អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៨ កក្កដា បានបញ្ចប់ការស្ដាប់ដើមបណ្ដឹងរដ្ឋប្បវេណីទី១ ទាក់ទងការដ្ឋានការងារដោយបង្ខំនៅអាងត្រពាំងថ្ម ខេត្តបន្ទាយមានជ័យ។ បណ្ដឹងរដ្ឋប្បវេណីទី១ នេះ សុំឲ្យតុលាការដាក់ទោសជនជាប់ចោទធ្ងន់ធ្ងរមួយជីវិត។
ដើមបណ្ដឹងរដ្ឋប្បវេណីទី១ ដែលត្រូវអង្គការខ្មែរក្រហមបង្ខំឲ្យលើកដីធ្វើទំនប់អាងត្រពាំងថ្ម គឺលោក សែន សុផុន នៅព្រឹកថ្ងៃទី២៨ កក្កដា ចង់ឲ្យអង្គជំនុំជម្រះសាលាដំបូង ផ្ដន្ទាទោសជនជាប់ចោទ នួន ជា និង ខៀវ សំផន រហូតមួយជីវិត៖ «រហូតមកដល់សព្វថ្ងៃនេះមានតែការវេទនា ធ្វើបាបមិនថារូបខ្ញុំ ឬបងប្អូនទាំងអស់ប្រទេសកម្ពុជា ទេ គ្មាននរណារួចផុតពីរបបកម្ពុជាប្រជាធិបតេយ្យហ្នឹងទេ។ ការខ្ញុំនិយាយនេះ គឺជាការពិតទាំងអស់ ខ្ញុំធ្លាប់ជួបប្រទះនៅក្នុងហ្នឹងទាំងអស់។ ហេតុដូច្នេះទុក្ខវេទនារបស់ខ្ញុំនេះ ខ្ញុំសុំឲ្យតុលាការវិនិច្ឆ័យឲ្យខ្ញុំចុះ តើទង្វើគាត់ធ្វើនេះសមស្របនឹងប្រជាពលរដ្ឋក្នុងប្រទេសកម្ពុជា និងរូបខ្ញុំដែរឬទេ? ហេតុដូច្នេះ រូបខ្ញុំនេះចង់ឲ្យតុលាការផ្ដន្ទាទោសដាក់គុកគាត់អស់មួយជីវិត»។
ការស្នើសុំតុលាការបែបនេះ គឺបន្ទាប់ពីដើមបណ្ដឹងរដ្ឋប្បវេណី សែន សុផុន ថ្លែងអំពីទុក្ខសោក និងការខូចខាតចំពោះរូបលោក ដែលបង្កឡើងដោយសារពួកខ្មែរក្រហមកុហក និងជម្លៀសចេញពីទីក្រុងភ្នំពេញ នៅខែមេសា ឆ្នាំ១៩៧៥។ លោកត្រូវជម្លៀសទៅព្រែករាំង ស្រុកស្អាង ខេត្តកណ្ដាល ហើយបន្ទាប់មកជម្លៀសបន្តទៀតទៅខេត្តបាត់ដំបង ជាទីដែលលោកបាត់បង់ឪពុកម្ដាយ និងប្អូនៗ។
នៅមុនពេលបញ្ចប់នៃសក្ខីកម្ម លោក សែន សុផុន សួរតាមរយៈអង្គជំនុំជម្រះទៅជនជាប់ចោទថា តើអ្នកណានៅពីក្រោយការបញ្ជាឲ្យជម្លៀសពលរដ្ឋចេញពីទីក្រុងភ្នំពេញ ដោយប្រើហេតុផលកុហកបោកប្រាស់ប្រជាពលរដ្ឋ។
ទាក់ទងនឹងសំណួរចង់ដឹងរបស់ លោក សែន សុផុន នេះ ជនជាប់ចោទ នួន ជា និង ខៀវ សំផន មិនបានឆ្លើយតបទេ។ ការមិនឆ្លើយតបនេះ ប្រធានអង្គជំនុំជម្រះសាលាដំបូង លោកចៅក្រម និល ណុន ថ្លែងថា ដោយសារជនជាប់ចោទរក្សាសិទ្ធិនៅស្ងៀមមិនឆ្លើយតបសំណួរ។ សិទ្ធិនេះ ត្រូវបានជនជាប់ចោទប្រកាសក្នុងសវនាការ នៅថ្ងៃទី៨ ខែមករា។ ពេលណាជនជាប់ចោទចង់ឆ្លើយតបនោះ ជនជាប់ចោទនឹងជូនដំណឹងដល់អង្គជំនុំជម្រះ៖ «ប៉ុន្តែរហូតមកដល់ពេលនេះ អង្គជំនុំជម្រះនៅមិនទាន់បានទទួលដំណឹងពីការផ្លាស់ប្ដូរជំហរ ពីការលះបង់សិទ្ធិក្នុងការនៅស្ងៀមមិនឆ្លើយតប មកជាការយល់ព្រមឆ្លើយតបនឹងសំណួររបស់ចៅក្រមនៃអង្គជម្រះ ឬក៏របស់ភាគីនៅឡើយទេ។ សូមលោកជ្រាប»។
បន្ទាប់ពីដើមបណ្ដឹងរដ្ឋប្បវេណី សែន សុផុន អង្គជំនុំជម្រះបានបន្តស្ដាប់សក្ខីកម្មរបស់សាក្សីមួយរូបទៀតឈ្មោះ ម៉ម សឿម ហៅ ហេង សាមួត។ សាក្សីរូបនេះមកពីភូមិថ្មី ឃុំណាំតៅ ស្រុកភ្នំស្រុក ខេត្តបន្ទាយមានជ័យ។ លោកក៏ត្រូវពួកខ្មែរក្រហមបង្ខំឲ្យលើកដីធ្វើទំនប់នៅអាងត្រពាំងថ្ម ដែរ។ សាក្សី ម៉ម សឿម ជម្រាបអង្គជំនុំជម្រះអំពីលក្ខខណ្ឌរស់នៅលំបាកនៅទីនោះ ព្រមទាំងការរៀបការដោយបង្ខំ និងការចាប់ខ្លួនបាត់ទៅរហូត។
ការផ្ដល់សក្ខីកម្មរបស់សាក្សី ម៉ម សឿម នៅមិនទាន់បញ្ចប់ទេ ហើយនឹងត្រូវមកធ្វើបន្តនៅថ្ងៃទី២៩ កក្កដា ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។