អង្គជំនុំជម្រះសាលាដំបូងនៃសាលាក្ដីខ្មែរក្រហម បន្តធ្វើសវនាការស្ដាប់សក្ខីកម្មរបស់អតីតប្រធានមន្ទីរសន្តិសុខ «ស-២១»ឬគុកទួលស្លែង កាំង ហ្កេកអ៊ាវ ហៅ ឌុច ចូលដល់ថ្ងៃទី៤ ហើយនៅថ្ងៃច័ន្ទ ទី១៣ មិថុនា។ សាក្សី ឌុច អះអាងថា បទរំលោភផ្លូវភេទអ្នកទោសនៅគុកទួលស្លែង មានតែមួយករណីទេ។
សាក្សី ឌុច ថ្លែងថា បទរំលោភខាងផ្លូវភេទដែលសាក្សីខ្លះបានជម្រាបអង្គជំនុំជម្រះថា កើតឡើងនៅមន្ទីរសន្តិសុខ «ស-២១»គឺជារឿងប្រឌិតឡើង លើកលែងតែករណីមួយដែលជាអតីតគ្រូបង្រៀនលោក៖ « ព្រះរាជអាជ្ញា ជា លាង បាននិយាយនៅក្នុងពេលសរុបថា រកឃើញតែមួយករណីគត់ គឺករណីក្មេងម្នាក់ដែលវាធ្វើឲ្យប៉ះពាល់ដល់កិត្តិយសរបស់អ្នកគ្រូខ្ញុំ ដោយយកដុំឈើ ឬស្អីទេទៅរុក។ រឿងហ្នឹងហើយដែលខ្ញុំឈឺចាប់អស់មួយជីវិត ហើយសូមបញ្ជាក់ថា រឿងនេះអត់មានសល់ភស្តុតាងអីសល់ទេ ដោយសារឈឺចាប់ពេក។ ខ្ញុំនិយាយរឿងនេះតាំងពីខ្ញុំជួប នីក ដាន់ឡុប (Nic Dunlop) ហើយនិង ណេត ថៃយ័រ (Nate Thayer) នៅរវាងខែ៤ ឆ្នាំ១៩៩៩។ ឯកសារ ស-២១ អត់មានសល់រឿងនេះទេ។ ដូច្នេះ គឺខ្ញុំឈឺចាប់ខ្ញុំនិយាយ។ ឯចំណែករឿងផ្សេងទៀតដែលលេចឡើង សុទ្ធតែជារឿងប្រឌិត។ នេះខ្ញុំសុំបញ្ជាក់អ៊ីចឹង។ ឯអ្នកគ្រូខ្ញុំនោះឈ្មោះ ឌឹម សារឿន » ។
អតីតប្រធានគុកទួលស្លែងរូបនេះអះអាងថា បទល្មើសនឹងស្ត្រីភេទនៅគុកនោះ មិនងាយកើតឡើងទេ ព្រោះជាសីលធម៌ ត្រូវបានហាមឃាត់តឹងរ៉ឹងបំផុតនៅក្នុងបក្សកុម្មុយនិស្តកម្ពុជា និងនៅគុកនោះ។
ទន្ទឹមគ្នា សាក្សី ឌុច ក៏បដិសេធសក្ខីកម្មរបស់សាក្សីឈ្មោះ ប្រាក់ ខន ដែលជាអតីតអ្នកសួរចម្លើយអ្នកទោសនៅមន្ទីរ «ស-២១»ដែរ។ លោកថា សាក្សី ប្រាក់ ខន និយាយជូនតុលាការមិនទៀង។
សាក្សីមួយទៀតឈ្មោះ ឡាច មៀន ក៏លោក ឌុច ចាត់ទុកថាជា ឡាច មៀន សិប្បនិមិត្ត មិនមែនជា ឡាច មៀន ដែលធ្លាប់ជាកូនចៅលោកនៅមន្ទីរ «ស-២១»ទេ។ កាលសប្ដាហ៍មុន លោកចាត់ទុកឧបករណ៍ធ្វើទារុណកម្មខ្លះដែលដាក់តាំងនៅសារមន្ទីរទួលស្លែងសព្វថ្ងៃនេះ ថាជាឧបករណ៍ប្រឌិតឡើងក្រោយរបបខ្មែរក្រហមដួលរលំ។
សាក្សី ឌុច នឹងត្រូវបន្តសក្ខីកម្មរបស់លោកទៀតនៅថ្ងៃអង្គារ ទី១៤ មិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។