មជ្ឈមណ្ឌលឯកសារកម្ពុជា បានបើកវគ្គបណ្ដុះបណ្ដាលវិធីសាស្ត្រក្នុងការបង្រៀនប្រវត្តិសាស្ត្រកម្ពុជាប្រជាធិបតេយ្យ ដល់គ្រូបង្រៀនថ្នាក់ទី៩ និងថ្នាក់ទី១២ ឲ្យមានមូលដ្ឋានបន្ថែមក្នុងការបង្រៀនសិស្សពីប្រវត្តិសាស្ត្រនៃប្រទេសកម្ពុជា គឺរបបកម្ពុជាប្រជាធិបតេយ្យ ឬខ្មែរក្រហម។
អ្នកនិពន្ធសៀវភៅប្រវត្តិសាស្ត្រកម្ពុជាប្រជាធិបតេយ្យ នៃមជ្ឈមណ្ឌលឯកសារកម្ពុជា លោក ឌី ខាំបូលី មានប្រសាសន៍នៅថ្ងៃទី២២ ខែសីហា ថា វគ្គបណ្ដុះបណ្ដាលរយៈពេល ៦ថ្ងៃ អំពីប្រវត្តិសាស្ត្រ និងវិធីសាស្ត្រនៃការបង្រៀនប្រវត្តិសាស្ត្រកម្ពុជាប្រជាធិបតេយ្យ នៅសាលាគរុកោសល្យវិក្រិតការ ខេត្តតាកែវ ដោយមានលោកគ្រូអ្នកគ្រូចំនួន ១០០នាក់ ពីខេត្តតាកែវ និងខេត្តកំពត។
លោកថា មជ្ឈមណ្ឌលដែលបានផ្ដល់វគ្គបណ្ដុះបណ្ដាលនេះ ក្នុងបំណងជាការរួមចំណែកទប់ស្កាត់កុំឲ្យកើតឡើងវិញនូវអំពើប្រល័យពូជសាសន៍ក្នុងប្រទេសកម្ពុជា ក៏ដូចជានៅក្នុងប្រទេសផ្សេងៗទៀតលើពិភពលោក តាមរយៈការបង្រៀនប្រវត្តិសាស្ត្រកម្ពុជាប្រជាធិបតេយ្យ។ ក្រៅពីនេះ មជ្ឈមណ្ឌលក៏ចង់ចូលរួមចំណែកក្នុងការកសាងសន្តិភាព និងផ្សះផ្សាជាតិនៅក្នុងសង្គមខ្មែរ។
លោក ឌី ខាំបូលី៖ «ដូច្នេះ ការរៀនសូត្រនេះ គឺឆ្លុះបញ្ចាំងទៅវិញនូវប្រវត្តិសាស្ត្រយើង ដែលបង្ហាញឲ្យឃើញថា យើងត្រូវតែទទួលស្គាល់នូវអ្វីដែលបានកើតឡើងនៅប្រទេសយើង។ ហើយអំពើប្រល័យពូជសាសន៍ ជាអំពើមួយដែលមានភាពឃោរឃៅក្ដី វាជាប្រវត្តិសាស្ត្ររបស់យើង ទាមទារឲ្យយើងសិក្សាស្វែងយល់ឲ្យបានច្បាស់ ដើម្បីឲ្យយើងដឹងថា យើងមានអតីតកាលអីខ្លះ ហើយយើងធ្វើអ្វីខ្លះសម្រាប់ពេលបច្ចុប្បន្ន និងពេលអនាគតកាល»។
មន្ត្រីដដែលបានថ្លែងថា កាលពីឆ្នាំ២០០០ បរិមាណនៃការបង្រៀនពីប្រវត្តិសាស្ត្រកម្ពុជាប្រជាធិបតេយ្យមានទំហំតិច។ ហើយការបង្រៀនរបស់លោកគ្រូអ្នកគ្រូមិនទាន់បានឆ្លងកាត់វគ្គបណ្ដុះបណ្ដាលផ្នែកប្រវត្តិសាស្ត្រកម្ពុជាប្រជាធិបតេយ្យ ក៏ដូចវិធីសាស្ត្របង្រៀន ប៉ុន្តែ បានកែប្រែវិញបន្តិចនៅឆ្នាំ២០១១ បន្ទាប់ពីឆ្លងកាត់វគ្គបណ្ដុះបណ្ដាលជាបន្តបន្ទាប់។
គ្រូបង្រៀនមុខវិជ្ជាប្រវត្តិវិទ្យា ថ្នាក់ទី១២ នៃវិទ្យាល័យព្រៃស្វាយ ស្រុកព្រៃកប្បាស ខេត្តតាកែវ លោកគ្រូ ថន ទ្រី បានថ្លែងថា តាមរយៈវគ្គបណ្ដុះបណ្ដាលនេះ អាចជួយឲ្យលោកគ្រូមានមូលដ្ឋានកាន់តែរឹងមាំក្នុងការបង្ហាត់បង្រៀនសិស្ស៖ «ក្រោយបញ្ចប់វគ្គបណ្ដុះបណ្ដាល ខ្ញុំយល់ថា ខ្ញុំទទួលបទពិសោធន៍ជាច្រើនក្នុងការយកទៅបង្រៀនសិស្ស ក៏ដូចជាខ្ញុំទទួលបាននូវវិធីសាស្ត្រប្លែកៗនូវការបង្រៀន ដែលធ្វើឲ្យសិស្សងាយយល់ងាយចាប់បាន ហើយមានចំណង់ចំណូលចិត្តក្នុងការរៀន ក៏ដូចជាធ្វើឲ្យសិស្សហ្នឹងចង់ដឹងចង់យល់អំពីបរិបថប្រវត្តិសាស្ត្រ ដែលប្រទេសកម្ពុជា ធ្លាប់ជួបប្រទះកាលពីពេលកន្លងមក»។
ក្រសួងអប់រំ យុវជន និងកីឡា បានសហការជាមួយមជ្ឈមណ្ឌលឯកសារកម្ពុជា កាលពីឆ្នាំ២០០៨ ហើយដៃគូទាំងពីរនេះ គ្រោងនឹងសហការគ្នា ៤ឆ្នាំបន្តទៀត ដើម្បីអនុវត្តនូវគម្រោងបណ្ដុះបណ្ដាលគ្រូនៅទូទាំងប្រទេស អំពីប្រវត្តិសាស្ត្រខ្មែរក្រហម និងវិធីសាស្ត្របង្រៀននេះ។ កន្លងមក ក្រសួងអប់រំ បានកែប្រែសៀវភៅសិក្សាសង្គម ថ្នាក់ទី៩ និងថ្នាក់ទី១២ ដើម្បីដាក់បញ្ចូលនូវខ្លឹមសារប្រវត្តិសាស្ត្រកម្ពុជាប្រជាធិបតេយ្យ។ ចំណែកសៀវភៅមុខវិជ្ជាសីលធម៌ពលរដ្ឋ និងសៀវភៅភាសាខ្មែរ ក៏មានបញ្ចូលខ្លឹមសារនេះខ្លះដែរ។ គ្រូបង្រៀនមុខវិជ្ជាប្រវត្តិវិទ្យាទូទាំងប្រទេសកម្ពុជា មានប្រមាណ ១ម៉ឺននាក់ ប៉ុន្តែមានគ្រូជាង ២ពាន់នាក់ប៉ុណ្ណោះ ដែលទទួលវគ្គបណ្ដុះបណ្ដាលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។