អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃច័ន្ទ ទី២៤ សីហា បានស្ដាប់សក្ខីកម្មរបស់សាក្សីថ្មីទី៩ ឈ្មោះ ឈុយ ហ៊ុយ ទាក់ទងនឹងអង្គហេតុធ្វើការងារដោយបង្ខំនៅការដ្ឋានធ្វើទំនប់អាងត្រពាំងថ្ម នៅខេត្តបន្ទាយមានជ័យ។ សាក្សីរូបនេះ អតីតមានតួនាទីជាមេកងចល័តដែលគ្រប់គ្រងមនុស្ស ៥៥នាក់នៅការដ្ឋាននោះ។
សាក្សី ឈុយ ហ៊ុយ ជម្រាបអង្គជំនុំជម្រះសាលាដំបូងថា លក្ខខណ្ឌធ្វើការងារដោយបង្ខំនៅការដ្ឋានធ្វើទំនប់អាងត្រពាំងថ្ម មានពលករធ្លាក់ខ្លួនឈឺរាល់ថ្ងៃ ព្រោះការងារលំបាក និងការហូបចុកមិនមានអនាម័យ៖ «មានអ្នកជំងឺនៅក្នុងមួយកងៗ តែងតែមាន ៤ ឬ ៥នាក់ ហើយមានពេទ្យប្រចាំព្យាបាល។ អ្នកជំងឺអត់ទៀង។ ថ្ងៃណាទៅក៏តិច ថ្ងៃទៅក៏ច្រើន មិនទៀងទេ។ បើតិចចំនួន ៥ បើច្រើនដល់ទៅ ២០»។
ទោះជាដូច្នេះក្ដី លោកអះអាងថា មិនមានអ្នកឈឺរហូតដល់ស្លាប់ទេនៅក្នុងកងចល័តរបស់លោកនៅឯការដ្ឋានធ្វើទំនប់អាងត្រពាំងថ្មនោះ។
សាក្សី ឈុយ ហ៊ុយ ថ្លែងថា នៅពេលរូបលោកធ្លាក់ខ្លួនឈឺធ្វើការមិនកើត លោកត្រូវអង្គការថ្នាក់លើចោទថា កើតជំងឺសតិអារម្មណ៍ ឬឈឺពុត។ លោកត្រូវមេកងថ្នាក់លើ ដកទៅដាក់កងមួយដោយឡែកពីគេ៖ «បាទ! ពិតមែន ខ្ញុំមិនស្រួលមែន ពិតធ្វើការអត់កើត ហើយគេចោទខ្ញុំថាសតិអារម្មណ៍ ហើយគេដាក់ខ្ញុំឲ្យទៅពលកម្មបោចរពាក់នៅភូមិខ្ជាយ។ ដល់ពេលបោចរពាក់ហើយ ធ្វើបង្គី ដាក់កំណត់ឲ្យខ្ញុំធ្វើមួយថ្ងៃ ១០បង្គី គ្នាបួនប្រាំនាក់។ ដល់ពេលខ្ញុំគោរពផែនការបាន ហៅខ្ញុំមកបញ្ចូលកន្លែងដដែលសាដើមវិញ។ ទៅតាមទិសមិនហ៊ានប្រកែកទេ។ សម័យនោះ ប្រកែកប្រណាំងមិនបានទេ សុខចិត្តយកថ្នាំពេទ្យលេបទៅធ្វើការ»។
លោក ឈុយ ហ៊ុយ ថ្លែងថា យុវជន និងនារីនៅតាមភូមិ និងសហករណ៍ក្នុងតំបន់នោះ មិនអាចគេចផុតពីការបង្ខំឲ្យធ្វើជាពលករកងចល័តនៅទំនប់អាងត្រពាំងថ្មនោះទេ។ ពលករកងចល័ត ត្រូវបានមេកងថ្នាក់លើស្រង់ប្រវត្តិរូប ហើយក្រោយមកត្រូវចាប់ខ្លួន។ លោកជម្រាបអង្គជំនុំជម្រះថា ពលករក្នុងកងរបស់លោកម្នាក់ដែលជាអ្នករដ្ឋការខាងអាកាសចរណ៍ ត្រូវយោធាចាប់យកទៅសម្លាប់។ លោកមិនបានឃើញការសម្លាប់ផ្ទាល់ទេ គឺគ្រាន់តែឮស្នូរបាញ់កាំភ្លើង បន្ទាប់ពីយកពលករនោះចេញទៅនៅពេលយប់។
ទាក់ទងនឹងអង្គហេតុស្ដីពីការងារដោយបង្ខំនៅការដ្ឋានទំនប់អាងត្រពាំងថ្ម ខេត្តបន្ទាយមានជ័យ ដែលជាការចោទប្រកាន់ចំពោះជនជាប់ចោទ នួន ជា និង ខៀវ សំផន ក្នុងសំណុំរឿង០០២ វគ្គ២ នេះ អង្គជំនុំជម្រះសាលាដំបូង លោកចៅក្រម និល ណុន ប្រកាសថា នឹងបន្តស្ដាប់សក្ខីកម្មរបស់ដើមបណ្ដឹងរដ្ឋប្បវេណីមួយរូប នៅថ្ងៃទី២៥ សីហា។ លោកបញ្ជាក់ថា នៅថ្ងៃទី២៦ និងទី២៧ សីហា អង្គជំនុំជម្រះនឹងផ្ដល់ឱកាសឲ្យភាគីដាក់ឯកសារថ្មីរបស់ខ្លួនបន្ថែមទៀត។
សាលាក្ដីខ្មែរក្រហម នៅថ្ងៃទី២៤ ដដែល បានតែងតាំងចៅក្រមអន្តរជាតិ ២រូបឲ្យទទួលមុខតំណែងជាសហចៅក្រមស៊ើបអង្កេតអន្តរជាតិថ្មី។ ក្នុងចំណោមចៅក្រមទាំង ២រូប គឺលោក ម៉ៃឃើល បុះឡែនឌើរ (Michael Bohlander) ជាជនជាតិអាល្លឺម៉ង់ ត្រូវបានតែងតាំងជាសហចៅក្រមស៊ើបអង្កេតអន្តរជាតិពេញសិទ្ធិ និងលោក ម៉ូរីន ហាឌីង ខ្លាក (Maureen Harding Clark) ជាជនជាតិអៀរឡង់ដ៍ (Ireland) ត្រូវបានតែងតាំងជាសហចៅក្រមស៊ើបអង្កេតអន្តរជាតិបម្រុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។