សាលាក្ដីខ្មែរក្រហម ចេញសេចក្ដីប្រកាសជូនដំណឹងដល់សាធារណជន អំពីនីតិវិធីសម្រាប់ការចូលរួមការប្រកាសសាលក្រមប្រឆាំងជនជាប់ចោទ នួន ជា និង ខៀវ សំផន ក្នុងសំណុំរឿងលេខ០០២ វគ្គ១ នៅខែសីហា ខាងមុខនេះ។
សេចក្ដីប្រកាសព័ត៌មាន នៅថ្ងៃទី៥ មិថុនា បញ្ជាក់ថា សវនាការប្រកាសសាលក្រមប្រឆាំងជនជាប់ចោទ នួន ជា និង ខៀវ សំផន ដែលនឹងត្រូវធ្វើនៅម៉ោង ៩ព្រឹកថ្ងៃព្រហស្បតិ៍ ទី៧ ខែសីហា ខាងមុខនេះ សាលាក្ដីខ្មែរក្រហមត្រៀមទុកកន្លែងអង្គុយដោយឡែកៗពីគ្នា។ ក្នុងនោះ កន្លែងអង្គុយចំនួន ២២០កន្លែង ត្រៀមទុកសម្រាប់ដើមបណ្ដឹងរដ្ឋប្បវេណី និងតំណាងផ្លូវច្បាប់។ ៥០កន្លែងទៀត ត្រៀមសម្រាប់តំណាងរាជរដ្ឋាភិបាល ភ្ញៀវទូត និងអ្នកស្រាវជ្រាវ តំណាងអង្គការមិនមែនរដ្ឋាភិបាល ចំនួន ៤០កន្លែង តំណាងសារព័ត៌មាន ២០កន្លែង និងកន្លែងអង្គុយ ៥០កន្លែងទៀត ទុកសម្រាប់សាធារណជន។
សេចក្ដីប្រកាសព័ត៌មាន បញ្ជាក់ទៀតថា តំណាងរាជរដ្ឋាភិបាល ភ្ញៀវទូត អ្នកស្រាវជ្រាវ តំណាងអង្គការមិនមែនរដ្ឋាភិបាល និងតំណាងអ្នកសារព័ត៌មាន ដែលមានបំណងចូលរួមតាមដានសវនាការនេះ ត្រូវចុះឈ្មោះជាមុនឱ្យបានមុនថ្ងៃសុក្រ ទី១ សីហា ត្រឹមម៉ោង ៤រសៀល។ កន្លែងអង្គុយបម្រុងទុកទាំងនោះ នឹងផ្ដល់ជូនសាធារណជន ប្រសិនបើនៅទំនេរ ក្រោយម៉ោង៨ និង ៤៥នាទី នៃថ្ងៃសវនាការនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។