អង្គជំនុំជម្រះវិសាមញ្ញក្នុងតុលាការកម្ពុជា ឬហៅថា សាលាក្តីខ្មែរក្រហម ចេញសេចក្តីប្រកាសព័ត៌មាននៅថ្ងៃទី១២ មិថុនា ឲ្យដឹងថា សាលាក្តីខ្មែរក្រហម នឹងបើកសវនាការបឋមលើសំណុំរឿង០០២ វគ្គ០២ នៅថ្ងៃទី៣០ ខែកក្កដា។
សំណុំរឿង០០២ វគ្គ០២ មានជនជាប់ចោទ ២រូប គឺអតីតប្រធានរដ្ឋសភាកម្ពុជាប្រជាធិបតេយ្យ លោក នួន ជា និងលោក ខៀវ សំផន អតីតប្រមុខរដ្ឋនៃរបបខ្មែរក្រហម។
សាលាក្តីខ្មែរក្រហម បានប្រកាសឲ្យដឹងអំពីកាលបរិច្ឆេទធ្វើសវនាការបឋម ពិនិត្យលើអង្គច្បាប់ លើសំណុំរឿង០០២ វគ្គ០២ បន្តពីសំណុំរឿង០០២ វគ្គ០១។
លោក នេត្រ ភក្ដ្រា អ្នកនាំពាក្យសាលាក្តីខ្មែរក្រហម មានប្រសាសន៍នៅថ្ងៃទី១២ មិថុនា ថា ការបើកសវនាការបឋមនេះអាចមានរយៈពេល ១ថ្ងៃ ហើយបើមានការចាំបាច់ អាចបន្តថែមមួយថ្ងៃទៀត៖ «ការបើកសវនាការមួយដែលអនុញ្ញាតឲ្យអង្គជំនុំជម្រះសាលាដំបូង ពិនិត្យទៅលើបញ្ហាមួយចំនួន។ ទី១ ទាក់ទងការបញ្ជាក់បន្ថែមលើសំណងរដ្ឋប្បវេណី។ ទី២ បញ្ហាអញ្ញត្រកម្មដែលទាក់ទងសំណុំរឿង០០២ វគ្គ២ ហើយនិងពិនិត្យលំដាប់លំដោយដំណើរការជម្រះក្តី និងពិនិត្យទៅលើសាក្សីដែលមានសក្ដានុពលភាព អ្នកជំនាញ និងអ្នកធ្វើសក្ខីកម្ម»។
សាលាក្តីខ្មែរក្រហម បានបំបែកសំណុំរឿង០០២ ជា២ គឺមានសំណុំរឿង ០០២ វគ្គ០១ និងសំណុំរឿង០០២ វគ្គ០២។ សំណុំរឿង០០២ វគ្គ០១ បានដំណើរការសវនាការចប់សព្វគ្រប់ហើយ និងគ្រោងប្រកាសសាលក្រមជាផ្លូវការ នៅថ្ងៃទី៧ សីហា ខាងមុខ។
ចំពោះសំណុំរឿង០០២ វគ្គ០២ មានបទចោទទាក់ទងបទឧក្រិដ្ឋកម្មប្រល័យពូជសាសន៍ ចំពោះជនជាតិចាម និងវៀតណាម បទចោទទាក់ទងការរំលោភយ៉ាងធ្ងន់ធ្ងរលើអនុសញ្ញាក្រុងហ្សឺណែវ ឆ្នាំ១៩៤៩ និងបទឧក្រិដ្ឋកម្មប្រឆាំងមនុស្សជាតិ។
លោក នេត្រ ភក្ដ្រា ឲ្យដឹងបន្ថែមថា បទចោទទាំងនោះមានមូលដ្ឋានចោទទាក់ទងនឹងមន្ទីរសន្តិសុខចំនួន៤ ការដ្ឋានការងារចំនួន៣ និងសហករណ៍មួយចំនួន៖ «បទចោទនៅក្នុងសំណុំរឿង០០២ វគ្គ២ នេះ ទី១ គឺការបទឧក្រិដ្ឋកម្មប្រល័យពូជសាសន៍ ចំពោះជនជាតិចាម និងវៀតណាម ដែលរាប់បញ្ចូលទាំងអំពើមនុស្សឃាត ការសម្លាប់រង្គាល ការធ្វើឲ្យទៅជាទាសករ ការនិរទេស ការដាក់នៅក្នុងមន្ទីរឃុំឃាំង ការធ្វើទារុណកម្ម ការធ្វើទុក្ខបុកម្នេញដោយសាររឿងនយោបាយ ការប្រកាន់ពូជសាសន៍ និងសកម្មភាពអមនុស្សធម៌ផ្សេងៗទៀត។ ទី២ ឧក្រិដ្ឋកម្មសង្គ្រាម ការរំលោភលើអនុសញ្ញាទីក្រុងហ្សឺណែវ ឆ្នាំ១៩៤៩ និងទី៣ គឺឧក្រិដ្ឋកម្មប្រឆាំងនឹងមនុស្សជាតិ»។
លោក នេត្រ ភក្ដ្រា ប្រាប់ថា នៅក្នុងសំណុំរឿង០០២ នេះមានឈ្មោះចុះក្នុងបញ្ជីដើមបណ្ដឹងរដ្ឋប្បវេណី សាក្សី និងអ្នកចូលខ្លួនមកបង្ហាញសក្ខីកម្មចំនួនជាង ១.០០០នាក់ ប៉ុន្តែគេនៅមិនទាន់ដឹងថា មានដើមបណ្ដឹងរដ្ឋប្បវេណី សាក្សី និងអ្នកជំនាញចំនួនប៉ុន្មាននាក់ទេ ដែលត្រូវចូលមកបំភ្លឺនៅក្នុងសំណុំរឿង០០២ វគ្គ០២ នេះ។
ទាក់ទងសវនាការបឋមលើសំណុំរឿង០០២ វគ្គ០២ នេះ លោក គង់ សំអុន ជាមេធាវីជាតិការពារ លោក ខៀវ សំផន មានប្រសាសន៍ឲ្យដឹងថា កូនក្តីលោកមានសុខភាពល្អអាចចូលរួមបាន មិនមានបញ្ហាអ្វីចោទឡើងទេ៖ «ពីព្រោះឥឡូវគាត់ឲ្យមេធាវីធ្វើការក្នុងនាមគាត់។ បើអ៊ីចឹង យើងធ្វើការដើម្បីជជែកលើបញ្ហាភស្តុតាងអីផ្សេងៗ។ ប៉ុន្តែ ក្នុងនីតិវិធីបឋមនេះ យើងជជែកលើបញ្ហាផ្លូវច្បាប់អីទេ អត់ទាន់ចូលដល់អង្គសេចក្តីទេ»។
នៅពេលចៅក្រមរៀបចំពិនិត្យ និងកាត់ក្តីលើសំណុំរឿង០០២ វគ្គ០២ នេះ កាលពីថ្ងៃទី១១ មិថុនា កន្លងទៅ អង្គភាពគាំពារជនរងគ្រោះ បានរៀបចំការជួបជុំដើមបណ្ដឹងរដ្ឋប្បវេណី និងអ្នកពាក់ព័ន្ធ ដើម្បីរៀបចំទាមទារសំណងទាក់ទងសំណុំរឿង០០២ វគ្គ០២ ដែរ។ ប្រភពពីមន្ត្រីសាលាក្តីខ្មែរក្រហម បានឲ្យដឹងថា ដើមបណ្ដឹងរដ្ឋប្បវេណីក្នុងសំណុំរឿង០០២ មានចំនួនជិត ៤.០០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។