អាជ្ញាធរ​ខេត្ត​ក្រចេះ​ត្រៀម​កម្លាំង​ចម្រុះ​មួយ​ពាន់​នាក់​ការពារ​ថ្ងៃ​បោះ​ឆ្នោត

អាជ្ញាធរ​ខេត្ត​ក្រចេះ ត្រៀម​កង​កម្លាំង​ចម្រុះ​ប្រមាណ មួយ​ពាន់​នាក់​សម្រាប់​ការពារ​ឧបទ្ទវហេតុ​ណា​មួយ អាច​នឹង​កើត​មាន​នៅ​ថ្ងៃ​បោះ​ឆ្នោត ទី​៣ មិថុនា ខាង​មុខ​នេះ។
ដោយ វិជ័យ អានន្ទ
2012-05-29
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

អភិបាល​ខេត្ត​ក្រចេះ លោក ស ចំរ៉ុង ឲ្យ​ដឹង​នៅ​ថ្ងៃ​ទី​២៩ ឧសភា ថា លោក ត្រៀម​កង​កម្លាំង​ចម្រុះ​ប្រមាណ មួយ​ពាន់​នាក់ ដាក់​ពង្រាយ​គ្រប់​ការិយាល័យ​បោះ​ឆ្នោត​ទាំង ៣៩០​ទូទាំង​ខេត្ត​ក្រចេះ។ លោក​មាន​ប្រសាសន៍​បន្ត​ថា ដើម្បី​ការពារ​សន្តិសុខ​សុវត្ថិភាព​ជូន​ប្រជាពលរដ្ឋ​ដែល​ទៅ​បោះ​ឆ្នោត​នៅ​ថ្ងៃ​បោះ​ឆ្នោត​ខាង​មុខ ក្រៅ​ពី​ដាក់​ពង្រាយ​កង​កម្លាំង​ចម្រុះ​គ្រប់​ការិយាល័យ​ហើយ លោក​នៅ​ត្រៀម​កង​កម្លាំង​ជំនួយ​បន្ថែម​ទៀត។

ទាក់​ទិន​នឹង​ករណី​នេះ​ដែរ ប្រធាន​គណៈកម្មការ​រៀប​ចំ​ការ​បោះ​ឆ្នោត​ខេត្ត​ក្រចេះ (គ.ខ. ប) លោក អ៊ុង ស៊ីយឿន អះ​អាង​ថា អាជ្ញាធរ​ខេត្ត និង​គណៈកម្មការ​សន្តិសុខ​អចិន្ត្រៃយ៍​ខេត្ត សហការ​យ៉ាង​ស្អិតល្មួត​ជាមួយ​គណៈកម្មការ​រៀប​ចំ​ការ​បោះ​ឆ្នោត​តាំង​ពី​ថ្ងៃ​ដំបូង​នៃ​ការ​បើក​យុទ្ធការ​រក​សំឡេង​ឆ្នោត​របស់​គណបក្ស​នយោបាយ​នីមួយៗ​មក​ម្ល៉េះ។ ពុំ​មែន​ទើប​តែ​ចាត់​វិធាន​ការ​ការពារ​ប្រជាពលរដ្ឋ ខណៈ​ដែល​ថ្ងៃ​បោះ​ឆ្នោត​ខិត​ចូល​មក​ដល់​នោះ​ទេ ហើយ​ជា​រៀង​រាល់​ថ្ងៃ​គណៈកម្មការ​សន្តិសុខ​ខេត្ត​តែង​ចេញ​របាយការណ៍​ស្ដី​ពី​ស្ថានភាព​សន្តិសុខ​ទូទៅ​ពាក់​ព័ទ្ធ​នឹង​ការ​រៀប​ចំ​ឲ្យ​មាន​ការ​បោះ​ឆ្នោត​នា​ពេល​ខាង​មុខ​នេះ។

ម្យ៉ាង​វិញ​ទៀត លោក អ៊ុង ស៊ីយឿន ឲ្យ​ដឹង​ថា ក្នុង​នាម​លោក​ជា​ប្រធាន គ.ខ.ប លោក​ពុំ​បាន​ព្រងើយ​កន្តើយ​ចំពោះ​ការ​ខិត​ជិត​ចូល​មក​ដល់​នៃ​ថ្ងៃ​បោះ​ឆ្នោត​នោះ​ឡើយ លោក​បាន​ត្រៀម​ជា​ស្រេច​នូវ​វត្ថុ​សំខាន់ៗ ដែល​មិន​អាច​ខ្វះ​បាន​នៅ​ថ្ងៃ​បោះ​ឆ្នោត និង​បាន​បញ្ជូន​ជា​បណ្ដើរៗ​នូវ​វត្ថុ​ទាំង​នោះ។ វត្ថុ​ដែល​មិន​អាច​ខ្វះ​បាន​នៅ​ថ្ងៃ​បោះ​ឆ្នោត មាន ៥​យ៉ាង គឺ​សន្លឹក​ឆ្នោត បញ្ជី​ឈ្មោះ​ប្រជាពលរដ្ឋ​ដែល​ត្រូវ​បោះ​ឆ្នោត ទឹក​ខ្មៅ​ដែល​មិន​អាច​លុប​ជ្រះ ហិប​ឆ្នោត និង​ត្រា​សំងាត់។ មក​ទល់​ពេល​នេះ ហិប​ឆ្នោត​ត្រូវ​បាន​បញ្ជូន​ដល់​ឃុំ-សង្កាត់ ទាំង ៤៦​រួច​រាល់​ហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល