អង្គជំនុំជម្រះសាលាដំបូងនៃសាលាក្ដីខ្មែរក្រហម ផ្អាកសវនាការជាបណ្ដោះអាសន្ននៅពេលរសៀលថ្ងៃទី១៩ មីនា ដោយសារតែសាក្សីមានបញ្ហាសុខភាព។ ការផ្អាកនេះ គឺបន្ទាប់ពីបានបញ្ចប់ការស្ដាប់សក្ខីកម្មរបស់សាក្សីឈ្មោះ រៀល សន អតីតអនុប្រធានមន្ទីរពេទ្យរបបខ្មែរក្រហម នៅស្រុកត្រាំកក់ ខេត្តតាកែវ ហើយគ្មានសាក្សីផ្សេងទៀតនៅឡើយ។
អង្គជំនុំជម្រះសាលាដំបូងនៃសាលាក្ដីខ្មែរក្រហម បង្ហាញនៅព្រឹកថ្ងៃទី១៩ មីនា ថា ខ្លួនកំពុងប្រឈមនឹងបញ្ហាក្នុងការរៀបចំកាលវិភាគសវនាការបន្តបន្ទាប់ទៅមុខទៀត ទើបសម្រេចផ្អាកសវនាការ។
ប្រធានអង្គជំនុំជម្រះសាលាដំបូង លោកចៅក្រម និល ណុន ជម្រាបភាគីពាក់ព័ន្ធថា ការសម្រេចផ្អាកសវនាការនៅពេលរសៀល គឺដើម្បីប្រជុំដោះស្រាយបញ្ហាកំពុងប្រឈម ដែលមានជាអាទិ៍ ការដាក់បន្ថែមឯកសារថ្មីៗរាប់ពាន់ទំព័រ និងសាក្សីវ័យចាស់មានបញ្ហាសុខភាព៖ «ដោយមានបញ្ហាផ្លាស់ប្ដូរកាលបរិច្ឆេទសវនាការ មូលហេតុដោយសារសាក្សីបម្រុងដែលយើងបានកោះអញ្ជើញមកថ្ងៃនេះ គាត់មានបញ្ហាសុខភាពធ្ងន់ធ្ងរ មិនអាចធ្វើសវនាការបាន។ ដូច្នេះ នៅក្នុងសប្ដាហ៍ក្រោយនេះ អង្គជម្រះនឹងពិនិត្យលទ្ធភាពដើម្បីកោះហៅបុគ្គលដទៃផ្សេងទៀតមកផ្ដល់សក្ខីកម្ម នៅថ្ងៃច័ន្ទ សប្ដាហ៍ក្រោយនេះ»។
ថ្មីៗនេះ សហព្រះរាជអាជ្ញាដាក់ឯកសារស្ដាប់ចម្លើយបន្ថែមទៀតចំនួន ២.៣០០ទំព័រជាភាសាខ្មែរ និង ២.៥០០ទំព័រជាភាសាអង់គ្លេស សម្រាប់ឲ្យភាគីនៅក្នុងរឿងក្ដីពិនិត្យ។ ខាងមេធាវីការពារក្ដីជនជាប់ចោទបញ្ជាក់ថា ភាគីខ្លួនមិនអាចពិនិត្យឯកសារដ៏ច្រើននេះឲ្យទាន់សម្រាប់សវនាការថ្ងៃច័ន្ទ សប្ដាហ៍ក្រោយបានទេ។
ទន្ទឹមគ្នានឹងការដាក់ឯកសារថ្មី ហើយមិនទាន់មានសាក្សីថ្មី អង្គជំនុំជម្រះកត់សម្គាល់បន្ថែមទៀតថា អង្គជំនុំជម្រះក៏មានបំណងកែប្រែលំដាប់លំដោយអង្គហេតុស្ដីពីការដ្ឋានការងារដែរ។ អង្គជំនុំជម្រះ នឹងពន្យារពេលធ្វើសវនាការទៅលើអង្គហេតុការដ្ឋានទំនប់ត្រពាំងថ្ម ដោយសារជាប់ពាក់ព័ន្ធទៅនឹងកំណត់ស្ដាប់ចម្លើយថ្មីៗមួយចំនួន។ ការពន្យារពេលនេះ គឺរហូតដល់ការស្ដាប់សក្ខីកម្មពាក់ព័ន្ធនឹងអង្គហេតុស្ដីពីព្រលានយន្តហោះកំពង់ឆ្នាំង ចប់៖ «ដោយផ្អែកទៅលើការពិចារណាទាំងនេះ អង្គជម្រះសម្រេចផ្អាកសវនាការ ដែលគ្រោងធ្វើនៅថ្ងៃទី៦ រហូតដល់ថ្ងៃទី៩ ខែមេសា ហើយនឹងចាប់ផ្ដើមធ្វើសវនាការឡើងវិញបន្ទាប់ពីការឈប់សម្រាកចូលឆ្នាំខ្មែរ គឺនៅថ្ងៃទី២១ ខែមេសា ដើម្បីស្ដាប់សក្ខីកម្មរបស់សាក្សីបន្ទាប់ទៀត។ អង្គជម្រះយល់ឃើញថា ការផ្អាកសវនាការនេះ នឹងផ្ដល់ឱកាសឲ្យមេធាវីការពារក្ដី និងមេធាវីតំណាងដើមបណ្ដឹងរដ្ឋប្បវេណី មានពេលវេលាគ្រប់គ្រាន់ ដើម្បីពិនិត្យមើលឯកសារ ដែលបានដាក់បង្ហាញទាំងនេះ»។
បន្ទាប់ពីកិច្ចប្រជុំផ្ទៃក្នុងរួច អង្គជំនុំជម្រះនឹងផ្ដល់ដំណឹងដល់ភាគីនានាក្នុងរឿងក្ដី នៅថ្ងៃទី២០ មីនា ស្ដីអំពីសាក្សី ឬបុគ្គលដែលអង្គជម្រះសម្រេចកោះហៅមកផ្ដល់សក្ខីកម្មនៅថ្ងៃច័ន្ទ ទី២៣ មីនា សប្ដាហ៍ក្រោយ។
ទោះជាមិនទាន់បញ្ជាក់ឲ្យប្រាកដថា នឹងស្ដាប់សាក្សីណាមួយក្ដី ក៏អង្គជំនុំជម្រះកំណត់ថា នឹងធ្វើសវនាការបន្តទៀតនៅព្រឹកថ្ងៃច័ន្ទ ទី២៣ មីនា នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។