អង្គជំនុំជម្រះសាលាដំបូងនៃសាលាក្ដីខ្មែរក្រហម បញ្ចប់កិច្ចប្រជុំលើកទី២របស់ខ្លួនហើយ នៅថ្ងៃអង្គារ ទី២៨ តុលា។ កិច្ចប្រជុំនេះ គឺជាកិច្ចពិភាក្សាគ្នាអំពីបញ្ហារបស់ភាគីពាក់ព័ន្ធ ក្នុងការរៀបចំ និងគ្រប់គ្រងសវនាការសម្រាប់សំណុំរឿង០០២ វគ្គ២ ជាបន្តទៀត។
មេធាវីការពារក្ដីជនជាប់ចោទ នួន ជា និង ខៀវ សំផន ទីបំផុតចូលរួមនៅក្នុងកិច្ចប្រជុំរៀបចំសវនាការតាមការព្រមាន និងការបង្គាប់របស់អង្គជំនុំជម្រះសាលាដំបូង កាលពីចុងសប្ដាហ៍មុន។
មេធាវីជាតិការពារក្ដីជនជាប់ចោទ នួន ជា គឺលោក សុន អរុណ មានប្រសាសន៍ថា កិច្ចប្រជុំនៅព្រឹកថ្ងៃទី២៨ តុលា បានជជែកដេញដោលគ្នារវាងភាគីការពារក្ដី និងភាគីសហព្រះរាជអាជ្ញា លើហេតុផលដែលក្រុមមេធាវីការពារក្ដី លោក ខៀវ សំផន ធ្វើពហិការដើរចេញពីសវនាការ កាលពីថ្ងៃទី១៧ តុលា។
លោក សុន អរុណ បញ្ជាក់ថា ខាងភាគីការពារក្ដីទាំងពីរក្រុម នៅរក្សាជំហររបស់ខ្លួនដដែល គឺសុំឱ្យសាលាដំបូងផ្អាកសវនាការសំណុំរឿង០០២ វគ្គ២ រហូតដល់ដាច់ឆ្នាំ ព្រោះមានហេតុផលរៀងខ្លួន៖ «ខាង លោក នួន ជា មានហេតុផលមួយផ្សេង គឺប្ដឹងដិតចិត្តចៅក្រមទាំងបួន។ គឺប្ដឹងដិតចិត្តហ្នឹងមានន័យថា សុំឱ្យដកចៅក្រមទាំងបួន ដោយសារចៅក្រមទាំងបួនមានកំហុសកាលកាត់ ០០២/០១ យ៉ាងច្រើន ជាងពីររយករណី។ បើមិនអ៊ីចឹងទេ ឱ្យលោកចៅក្រមទាំងបួនហ្នឹង ផ្អាកការកាត់ក្ដី ផ្អាកការងាររបស់ខ្លួនមួយរយៈ ល្មមតែមានចៅក្រមពិសេស មានន័យថា ចៅក្រមរដ្ឋបាលហ្នឹងជំនុំ ហើយសម្រេចអំពីប្ដឹងដិតចិត្តហ្នឹងសិន។ អាហ្នឹងខាង នួន ជា»។
រីឯក្រុមមេធាវីការពារក្ដីឱ្យ លោក ខៀវ សំផន លើកហេតុផលថា ពហិការដើរចេញពីសវនាការ គឺព្រោះតែពួកគាត់មិនអាចធ្វើការលើសំណុំរឿងពីរក្នុងពេលតែមួយបានទេ។ មេធាវីការពារក្ដីក្រុមនេះលើកបញ្ហាឡើងថា គាត់មិនអាចធ្វើសារណាសម្រាប់ប្ដឹងសាទុក្ខសំណុំរឿង០០២ វគ្គ១ ទៅតុលាការកំពូលផង ហើយចូលរួមសវនាការសំណុំរឿង០០២ វគ្គ២ ផងបានទេ។ ទាក់ទងនឹងហេតុផលនេះ អង្គជំនុំជម្រះពិភាក្សារកដំណោះស្រាយឱ្យធនធានបន្ថែម ហើយខាងភាគីព្រះរាជអាជ្ញា សុំឱ្យចាត់តាំងមេធាវីពីខាងក្រៅ ដើម្បីតំណាងផលប្រយោជន៍ជនជាប់ចោទ និងជំរុញដំណើរការនីតិវិធីក្នុងសំណុំរឿង០០២ វគ្គ២។
ប៉ុន្តែ មេធាវីជាតិការពារក្ដីឱ្យជនជាប់ចោទ ខៀវ សំផន គឺលោក គង់ សំអុន ហៅដំណោះស្រាយនេះថា ជាដំណោះស្រាយដែលមិនអាចអនុវត្តទៅរួច។ លោកបញ្ជាក់ថា នៅពេលនេះ ខាងភាគីលោកត្រូវការសំខាន់បំផុត គឺពេលវេលាប្រហែលពីរខែសម្រាប់សរសេរសារណាប្ដឹងសាទុក្ខ គឺមិនមែនធនធានមនុស្ស ឬថវិកាទេ៖ «តាមការណែនាំរបស់ លោក ខៀវ សំផន ជាកូនក្ដីរបស់យើង ឱ្យយើងផ្ដោតទៅលើការយកចិត្តទុកដាក់ការរៀបចំសរសេរបណ្ដឹងសាទុក្ខឯណោះ ដែលវាមានប្រយោជន៍សំខាន់សម្រាប់គាត់ ជាងការចូលរួមសវនាការ។ បើយើងចូលរួមសវនាការ វាធ្វើឱ្យពេលវេលារបស់យើងបាត់បង់ ក្នុងការរៀបចំធ្វើបណ្ដឹងសាទុក្ខ។ អ៊ីចឹង វាធ្វើឱ្យផលប្រយោជន៍ទាំងពីរហ្នឹង វាអន់ទាំងពីរ។ ហេតុហ្នឹងហើយ បានជាយើងសុខចិត្តបោះបង់ការងារមួយចោល។ ដូច្នេះ ការបោះបង់នេះមិនមែនជាកំហុសរបស់យើងទេ គឺវាជាបញ្ហាវិជ្ជាជីវៈ ដែលយើងត្រូវការពារសិទ្ធិរបស់ជនជាប់ចោទ ឬក៏ផលប្រយោជន៍ជនជាប់ចោទ ដែលជាកូនក្ដីរបស់ខ្លួន។ អ៊ីចឹង បើសិនជាតុលាការយល់ថា យើងជាអ្នកបង្កឱ្យមានការរាំងស្ទះដល់នីតិវិធីរបស់តុលាការ គឺវាជារឿងមិនត្រឹមត្រូវ។ គឺវាមិនមែនជាការពិតទេ»។
មេធាវីការពារក្ដី លោក នួន ជា គឺលោក សុន អរុណ ឱ្យដឹងដែរថា បន្ទាប់ពីបញ្ហានេះ កិច្ចប្រជុំបានពិភាក្សាគ្នាដែរអំពីឯកសារសំណុំរឿង០០៣ និង ០០៤។ ក៏ប៉ុន្តែ ភាគីជនជាប់ចោទមិនទទួលយក ព្រោះយល់ថា មិនពាក់ព័ន្ធនឹងសំណុំរឿង០០២។
ទោះជាយ៉ាងណាក្ដី អង្គជំនុំជម្រះសាលាដំបូង មិនទាន់សម្រេចអំពីហេតុផលរបស់ភាគីនៅក្នុងកិច្ចប្រជុំនេះនៅឡើយទេ ដោយយកពេលទៅពិចារណាសិន ហើយនឹងចេញសេចក្ដីសម្រេចនៅពេលសមស្របខាងមុខ។
មន្ត្រីផ្នែកកិច្ចការសាធារណៈនៃសាលាក្ដីខ្មែរក្រហម ឱ្យដឹងថា ព័ត៌មានជុំវិញកិច្ចប្រជុំរៀបចំសវនាការរបស់អង្គជំនុំជម្រះសាលាដំបូងនេះ នឹងចេញផ្សាយជាសាធារណៈនៅថ្ងៃទី២៩ តុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។