អង្គភាពផ្នែកកិច្ចការសាធារណៈនៃសាលាក្ដីខ្មែរក្រហម ប្រកាសថា តុលាការកំពូលនឹងធ្វើសវនាការលើបណ្ដឹងសាទុក្ខក្នុងសំណុំរឿងលេខ០០២ វគ្គ១ តាមកាលកំណត់នៅថ្ងៃទី២ កក្កដា។ បណ្ដឹងសាទុក្ខនេះ ធ្វើឡើងដោយជនជាប់ចោទ នួន ជា និង ខៀវ សំផន។
បណ្ដឹងសាទុក្ខដែលអង្គជំនុំជម្រះតុលាការកំពូលនៃសាលាក្ដីខ្មែរក្រហម នឹងចាប់ផ្ដើមធ្វើសវនាការនៅថ្ងៃទី២ កក្កដា គឺជាការមិនសុខចិត្តរបស់ជនជាប់ចោទ នួន ជា និង ខៀវ សំផន ដែលជំទាស់នឹងសាលក្រមអង្គជំនុំជម្រះសាលាដំបូង កាលពីថ្ងៃទី៧ ខែសីហា ឆ្នាំ២០១៤។
កាលពីខែសីហា ឆ្នាំ២០១៤ អង្គជំនុំជម្រះសាលាដំបូង សម្រេចដាក់គុកជនជាប់ចោទទាំងពីរអស់មួយជីវិត ដោយសារតែអង្គជំនុំជម្រះរកឃើញថា ជនជាប់ចោទ នួន ជា និង ខៀវ សំផន មានកំហុសចំពោះឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងការជម្លៀសប្រជាជនដោយបង្ខំ ទាំងដំណាក់កាលទីមួយ និងទីពីរ និងការសម្លាប់អតីតមន្ត្រីរដ្ឋការនៃរបបសាធារណរដ្ឋខ្មែរ នៅទួលពោធិ៍ជ្រៃ ក្នុងស្រុកកណ្ដៀង ខេត្តពោធិ៍សាត់។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា បញ្ជាក់នៅថ្ងៃទី១ កក្កដា ថា សវនាការនៅថ្ងៃទី២ ដល់ថ្ងៃទី៦ កក្កដា អង្គជំនុំជម្រះតុលាការកំពូល នឹងមិនទាន់ដេញដោលលើខ្លឹមសារសារណាបណ្ដឹងសាទុក្ខរបស់ភាគីជនជាប់ចោទទេ៖ «សវនាការលើបណ្ដឹងសាទុក្ខលើកទីមួយនេះ គឺអង្គជំនុំជម្រះរបស់តុលាការកំពូល នឹងស្ដាប់ការផ្ដល់សក្ខីកម្មសាក្សីចំនួន ៣រូប ដែលសាក្សីទាំង ៣រូបនេះមានការជាប់ពាក់ព័ន្ធជាមួយនឹងអង្គហេតុនៅក្នុងបណ្ដឹងសាទុក្ខ ពាក់ព័ន្ធនឹងទីតាំងឧក្រិដ្ឋកម្មទួលពោធិ៍ជ្រៃ ហើយសុំបញ្ជាក់ថា លោក នួន ជា និងលោក ខៀវ សំផន បានប្ដឹងសាទុក្ខជំទាស់ទៅនឹងសាលក្រមហ្នឹង ដោយបានលើកឡើងនូវទឡ្ហីករណ៍ចំនួនប្រមាណ ៣៧០ទឡ្ហីករណ៍នៅក្នុងបណ្ដឹងសាទុក្ខរបស់ខ្លួន ទៅកាន់អង្គជំនុំជម្រះរបស់តុលាការកំពូល»។
ទឡ្ហីករណ៍ចំនួនជាង ៣៧០ ដែលជនជាប់ចោទ នួន ជា និង ខៀវ សំផន បានប្ដឹងសាទុក្ខនោះ គឺជំទាស់ទាំងអង្គហេតុ និងអង្គច្បាប់នៅក្នុងសាលក្រម។ រីឯភាគីសហព្រះរាជអាជ្ញា មិនបានប្ដឹងសាទុក្ខលើអង្គហេតុនោះទេ គឺស្នើសុំឲ្យតែអង្គជំនុំជម្រះតុលាការកំពូល ដោះស្រាយលើភាពអាចអនុវត្តបាននូវទម្រង់ពង្រីកបន្ថែម នៃសហឧក្រិដ្ឋកម្មរួម ដែលគេហៅថា សហឧក្រិដ្ឋកម្មរួមទម្រង់ទី៣។
លោក នេត្រ ភក្ដ្រា មានប្រសាសន៍ទៀតថា ដោយសារភាពស្មុគស្មាញនៃបណ្ដឹងសាទុក្ខ និងនីតិវិធីជាតម្រូវការខាងភាសារបស់តុលាការ ដែលត្រូវបកប្រែជាបីភាសា គឺភាសាខ្មែរ បារាំង និងអង់គ្លេស។ តុលាការកំពូល មិនទាន់អាចកំណត់ពេលវេលាជាក់លាក់សម្រាប់ចេញសេចក្ដីសម្រេចរបស់ខ្លួនទេ៖ «គឺវាពិតជាមានការពិបាកនៅក្នុងការកំណត់ពេលវេលាឲ្យច្បាស់លាស់ថា តើនៅពេលណាទើបសេចក្ដីសម្រេចលើបណ្ដឹងសាទុក្ខហ្នឹង ត្រូវប្រកាសឡើង។ ក៏ប៉ុន្តែ អង្គជំនុំជម្រះតុលាការកំពូល បាន និងកំពុងតែធ្វើការ ដោយបានកំណត់គោលដៅនៃការប្រកាសសាលដីកាបណ្ដឹងសាទុក្ខ នៅក្នុងអំឡុងត្រីមាសទីមួយនៅក្នុងឆ្នាំ២០១៦ ខាងមុខ»។
សវនាការនៃអង្គជំនុំជម្រះតុលាការកំពូល លើបណ្ដឹងសាទុក្ខនៅថ្ងៃទី២ ទី៣ និងថ្ងៃទី៦ កក្កដា គឺជាសវនាការលើបណ្ដឹងសាទុក្ខលើកទីមួយក្នុងសំណុំរឿង០០២ វគ្គទី១។ អង្គជំនុំជម្រះ នឹងធ្វើសវនាការបន្តនៅថ្ងៃអង្គារ ទី៧ កក្កដា ទៀត ប្រសិនបើអង្គជំនុំជម្រះត្រូវការពេលវេលាបន្ថែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។