អង្គជំនុំជម្រះវិសាមញ្ញក្នុងតុលាការកម្ពុជា ឬហៅកាត់ថា សាលាក្តីខ្មែរក្រហមកំពុងមានបញ្ហា ដោយសារមេធាវីការពារជនជាប់ចោទបន្តធ្វើពហិការមិនចូលការពារ។ មកទល់ពេលនេះ ដំណោះស្រាយចំពោះបញ្ហាជាប់គាំងនេះ ក៏មិនទាន់មានដែរ។
អ្នកនាំពាក្យសាលាក្តីខ្មែរក្រហម អះអាងឡើងវិញនៅថ្ងៃទី២២ តុលា ថា ដំណើរការសវនាការសំណុំរឿង០០២ វគ្គ២ មកទល់ពេលនេះ មិនទាន់កំណត់ពេលវេលាច្បាស់លាស់ថា អាចធ្វើនៅពេលណាបានទេ ដោយសារគ្មានមេធាវីការពារជនជាប់ចោទ នួន ជា និង ខៀវ សំផន។
សាលាក្តីខ្មែរក្រហម មានគម្រោងបើកសវនាការលើភស្តុតាងសំណុំរឿង០០២ វគ្គ២ នៅថ្ងៃទី២៧ តុលា ខាងមុខ ប៉ុន្តែបើសិនជាមេធាវីការពារជនជាប់ចោទទាំងពីរក្រុមមិនចូលរួមទេ សវនាការនោះក៏មិនអាចធ្វើទៅបានដែរ។ កាលពីថ្ងៃទី២១ តុលា សាលាក្តីខ្មែរក្រហម បរាជ័យម្តងហើយក្នុងពេលប្រជុំស្ដីពីបញ្ហាគ្រប់គ្រងតុលាការ ដោយសារមេធាវីការពារជនជាប់ចោទទាំងពីរក្រុមមិនចូលរួម។
អ្នកនាំពាក្យសាលាក្តីខ្មែរក្រហម លោក នេត្រ ភក្ដ្រា មានប្រសាសន៍ថា តាមនីតិវិធីសាលាក្តីខ្មែរក្រហម បើគ្មានមេធាវីការពារជនជាប់ចោទទេ គឺមិនអាចបើកសវនាការបានទេ ហើយចំពោះការរៀបចំក្រុមមេធាវីជំនួស ឬបម្រុងនោះ ក៏មិនទាន់អាចធ្វើទៅបានដែរ។
កាលពីថ្ងៃទី១៧ តុលា មេធាវីការពារជនជាប់ចោទទាំងពីរក្រុម ដឹកនាំដោយ លោកមេធាវី គង់ សំអុន និងលោកមេធាវី សុន អារុណ បាននាំគ្នាចាកចេញពីបន្ទប់សវនាការនៃសាលាក្តីខ្មែរក្រហម ដោយបានប្រកាសធ្វើពហិការ។ ក្រុមលោកមេធាវី គង់ សំអុន ត្រូវការពេលវេលា ៣ខែ ដើម្បីរៀបចំសារណាបណ្ដឹងសារទុក្ខការពារកូនក្តី។ លោកមេធាវីតវ៉ាថា ពួកលោកមិនអាចចូលរួមធ្វើការការពារកូនក្តីក្នុងសំណុំរឿង០០២ វគ្គ២ ផង និងធ្វើសារណាប្ដឹងសារទុក្ខការពារកូនក្តីផងក្នុងពេលតែមួយបានទេ។ ចំណែកក្រុមមេធាវីការពារ លោក នួន ជា វិញ បានធ្វើពហិការ ដោយសារជនជាប់ចោទ នួន ជា តវ៉ាធ្វើបណ្ដឹងដិតចិត្តចំពោះចៅក្រមដែលកាត់ទោសរូបលោក។
ទាក់ទងការធ្វើពហិការមិនចូលរួមដំណើរការសវនាការសំណុំរឿង០០២ វគ្គ២ នេះ លោកមេធាវី គង់ សំអុន មានប្រសាសន៍នៅថ្ងៃទី២២ តុលា ថា ជំហរក្រុមលោកនៅដដែល គឺពហិការដើម្បីយកពេលវេលាទៅធ្វើសារណាបណ្ដឹងសារទុក្ខការពារកូនក្តី៖ «រឿងនេះមិនមែនជាការទទួលខុសត្រូវរបស់ក្រុមមេធាវីយើងទេ ព្រោះដំណើរការកាត់ក្តីនេះវាជាការទទួលខុសត្រូវរបស់អង្គជំនុំជម្រះ។ បើសិនជាអង្គជំនុំជម្រះពិនិត្យទៅលើការការពារជនជាប់ចោទនៅក្នុងនីតិវិធី ដែលឋិតនៅក្រោមយុត្តាធិការរបស់ខ្លួន អាហ្នឹងលោកមិនគួរបន្តសវនាការទេ ពីព្រោះថា លោក ខៀវ សំផន ក្តី លោក នួន ជា ក្តី គាត់គ្មានមេធាវីការពារក្តីចំពោះមុខចៅក្រមទាំងអស់នោះទេ។ អ៊ីចឹងបើអស់លោកយល់ លោកមិនអាចបន្តជំនុំជម្រះដោយគ្មានមេធាវីបានទេ»។
ចំពោះលទ្ធភាពឲ្យសាលាក្តីរៀបចំក្រុមមេធាវីជំនួសពួកលោកនោះ លោកមេធាវី គង់ សំអុន បញ្ជាក់ថា រឿងនេះអាស្រ័យលើការយល់ព្រមរបស់ជនជាប់ចោទផងដែរ។ លោកមេធាវីឲ្យដឹងថា ក្រុមលោកគ្មានបំណងធ្វើឲ្យសាលាក្តីរាំងស្ទះទេ៖ «និយាយទៅជិតមួយឆ្នាំមុន ដែលយើងបានស្នើសុំឲ្យរដ្ឋបាលតុលាការបន្ថែមធនធាន ឲ្យក្រុមមេធាវីរបស់យើង ដើម្បីអាចធ្វើការបានទាំងពីរ ទាំងបណ្ដឹងសារទុក្ខ ទាំងចូលរួមសវនាការ។ តុលាការបានសម្រេចថា ឲ្យសវនាការនៅស្របគ្នា។ ក៏ប៉ុន្តែខាងរដ្ឋបាលមិនបដិសេធក៏ដូចជាបដិសេធដែរ ព្រោះយើងដាក់មួយឆ្នាំមកហើយ តែមិនឆ្លើយតបសំណើយើង»។
សំណុំរឿង០០២ វគ្គ២ គឺជាការជំនុំជម្រះក្តីទី២ ប្រឆាំង នួន ជា និង ខៀវ សំផន។ បទចោទនៅក្នុងសំណុំរឿង០០២ វគ្គ២ រួមមាន បទប្រល័យពូជសាសន៍ចំពោះជនជាតិចាម និងវៀតណាម ការរៀបការដោយបង្ខំ និងរំលោភសេពសន្ថវៈ ការបោសសម្អាតផ្ទៃក្នុង ការប្រព្រឹត្តចំពោះពុទ្ធសាសនិកជន និងការប្រព្រឹត្តជាក់លាក់លើអ្នករដ្ឋការនៃរបបសាធារណរដ្ឋខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។