មរណភាពនៃជនជាប់ចោទ អៀង ធីរិទ្ធ នៅព្រឹកថ្ងៃទី២២ សីហា បានធ្វើឲ្យអ្នកតាមដានដំណើរការសាលាក្ដីខ្មែរក្រហម យល់ឃើញថា ជាសញ្ញាមួយដែលសាលាក្ដីនេះគួរពន្លឿននីតិវិធីជំនុំជម្រះរបស់ខ្លួន ជាពិសេសការជំនុំជម្រះលើសំណុំរឿង ០០២ សព្វថ្ងៃនេះ។ ប៉ុន្តែមន្ត្រីសាលាក្ដីបញ្ជាក់ថា ការជំនុំជម្រះសំណុំរឿងនេះ នឹងមិនរាំងស្ទះទេ។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា ថ្លែងនៅថ្ងៃទី២៣ សីហា ថា មរណភាពរបស់ជនជាប់ចោទ អៀង ធីរិទ្ធ នឹងមិនធ្វើឲ្យប៉ះពាល់ដល់ការជំនុំជម្រះលើសំណុំរឿង ០០២ វគ្គ២ ដែលកំពុងដំណើរការសព្វថ្ងៃនេះទេ៖ «ការស្លាប់របស់ លោកស្រី អៀង ធីរិទ្ធ នេះ គឺមិនពាក់ព័ន្ធករណីសំណុំរឿងនេះទេ ដោយសារ លោកស្រី អៀង ធីរិទ្ធ បន្ទាប់ពីត្រូវបានរកឃើញថា គាត់មិនមានសម្បទាគ្រប់គ្រាន់ដើម្បីចូលរួមសវនាការ លោកស្រី អៀង ធីរិទ្ធ ត្រូវបានអង្គជំនុំជម្រះសាលាដំបូង បំបែកចេញពីសំណុំរឿង ០០២ ដោយបំបែកចេញពីជនជាប់ចោទផ្សេងទៀត។ អ៊ីចឹងការស្លាប់របស់ លោកស្រី អៀង ធីរិទ្ធ នេះ គឺមិនធ្វើឲ្យដំណើរការជំនុំជម្រះជនជាប់ចោទ ២រូបទៀត លោក នួន ជា លោក ខៀវ សំផន នោះរអាក់រអួល ឬដំណើរការមិនល្អទេ គឺមិនពាក់ព័ន្ធទេ»។
លោកបញ្ជាក់បន្ថែមថា កាលវិភាគសម្រាប់សវនាការរបស់សាលាដំបូងលើសំណុំរឿងលេខ០០២ វគ្គ២ នៅថ្ងៃច័ន្ទ ទី២៤ សីហា នឹងទៅជាធម្មតា។ សំណុំរឿងនេះមានតែជនជាប់ចោទ ២រូបទេ គឺ នួន ជា និង ខៀវ សំផន។
លោក នេត្រ ភក្ដ្រា មានប្រសាសន៍ទៀតថា រហូតមកដល់ថ្ងៃទី២៣ សីហា សហព្រះរាជអាជ្ញាសាលាក្ដីខ្មែរក្រហម នៅមិនទាន់ទទួលបានព័ត៌មានពេញលេញនៅឡើយទេ ទាក់ទងនឹងមូលហេតុនៃមរណភាពរបស់ជនជាប់ចោទ អៀង ធីរិទ្ធ។ លោកថ្លែងថា សហព្រះរាជអាជ្ញាកំពុងរង់ចាំទទួលព័ត៌មានពីមន្ត្រីជំនាញនៅខេត្តប៉ៃលិន៖ «ក្រុមការងាររបស់សហព្រះរាជអាជ្ញាលោកមិនបានអញ្ជើញទៅធ្វើកោសល្យវិច័យនៅផ្ទះរបស់ លោកស្រី អៀង ធីរិទ្ធ ដែលស្លាប់នោះទេ ដោយសារតែយោងតាមនីតិវិធី គឺយើងមិនចាំបាច់ធ្វើកោសល្យវិច័យទេ ដោយសារតែជនជាប់ចោទ អៀង ធីរិទ្ធ នេះ គាត់មិនស្លាប់ក្នុងការឃុំឃាំង ឬមួយក្នុងមន្ទីរឃុំឃាំងរបស់តុលាការ។ ក៏ប៉ុន្តែតាមយើងទទួលបានព័ត៌មាន គឺខាងមន្ត្រីជំនាញ ក៏ដូចជាព្រះរាជអាជ្ញានៅខេត្តប៉ៃលិន គឺគាត់បានប្រមូលឯកសារព័ត៌មានមួយចំនួន ចងក្រងជាឯកសារ ដើម្បីជម្រាបមកកាន់ព្រះរាជអាជ្ញានៃសាលាក្ដីខ្មែរក្រហម»។
ព័ត៌មានបឋម និងក្រៅផ្លូវការឲ្យដឹងថា ជនជាប់ចោទ អៀង ធីរិទ្ធ ទទួលមរណភាពដោយសារបញ្ហាគាំងបេះដូងបន្ទាប់ពីសន្លប់បាត់ស្មារតី។
ស្របពេលដែលសហព្រះរាជអាជ្ញារង់ចាំអនុវត្តតាមនីតិវិធី និងសេចក្ដីសម្រេចរបស់អង្គជំនុំជម្រះសាលាដំបូង លោក នេត្រ ភក្ដ្រា មានប្រសាសន៍ថា ករណីរបស់ជនជាប់ចោទ អៀង ធីរិទ្ធ អាចនឹងបិទដូចករណីរបស់ លោក អៀង សារី ដែរ៖ «យើងឃើញហើយ ដូចកាលពីពេលកន្លងទៅជាមួយ លោក អៀង សារី ដែលស្លាប់បាត់បង់ជីវិតស្ថិតនៅក្នុងការឃុំឃាំងហ្នឹង គឺបន្ទាប់ពីទទួលបានរបាយការណ៍ពីសហព្រះរាជអាជ្ញាមក គឺអង្គជំនុំជម្រះសាលាដំបូង លោកបានចេញសេចក្ដីសម្រេចរំលត់បណ្ដឹងអាជ្ញាប្រឆាំងគាត់ ក៏ដូចរំលត់បណ្ដឹងរដ្ឋប្បវេណីប្រឆាំងគាត់ដែរ»។
រហូតមកដល់ពេលនេះ ជនជាប់ចោទនៅក្នុងសំណុំរឿង ០០២ នៅសល់តែ ២រូបទេ បន្ទាប់ពីមរណភាពរបស់ជនជាប់ចោទ អៀង សារី និង អៀង ធីរិទ្ធ។ ជនជាប់ចោទដែលនៅរស់ ២រូបទៀត គឺជនជាប់ចោទ នួន ជា និង ខៀវ សំផន កំពុងប្រឈមនឹងការជំនុំជម្រះរបស់សាលាដំបូង ហើយក៏មានវ័យចាស់ជរាដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។