សហព័ន្ធខ្មែរកម្ពុជាក្រោម បានស្នើឲ្យសហរដ្ឋអាមេរិក ធ្វើកិច្ចអន្តរាគមន៍ឲ្យរដ្ឋាភិបាលវៀតណាម ដោះលែងព្រះសង្ឃខ្មែរកម្ពុជាក្រោមពីរអង្គ និងពលរដ្ឋខ្មែរកម្ពុជាក្រោមពីរនាក់ផ្សេងទៀត ដែលកំពុងជាប់ពន្ធនាគារនៅប្រទេសវៀតណាម មុនពេលសហរដ្ឋអាមេរិក ពិចារណាសំណើរបស់ប្រទេសវៀតណាម សុំចូលជាសមាជិកប្រទេសដៃគូពាណិជ្ជកម្មអន្តរ-ប៉ាស៊ីហ្វិក (Trans-Pacific Partnership)។
ប្រធានរដ្ឋបាលសហព័ន្ធខ្មែរកម្ពុជាក្រោម លោក យ៉ាប ត្រឹង កាលពីថ្ងៃអង្គារ ទី២២ មេសា បញ្ជាក់ថា ក្នុងជំនួបមួយនឹងមន្ត្រីជាន់ខ្ពស់ក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីខាងកើត និងអាស៊ី-ប៉ាស៊ីហ្វិក អ្នកស្រី ស៊ូសាន ស្តេវេនសុន (Susan Stevenson) ភាគីខ្មែរកម្ពុជាក្រោម បានស្នើសុំឲ្យសហរដ្ឋអាមេរិក គាបសង្កត់រដ្ឋាភិបាលវៀតណាម ឲ្យគោរពសិទ្ធិមនុស្សខ្មែរកម្ពុជាក្រោម និងដោះលែងអ្នកទោសនយោបាយខ្មែរកម្ពុជាក្រោម ប្រសិនបើប្រទេសនេះចង់ចូលរួមជាប្រទេសដៃគូពាណិជ្ជកម្មអន្តរ-ប៉ាស៊ីហ្វិក។ បច្ចុប្បន្នប្រទេសជាសមាជិកដៃគូពាណិជ្ជកម្មអន្តរ-ប៉ាស៊ីហ្វិក រួមមានប្រទេសប្រ៊ុយណេ (Brunei) ស៊ីលី (Chile) នូវែលហ្សេឡង់ (New Zealand) និងប្រទេសសិង្ហបុរី (Singapore)។
លោក យ៉ាប ត្រឹង បន្តថា ប្រតិភូសហរដ្ឋអាមេរិកនឹងធ្វើដំណើរទៅប្រទេសវៀតណាម ដើម្បីពិនិត្យមើលលក្ខខណ្ឌមួយចំនួនទៅលើសំណើរបស់ប្រទេសវៀតណាម សុំចូលជាសមាជិកប្រទេសកិច្ចព្រមព្រៀងដៃគូពាណិជ្ជកម្មអន្តរ-ប៉ាស៊ីហ្វិក នៅខែឧសភា ខាងមុខ៖ «យើងបង្ខំឲ្យវាដោះលែង ពីព្រោះមនុស្សអត់មានទោស។ ទោសគ្រាន់តែទាក់ទងមកបងប្អូននៅក្រៅ វាចោទថា ទាក់ទងមកសហព័ន្ធ»។
កាលពីឆ្នាំ២០១៣ តុលាការវៀតណាម បានកាត់ទោសព្រះសង្ឃពីរអង្គ និងពលរដ្ឋខ្មែរក្រោមពីរនាក់ផ្សេងទៀត ឲ្យជាប់ពន្ធនាគារពី ១០ខែទៅ ៦ឆ្នាំ ដោយចោទពីបទបំផ្លាញសណ្ដាប់ធ្នាប់សាធារណៈ និងរត់ទៅក្រៅប្រទេសដើម្បីប្រឆាំងរដ្ឋាភិបាលវៀតណាម។ ប៉ុន្តែអង្គការសមាគមខ្មែរកម្ពុជាក្រោម អះអាងថា តុលាការវៀតណាម កាត់ទោសព្រះសង្ឃ និងពលរដ្ឋខ្មែរក្រោមទាំងនោះ ដោយសារតែបាននាំគ្នាតវ៉ាឲ្យមានការសាងសង់សាលារៀនភាសាខ្មែរក្នុងវត្ត។
លោក យ៉ាប ត្រឹង គូសបញ្ជាក់បន្ថែមទៀតថា សហរដ្ឋអាមេរិកក៏ចង់ស្វែងយល់ពីវិស័យសុខាភិបាលនៅប្រទេសវៀតណាម ក្នុងជំនួបនឹងអ្នកស្រី ស៊ូសាន ស្តេវេនសុន នាអំឡុងពេលដំណើរទស្សនកិច្ចរបស់ប្រតិភូសហរដ្ឋអាមេរិក។ សហព័ន្ធខ្មែរកម្ពុជាក្រោម ក៏ស្នើឲ្យសហរដ្ឋអាមេរិក តាមដានពិនិត្យពីវិធានការរបស់រដ្ឋាភិបាលវៀតណាម ជួយដល់ខ្មែរកម្ពុជាក្រោមរាប់ពាន់នាក់ ដែលមានជំងឺពិការភ្នែកដោយមិនដឹងមូលហេតុ។
លោក យ៉ាប ត្រឹង៖ «យើងមានការបារម្ភទីមួយ ចំពោះអ្នកពិការខ្មែរក្រោម។ នៅពេលគេពិការទៅ ជីវិតមិនដឹងជារស់នៅយ៉ាងម្តេច។ រដ្ឋាភិបាលយួនអត់មានកម្មវិធីជួយសម្រាប់ឲ្យរស់»។
របាយការណ៍ស្ដីពីស្ថានភាពសិទ្ធិមនុស្សខ្មែរក្រោម កាលពីឆ្នាំ២០១៣ របស់អង្គការសមាគមខ្មែរកម្ពុជាក្រោម បានបង្ហាញថា ករណីរំលោភសិទ្ធិសេរីភាពលើពលរដ្ឋខ្មែរក្រោមដែលបានប្រព្រឹត្តដោយអាជ្ញាធររដ្ឋាភិបាលវៀតណាម មានប្រមាណ ៣០ករណី។ ក្នុងនោះមានករណីចាប់ផ្សឹកព្រះសង្ឃដោយបង្ខំ ការធ្វើទារុណកម្មលើព្រះសង្ឃ និងពលរដ្ឋខ្មែរក្រោម ការគាបសង្កត់លើសិទ្ធិប្រតិបត្តិវប្បធម៌ និងសាសនា ការបំបិទសិទ្ធិសេរីភាពក្នុងការបញ្ចេញមតិ និងទទួលព័ត៌មានជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។