អង្គជំនុំជម្រះសាលាដំបូងនៃសាលាក្តីខ្មែរក្រហម ប្រកាសថា ខ្លួនបានសម្រេចចេញដីកាបញ្ជូនកំហុសវិជ្ជាជីវៈរបស់ក្រុមមេធាវីការពារក្តី លោក ខៀវ សំផន ទៅអង្គភាពមានសមត្ថកិច្ចរបស់ពួកគេរៀងៗខ្លួន។
សេចក្តីប្រកាសព័ត៌មានរបស់សាលាក្តីខ្មែរក្រហម ចុះថ្ងៃទី១៩ ធ្នូ ឲ្យដឹងថា កំហុសវិជ្ជាជីវៈរបស់សហមេធាវីជាតិការពារក្តី លោក ខៀវ សំផន គឺលោក គង់ សំអុន ត្រូវបានបញ្ជូនទៅប្រធានគណៈមេធាវីនៃព្រះរាជាណាចក្រកម្ពុជា។ រីឯកំហុសវិជ្ជាជីវៈរបស់សហមេធាវីអន្តរជាតិការពារក្តី លោក ខៀវ សំផន ២រូបផ្សេងទៀត គឺមេធាវី អាធួ វើខេន (Arthur Vercken) និងមេធាវី អានតា ហ្គីស្ស (Anta Guisse) ត្រូវបានបញ្ជូនទៅប្រធានមេធាវីទីក្រុងប៉ារីស និងអគ្គរដ្ឋអាជ្ញានៃសាលាឧទ្ធរណ៍ទីក្រុងប៉ារីស។
សេចក្តីប្រកាសព័ត៌មានបញ្ជាក់ថា ក្រុមមេធាវីការពារក្តី លោក ខៀវ សំផន បានរំលោភបំពានលើដីកាបង្គាប់របស់តុលាការម្តងហើយម្តងទៀត ក្នុងការចូលរួមកិច្ចដំណើរការនីតិវិធីសវនាការនៅក្នុងសំណុំរឿង០០២ វគ្គ០២ ដែលតុលាការយល់ថា ទង្វើនេះ គឺជាចេតនាធ្វើឲ្យរាំងស្ទះយ៉ាងធ្ងន់ធ្ងរដល់កិច្ចដំណើរការនីតិវិធី។ តុលាការអះអាងថា ផលវិបាកដោយផ្ទាល់ដែលកើតចេញពីការប្រព្រឹត្តកំហុសវិជ្ជាជីវៈនេះ គឺសវនាការចំនួន ២៥ថ្ងៃ ក្នុងរយៈពេល ១០សប្ដាហ៍ ត្រូវបានលុបចោល និងបង្កើតឲ្យមានការលំបាកដល់សាក្សី និងដើមបណ្ដឹងរដ្ឋប្បវេណី ការរំខានដល់ភាគីនានា និងការចំណាយជាច្រើនបន្ថែមទៀតដល់សាលាក្តីខ្មែរក្រហម។
ភាពចម្រូងចម្រាសក្នុងសំណុំរឿង០០២ វគ្គ២ នេះ កើតឡើងដោយសារក្រុមមេធាវីការពារក្តី លោក ខៀវ សំផន ធ្វើពហិការមិនព្រមចូលសវនាការ។ ភាគីមេធាវីការពារក្តី លោក ខៀវ សំផន ធ្លាប់លើកឡើងថា ពួកគេត្រូវការពេលវេលាដើម្បីរៀបចំសារណាបណ្ដឹងសារទុក្ខការពារកូនក្តី។ ពួកគេថា ពួកគេមិនអាចចូលរួមធ្វើការការពារកូនក្តីក្នុងសំណុំរឿង ០០២ វគ្គ២ ផង និងធ្វើសារណាប្ដឹងសារទុក្ខការពារកូនក្តីផងក្នុងពេលតែមួយបានទេ។ មួយវិញទៀត លោក ខៀវ សំផន ដែលជាកូនក្តីនោះ ក៏មិនព្រមឲ្យពួកគេចូលសវនាការការពារក្តីក្នុងសំណុំរឿង ០០២ វគ្គ២ នេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។