប្អូនខ្មែរកម្ពុជាក្រោម ដើម្បីជួយជំរុញឲ្យសហព័ន្ធយើងមានដំណើរការទៅមុខដោយរលូន»។
ចំណែកលោក ថាច់ គា ដែលជាអ្នករៀបចំកម្មវិធីបោះឆ្នោតជ្រើសរើសប្រធានសាខាសហព័ន្ធខ្មែរកម្ពុជាក្រោមប្រចាំក្នុងទីក្រុងហ្គ្រីនស្បូរូ នេះដែរ មានប្រសាសន៍ថា លោកមានសេចក្ដីត្រេកអរដែលបានឃើញពលរដ្ឋខ្មែរក្រោមនៅទីនេះចេះដឹកនាំ និងចេះរួបរួមសាមគ្គីគ្នា។
លោក ថាច់ គា៖ «ខ្ញុំមានមោទនភាពយ៉ាងខ្លាំងណាស់ដែលបងប្អូនខ្មែរនៅទីនេះ បានជ្រើសរើសតំណាងថ្មីឈរដោយលោក ថាច់ ខេ ដែលមានការគាំទ្រជាច្រើនពីសំណាក់បងប្អូនក្នុងតំបន់ជាមួយគ្នា។ វាក៏ជាភារកិច្ចមួយដែលអាចដំណើរការតទៅមុខទៀតបាន ហើយគាត់ជាព្រឹទ្ធាចារ្យមួយចាស់ទុំ មានការគោរពរាប់អានពីបងប្អូនខ្មែរយើងនៅទីនេះ»។
ពលរដ្ឋខ្មែរក្រោមក្នុងសហរដ្ឋអាមេរិក មានចំនួនជាង ៣ម៉ឺននាក់ ហើយយ៉ាងហោចណាស់មានសាខារបស់សហព័ន្ធខ្មែរកម្ពុជាក្រោមចំនួន ៣៣ នៅទូទាំងរដ្ឋសហរដ្ឋអាមេរិក។
គោលនយោបាយធំៗរបស់ក្រុមនេះ គឺផ្ដោតជាសំខាន់ទៅលើការទាមទារឲ្យរដ្ឋាភិបាលវៀតណាម ផ្ដល់សិទ្ធិសេរីភាពដល់ពលរដ្ឋខ្មែរក្រោម ដើម្បីមានសិទ្ធិសម្រេចជោគវាសនាដោយខ្លួនឯង និងទាមទារឲ្យមានច្បាប់ស្ដីពីការគោរពសិទ្ធិជនជាតិដើម។
របាយការណ៍ប្រចាំឆ្នាំ២០១៣ របស់សហព័ន្ធខ្មែរកម្ពុជាក្រោមបង្ហាញថា អាជ្ញាធរវៀតណាម បានបង្កើនការរំលោភសិទ្ធិក្នុងជំនឿសាសនា សិទ្ធិទទួលបានការអប់រំ សិទ្ធិក្នុងការជួបប្រជុំ និងសិទ្ធិក្នុងការបញ្ចេញមតិរបស់ពលរដ្ឋខ្មែរក្រោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។