អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃច័ន្ទ ទី២៥ សីហា បានស្ដាប់សក្ខីកម្មទី១០ ទាក់ទងនឹងអង្គហេតុធ្វើការងារដោយបង្ខំ នៅការដ្ឋានធ្វើទំនប់អាងត្រពាំងថ្ម នៅខេត្តបន្ទាយមានជ័យ។ សក្ខីកម្មទី១០ គឺផ្ដល់ដោយដើមបណ្ដឹងរដ្ឋប្បវេណីមួយរូបឈ្មោះ ញឹម ហល់។
ដើមបណ្ដឹងរដ្ឋប្បវេណីមួយរូប ញឹម ហល់ ជាអតីតពលករកងចល័តនៅការដ្ឋានធ្វើទំនប់អាងត្រពាំងថ្ម ថ្លែងអំពីការឈឺចាប់ជូនអង្គជំនុំជម្រះសាលាដំបូងថា របបកម្ពុជាប្រជាធិបតេយ្យ ធ្វើឲ្យលោកបាត់បង់គ្រប់យ៉ាង៖ «ជួបការលំបាក បាត់បង់សាច់ញាតិ បាត់បង់កម្លាំងពលកម្ម បាត់បង់សុខភាព បាត់សេរីភាព ជាពិសេស បាត់បង់ឪពុកម្ដាយបងប្អូន។ ពេលឈឺថ្កាត់ក៏គ្មានបងប្អូនញាតិមិត្ត ឬសាច់សារលោហិតណាមួយមកសួរនាំ ឬមានថ្នាំសង្កូវអីលេប ហើយនិងលើកទឹកចិត្តទេ។ ដេកឈឺនៅម្នាក់ឯងស្លាប់រស់ម្នាក់ឯង»។
លោក ញឹប ហល់ បន្តថា ត្រូវអង្គការបង្ខំឲ្យលើកដីចាក់បំពេញក្បាលស្ពានទីមួយ នៃទំនប់អាងត្រពាំងថ្មនោះ។ លោកត្រូវអង្គការកំណត់ឲ្យលើកដីពី ៣ ទៅ ៥ម៉ែត្រគូបក្នុងមួយថ្ងៃ ដែលលោកត្រូវក្រោកពីម៉ោង ៣ព្រឹក ធ្វើដល់ម៉ោង ៥ល្ងាច។ លោកថា លក្ខខណ្ឌធ្វើការងារនៅការដ្ឋាននោះ គឺជាការងារធ្វើដោយបង្ខំពីអង្គការ ហើយមានពលករភាគច្រើនឈឺដើមទ្រូង ដោយសារតែធ្វើការរែកដីធ្ងន់ពេក។ រីឯការហូបចុកមិនគ្រប់គ្រាន់ទេ ហើយពលករដែលឈឺ ត្រូវគេបន្ថយរបបអាហារខ្លះ៖ «គ្រាន់តែមានរបបបាយនៅពេលច្រូតកាត់។ តែផុតច្រូតកាត់ទៅអត់ អស់របបហើយ មានតែរបបបបរវិញ។ ម្នាក់ត្រូវមួយចានត្រាមាន់ ទ្រើសជាងចានចង្កឹះបន្តិច។ វាល់របបចែក ឆ្អែតឬមិនឆ្អែតតែប៉ុណ្ណោះឯង។ មិនមែនបាយទេ របៀបបបរជ័រស្លា បបរឈ្មោល។ ទ្រាំមិនបានទេ តែធ្វើនោះធ្វើទាំងខ្លាចស្លាប់តែម្ដង។ ធ្វើទាំងកម្លាំងចិត្ត តែកម្លាំងកាយអត់មាន គឺកម្លាំងខ្លាចស្លាប់ហ្នឹងតែម្ដង មិនហ៊ានតវ៉ាជាមួយអង្គការទេ»។
លោកថ្លែងថា បន្ទាប់ពីការងារលើកដីចាក់បំពេញក្បាលស្ពានរួចហើយ លោកត្រូវគេបញ្ជូនទៅច្រូតស្រូវពេលថ្ងៃ និងពេលយប់លីបាវស្រូវដាក់ទូរថភ្លើងនៅស្រុកសិរីសោភ័ណ។ លោកថា ស្រូវត្រូវគេដឹកចេញអស់ៗ។
ឆ្លើយតបនឹងការសួរដេញដោលរបស់មេធាវីការពារក្ដីឲ្យជនជាប់ចោទ នួន ជា លោក ញឹប ហល់ មានប្រសាសន៍ថា លោកមិនដែលឃើញគេវាយធ្វើបាប ឬចាប់ពលករណាមួយយកទៅសម្លាប់ទេ ពេលធ្វើការនៅទំនប់អាងត្រពាំងថ្មនោះ។
សក្ខីកម្មរបស់ លោក ញឹប ហល់ ជាសក្ខីកម្មទី១០ ក្នុងគម្រោងដំបូងរបស់អង្គជំនុំជម្រះ ដែលថានឹងកោះហៅសាក្សី និងដើមបណ្ដឹងរដ្ឋប្បវេណីចំនួន ១១នាក់ ទាក់ទងនឹងអង្គហេតុស្ដីពីការងារដោយបង្ខំ នៅការដ្ឋានទំនប់អាងត្រពាំងថ្ម ខេត្តបន្ទាយមានជ័យ។ អង្គហេតុនេះ ស្ថិតនៅក្នុងសំណុំរឿង០០២ វគ្គ២ ប្រឆាំងនឹងជនជាប់ចោទ នួន ជា និង ខៀវ សំផន។
សវនាការដែលអង្គជំនុំជម្រះនឹងបន្តនៅថ្ងៃទី២៦ សីហា គឺជាសវនាការដាក់បង្ហាញឯកសារគន្លឹះបន្ថែមរបស់ភាគីនានា ពាក់ព័ន្ធនឹងអង្គហេតុស្ដីពីការងារដោយបង្ខំនៅការដ្ឋាន៣ គឺទី១ នៅទំនប់ ១មករា ខេត្តកំពង់ធំ ទី២ វាលយន្តហោះខេត្តកំពង់ឆ្នាំង និងទី៣ ទំនប់អាងត្រពាំងថ្ម ខេត្តបន្ទាយមានជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។