អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី១៧ មិថុនា បន្តធ្វើសវនាការស្ដាប់ដើមបណ្ដឹងរដ្ឋប្បវេណីមួយរូបពីខេត្តកំពង់ធំ។ ដើមបណ្ដឹងរដ្ឋប្បវេណីឈ្មោះ គង់ សៀក ជាអតីតយុទ្ធនារីនៅក្នុងកងពលលេខ៤៥០ ត្រូវកម្មាភិបាលខ្មែរក្រហមបញ្ជូនទៅធ្វើការនៅការដ្ឋានសង់វាលយន្តហោះ ខេត្តកំពង់ឆ្នាំង ដូចសាក្សីមុនៗដែរ។
ដើមបណ្ដឹងរដ្ឋប្បវេណីឈ្មោះ គង់ សៀក ជម្រាបអង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី១៧ មិថុនា ថា នៅការដ្ឋានសង់វាលយន្តហោះខេត្តកំពង់ឆ្នាំង លោកស្រីបានឃើញពួកខ្មែរក្រហម ធ្វើទារុណកម្មមនុស្សដោយឆក់ខ្សែភ្លើង៖ «ឃើញគេឆក់ខ្សែភ្លើង។ ដែលខ្ញុំឃើញគេឆក់ខ្សែភ្លើងហ្នឹង គឺខ្ញុំព្រលានយន្តហោះ ពេលហ្នឹងខ្ញុំសម្រាកការងារ ខ្ញុំទៅហូបបាយនៅសហករណ៍។ ខ្ញុំតម្រៀបជួរគ្នាទៅហូបបាយ មិត្តយើងកេះប្រាប់ថា នុះ! គេឆក់ខ្សែភ្លើងមិត្តយើងទៀតហើយ។ នៅក្រោមដើមស្វាយ»។
លោកស្រី គង់ សៀក បន្តថា នៅជិតការដ្ឋានវាលយន្តហោះខេត្តកំពង់ឆ្នាំង នោះ លោកស្រីក៏ធ្លាប់បានឃើញពួកសន្តិសុខខ្មែរក្រហមចាប់ស្ត្រី និងកុមារដាក់ដែរ។ លោកស្រីថ្លែងថា នៅទីនោះ គឺជាមន្ទីរសន្តិសុខ។
សាក្សីដែលផ្ដល់សក្ខីកម្មអំពីការដ្ឋានវាលយន្តហោះខេត្តកំពង់ឆ្នាំង រហូតមកដល់ពេលនេះ សុទ្ធតែបានបញ្ជាក់ថា អ្នកដែលកម្មាភិបាលខ្មែរក្រហមបញ្ជូនទៅធ្វើការនៅទីនោះ គឺជាអតីតយុទ្ធជននៅក្នុងជួរកងទ័ព។ ពួកគេ ត្រូវបានបញ្ជូនទៅធ្វើការលត់ដំធ្ងន់ធ្ងរនៅទីនោះ ដោយសារតែជាប់និន្នាការក្បត់នឹងអង្គការចង់ធ្វើរដ្ឋប្រហារ។ ដូចគ្នានេះដែរ ដើមបណ្ដឹងរដ្ឋប្បវេណីឈ្មោះ គង់ សៀក ថ្លែងថា លោកស្រីត្រូវបានគេបញ្ជូនទៅនៅទីនោះនៅឆ្នាំ១៩៧៧ ដោយសារតែមេកងពលក្បត់។ លោកស្រីថា លោកស្រីដឹងពីហេតុផលនេះ គឺនៅពេលបញ្ជូនទៅលត់ដំបណ្ដោះអាសន្ននៅអូរបែកក្អមភ្នំពេញ៖ «ប្រធានកងពលឈ្មោះ អ៊ំ សួង។ ពេលនៅអូរបែកក្អម ប្រធានវរៈប្រជុំប្រាប់ថា មិត្តឯងទាំងអស់គ្នាហ្នឹងសុទ្ធតែជាប់និន្នាការហើយ ពីព្រោះ (មេ) កងពលមិត្តឯងគេចាប់យកទៅដាក់គុកព្រៃសអស់ហើយ។ ឥឡូវនេះមិត្តឯងត្រូវជាប់ឥទ្ធិពលគេ គេក្បត់អស់ហើយ។ ដើមឈើ គឺអាធំដួលហើយ គឺសង្កត់អាក្រោមហើយ។ ដូច្នេះ មិត្តឯងខំប្រឹងប្រែងធ្វើការ។ បើមិនប្រឹងធ្វើការទេ ទោះបីមិត្តឯងអង្គុយបង្ហូរទឹកភ្នែកនឹកម៉ែនឹកឪ នឹកភូមិនឹកស្រុកប៉ុណ្ណា ក៏មិត្តឯងមិនបានជួបម៉ែឪមិត្តឯងដែរ»។
លោកស្រី គង់ សៀក ត្អូញប្រាប់អង្គជំនុំជម្រះអំពីលក្ខខណ្ឌការងារលំបាកនៅខេត្តកំពង់ឆ្នាំង ដែលគេបង្ខំឲ្យជីកប្រឡាយ និងលីស៊ីម៉ងត៍។ លោកស្រីឲ្យដឹងថា ការលីស៊ីម៉ងត៍ទម្ងន់ ៥០គីឡូក្រាម ធ្វើឲ្យលោកស្រីដើរទា ប៉ុន្តែលោកស្រីត្រូវតែខំប្រឹង ព្រោះខ្លាចគេយកទៅសម្លាប់។ ទាំងការងារជីកប្រឡាយ និងការងារលីស៊ីម៉ងត៍ គឺធ្ងន់ធ្ងរដូចគ្នា។ ការរស់នៅទីនោះមិនមានអនាម័យអីទេ ហើយទាំងលោកស្រី និងអ្នកផ្សេងទៀត សុទ្ធតែស្គមគ្មានកម្លាំងកំហែងទេ។
បន្ទាប់ពីដើមបណ្ដឹងរដ្ឋប្បវេណី គង់ សៀក អង្គជំនុំជម្រះបន្តស្ដាប់សាក្សីមួយរូបទៀត គឺលោក សែម ហឿន ហៅ សែម គីម។ លោក ហឿន ជាអតីតយោធិននៅកងពលលេខ៣១០ នៃកងទ័ពខ្មែរក្រហមដែរ។ លោកត្រូវគេចោទថាជាខ្សែក្បត់ ព្រោះគេចាប់មេកងពលរបស់លោកដែរ។ សាក្សី សែម ហឿន មិនទាន់ចប់ទេ ហើយលោកនឹងត្រូវមកផ្ដល់សក្ខីកម្មបន្តនៅថ្ងៃច័ន្ទ ទី២២ មិថុនា ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។