អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៥ មីនា ស្ដាប់ការសួរដេញដោលសាក្សី សយ សែន បញ្ជាក់ឡើងវិញ ដែលបានផ្ដល់សក្ខីកម្មចោទឆ្មាំគុកក្រាំងតាចាន់ ២នាក់ គឺឈ្មោះ ឌុច និង សាំង ថាបានរំលោភ និងសម្លាប់អ្នកទោសស្ត្រី ២រូប។
មកដល់ពេលនេះ មិនមានអតីតឆ្មាំគុកណាមួយទទួលយកសក្ខីកម្មចោទប្រកាន់របស់សាក្សី សយ សែន ទេ។ នៅថ្ងៃដដែល អតីតឆ្មាំគុកក្រាំងតាចាន់ សូត្រ សាំង បានច្រានចោលរាល់ការចោទប្រកាន់នោះ៖ «ជាថ្មីម្ដងទៀត តើជាការត្រឹមត្រូវទេក្នុងការនិយាយថា លោក ហើយនិង ឌុច តូច នេះ បានប្រព្រឹត្តការរំលោភបំពានផ្លូវភេទទៅលើស្ត្រី ដោយញាត់ក្បាលគ្រាប់កាំភ្លើង សែវិនធីណៃ (M-79) ចូលក្នុងប្រដាប់ភេទរបស់គាត់? ឆ្លើយ៖ បាទ! គឺចម្លើយនេះមិនពិតទេបាទ! ឥឡូវខ្ញុំចូលទៅសំណួរតែម្ដងលោកដើមបណ្ដឹងរដ្ឋប្បវេណី តើលោកយល់ស្របជាមួយអ្នកយាមទាំងអស់ហ្នឹងទេ គឺសៀង ស៊ីម ឌុច តូច វ៉ាន់ សឿន ដែលគាត់និយាយថា គាត់មិនមានតួនាទីអ្វីទេ ក្នុងពេលសួរចម្លើយក្នុងពេលសម្លាប់មនុស្សនោះ ពីព្រោះថា ពួកគាត់ទាំងអស់នោះយាមតែនៅខាងក្រៅទេ។ តើលោកមានចម្លើយតបយ៉ាងណាទៅនឹងចម្លើយពួកគាត់ទាំងអស់នេះ? ឆ្លើយ៖ ចម្លើយគឺមិនពិតប្រាកដទេ ពួកគាត់និយាយ។ គឺគាត់ហ្នឹងហើយជាអ្នកចាប់អ្នកចងអ្នកសម្លាប់។ ចៀសវាង វ៉ាន់ សឿន មួយខ្ញុំអត់ស្គាល់ទេ។ ពីមុនអត់មានឈ្មោះ វ៉ាន់ សឿន ទេ។ នៅកន្លែងនោះអត់មានទេ»។
ការចោទប្រកាន់ និងការបដិសេធ បានធ្វើឲ្យអង្គជំនុំជម្រះជួបបរិយាកាសលំបាកខ្លះក្នុងសវនាការ រហូតធ្វើឲ្យភាគីខ្លះទាមទារអ្នកទាំងពីរមកផ្ដល់សក្ខីកម្មតទល់មុខគ្នាទៀតផង។ ប៉ុន្តែអង្គជំនុំជម្រះមិនទាន់ថាយ៉ាងណានៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។