អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃពុធ ទី១៩ សីហា បានបញ្ចប់ការស្ដាប់សក្ខីកម្មរបស់សាក្សីឈ្មោះ ឈុំ សេង ហើយចាប់ផ្ដើមស្ដាប់សក្ខីកម្មសាក្សីទី៧ ទាក់ទងនឹងអង្គហេតុការដ្ឋានធ្វើទំនប់អាងត្រពាំងថ្ម ខេត្តបន្ទាយមានជ័យ ដដែល។ សាក្សីទី៧ ឈ្មោះ តក់ ប៊ុយ អតីតជាប្រធានកងតូចនៃពលករកងចល័តនៅការដ្ឋាននោះ។
សាក្សី តក់ ប៊ុយ អះអាងចំពោះមុខអង្គជំនុំជម្រះសាលាដំបូងថា លោកបានឃើញសាកសពរបស់ពលករកងចល័តជាច្រើន នៅពេលដែលលោកលើកដីនៅការដ្ឋានធ្វើទំនប់អាងត្រពាំងថ្ម៖ «រឿងសាកសពចល័តនោះមាន ដូច្នេះនៅខ្នងទំនប់អាងក៏មានសាកសព នៅខាងក្រោមអាងក៏មាន នៅក្នុងអាងលើអាងនោះក៏មានសាកសព គេកាប់សម្លាប់ ដោយជីកមួយចបទៅគេកប់ចោលនៅពេលយប់ ដោយយើងអត់ដឹងថា គេមានទោសកំហុសអីទេ ស្រាប់តែបាត់ខ្លួន។ គេសម្លាប់ចោល ដល់ពេលយើងរែកដីទៅលើទំនប់ទៅ ឃើញល្អេកល្អោកៗ គឺសន្និដ្ឋានថា គេវាយចោលយប់មិញហើយ។ បើនិយាយទៅថារាប់មិនអស់ទេ។ ច្រើនទាំងក្រោមអាងកណ្ដាលវាល ហើយនិងក្នុងអាងក៏មាន។ តា វ៉ាល់ កាចសាហាវ ហើយការកាប់សម្លាប់នៅការដ្ឋានអាងត្រពាំងថ្ម គឺមានតែ តា វ៉ាល់ ជាមេឃាតក»។
ទោះជាបែបនេះក្ដី លោកមានប្រសាសន៍នៅក្នុងសវនាការថា លោកមិនដែលឃើញពួកខ្មែរក្រហមសម្លាប់មនុស្សដោយផ្ទាល់ទេ។ លោកបញ្ជាក់ថា មិនមានពលករកងចល័តណាម្នាក់បាត់ខ្លួនទេ នៅក្នុងកងរបស់លោក។ ប៉ុន្តែលោកឲ្យដឹងថា មនុស្សខ្លះក្រៅកងរបស់លោក បានបាត់ខ្លួនរហូត បន្ទាប់ពីគេដកពីអង្គភាពមួយទៅអង្គភាពមួយ ឬពីកន្លែងធ្វើការមួយ ទៅកន្លែងមួយទៀត។
ករណីផ្លាស់មនុស្សបែបនេះ ត្រូវបានសាក្សី តក់ ប៊ុយ ថ្លែងថា បានកើតឡើងនៅឯសហករណ៍របស់លោក គឺនៅពេលដែលគេប្រមូលជនជាតិចិន និងវៀតណាម៖ «គេចាប់ជនជាតិចិន និងវៀតណាម ទាំងប្រពន្ធ និងកូន។ ប្ដីគេចាប់ទៅមុន ប៉ុន្តែក្រោយមកបានគេប្រមូលប្រពន្ធ និងកូន។ គេថា ផ្លាស់ទីលំនៅពីកន្លែងមួយទៅកន្លែងមួយ។ មិនដឹងគេយកទៅកន្លែងណា ស្រាប់តែបាត់ខ្លួនតែម្ដង។ ដូចនេះ បានជាសន្និដ្ឋានថា ប្រហែលជាយកទៅសម្លាប់ចោល។ គេដឹកជញ្ជូនទៅដោយឡានអាមេរិកាំង»។
លោក តក់ ប៊ុយ ថ្លែងថា ការកាប់សម្លាប់ពលករកងចល័តនោះ គឺកើតឡើងនៅក្នុងអំឡុងពេលនៃការគ្រប់គ្រងរបស់កម្មាភិបាលភូមិភាគពាយ័ព្យ ឈ្មោះ តា វ៉ាល់។ តា វ៉ាល់ ត្រូវបានសាក្សីជាអតីតប្រធានកងធំមួយរូប ឈ្មោះ ឈុំ សេង អះអាងថា ជាអ្នកបញ្ជាឲ្យសម្លាប់ពលករកងចល័ត ១១នាក់ ដែលមិនទៅរែកដីធ្វើទំនប់។
លោក តក់ ប៊ុយ ជាដើមបណ្ដឹងរដ្ឋប្បវេណីមួយរូបនៅក្នុងសំណុំរឿង០០៤ ដែលទាក់ទងនឹងការកាប់សម្លាប់នៅតំបន់ ៥ ក្នុងខេត្តបន្ទាយមានជ័យ ក្រោមការគ្រប់គ្រងរបស់កម្មាភិបាលភូមិភាគនិរតី។ ប៉ុន្តែតាមការស្នើសុំរបស់មេធាវីដើមបណ្ដឹងរដ្ឋប្បវេណី លោក តក់ ប៊ុយ ត្រូវបានសាលាដំបូងកោះហៅមកជាសាក្សីនៅក្នុងសំណុំរឿង០០២ វគ្គ២ នេះ។
សាក្សី តក់ ប៊ុយ នឹងមកផ្ដល់សក្ខីកម្មបន្តទៀត នៅព្រឹកថ្ងៃព្រហស្បតិ៍ ទី២០ សីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។