ឌុច ថាលោកនៅរស់ព្រោះតែបានលាក់ការណ៍សម្ងាត់
2016.06.23
សវនាការរបស់អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២២ មិថុនា បន្តស្ដាប់ការសួរដេញដោលសាក្សី កាំង ហ្កេកអ៊ាវ ហៅ ឌុច។ ការធ្វើសក្ខីកម្មដែលឈានចូលដល់ថ្ងៃទី១០ សាក្សី ឌុច ដែលជាអតីតប្រធានមន្ទីរសន្តិសុខ «ស-២១» ឬគុកទួលស្លែង លោកនៅរស់ព្រោះតែបានលាក់ការណ៍សម្ងាត់។
សាក្សី ឌុច ជម្រាបអង្គជំនុំជម្រះសាលាដំបូងនៅថ្ងៃអង្គារ ទី២២ មិថុនា ថា ក្នុងតួនាទីរបស់លោកជាប្រធានមន្ទីរសន្តិសុខ «ម-១៣» នៅកំពង់ស្ពឺ ហើយបន្តក្លាយជាប្រធានមន្ទីរសន្តិសុខ «ស-២១» លោកបានគោរពគោលការណ៍លាក់ការណ៍សម្ងាត់បាន ទើបលោកនៅរស់។
លោកថ្លែងថា លោកបានរក្សាការងារសម្ងាត់នៅមន្ទីរសន្តិសុខ «ស-២១» បានជិតល្អ ហើយរាយការណ៍ទៅតែថ្នាក់លើផ្ទាល់របស់លោក គឺលោក សុន សេន មិត្ត ប៉ង់ នីរសាររបស់ ប៉ុល ពត និងលោក នួន ជា៖ «ក្រោយមកមិត្ត ប៉ង់ គេចុះទៅក្នុងឋានៈជាអ្នកនាំពាក្យរបស់មជ្ឈិមរបស់បង ប៉ុល (ប៉ុល ពត)។ ខ្ញុំមានសិទ្ធិរាយការណ៍ខ្លះអំពីចម្លើយអ្នកទោសនៅ ស-២១។ នេះតាមការអនុញ្ញាតរបស់បង នួន (នួន ជា) នៅទីនេះ។ ក៏ប៉ុន្តែយើងសង្កេតមើល បើសិនណាខ្ញុំមិនរក្សាការណ៍សម្ងាត់ អ៊ីចឹងនៅពេលដែលមិត្ត ប៉ង់ មកគ្រប់គ្រងខ្ញុំ អាចម្លើយខ្មាំងឆ្លើយដាក់មិត្ត ប៉ង់ មិត្ត ប៉ង់ កាន់ទៅជូនអចិន្ត្រៃយ៍។ ដូច្នេះ ការណ៍សម្ងាត់វាអ៊ីចឹង។ ច្បាស់លាស់ មិត្ត ប៉ង់ កាន់ចម្លើយពី ស-២១ ដែលខ្មាំងឆ្លើយដាក់គាត់យកទៅជូនអចិន្ត្រៃយ៍។ ដល់ក្រោយមក អចិន្ត្រៃយ៍សម្រេចចាប់មិត្ត ប៉ង់។ បង នួន ប្រើបង វន ឲ្យទៅប្រាប់ខ្ញុំថា អង្គការសម្រេចចាប់ ប៉ង់ ហើយ។ នេះដំណើរការ គឺអ៊ីចឹង។ ដាច់ខាតតែម្ដងជំនាន់ហ្នឹង»។
នៅក្នុងរបបកម្ពុជាប្រជាធិបតេយ្យ មានកម្មាភិបាលជាន់ខ្ពស់ជាច្រើននាក់ ដូចជា មិត្ត ប៉ង់ នីរសាររបស់ ប៉ុល ពត ត្រូវបានគណៈមជ្ឈិម ឬមន្ទីរ ៨៧០ នៃបក្សកុម្មុយនិស្តកម្ពុជា សម្រេចចាប់ខ្លួនមកឲ្យលោកនៅមន្ទីរសន្តិសុខ «ស-២១»។ សាក្សី ឌុច បញ្ជាក់ថា អ្នកទាំងនោះត្រូវគេចាប់ខ្លួនបន្ទាប់ពីគណៈមជ្ឈិមតាមដាន គឺមិនផ្អែកតែលើចំនួនអ្នកទោសផ្សេងទៀតប៉ុន្មាននាក់ឆ្លើយដាក់នោះទេ។
ទោះបីជាយ៉ាងនេះក្ដី សាក្សី ឌុច វាយតម្លៃការងារចាប់ចងមនុស្សនៅក្នុងរបបកម្ពុជាប្រជាធិបតេយ្យថា មិនសូវមានហេតុផលដូចនៅក្នុងរឿងសាមកុករបស់ចិន ឡើយ៖ «គេចេះតែចាប់ហូរហែ។ ខ្ញុំលៃពេលខ្លះទៅអានរឿងសាមកុក។ កាលនោះខ្ញុំមានរឿងសាមកុកសង្ខេបមួយជន្លាសប៉ុណ្ណេះ។ ខ្ញុំចង់ដឹងថា តើការកាប់សម្លាប់នៅសម័យសាមកុកសក្ដិភូមិចិន ហើយសម័យបក្សកុម្មុយនិស្តកម្ពុជា កាន់អំណាច វាខុសគ្នាយ៉ាងម៉េច? ខ្ញុំមើលទៅថា រឿងសាមកុកវាហាក់ដូចជាមានហេតុផលជាងការសម្លាប់នៅ ស-២១។ នេះខ្ញុំចំណាយពេលទៅខាងហ្នឹង។ អាហ្នឹងក៏ត្រូវគិតដែរថា ខ្ញុំអត់បានធ្វើការ ហើយចំណាយពេលអានអារឿងសាមកុក ដើម្បីជាការយល់អំពីរបបនយោបាយ»។
លោក ឌុច ប្រាប់អង្គជំនុំជម្រះកាលពីសប្ដាហ៍មុនថា លោកក៏យកបច្ចេកទេសរបស់លោកម្ចាស់ ប៉ាវ ឬ ប៉ាវ កុង នៃរឿងតុលាការមុខដែករបស់ចិន ដែរ ក្នុងការបំពេញការងាររបស់លោកនៅមន្ទីរសន្តិសុខ «ស-២១»។ នេះជាលើកទីពីរហើយដែលលោកភ្ជាប់ការងាររបស់លោកទៅនឹងរឿងចិន។ លោករំឭកឡើងវិញដែរថា គោលការណ៍បក្សកុម្មុយនិស្តកម្ពុជា កំណត់ឲ្យមន្ទីរ «ស-២១» និងមន្ទីរនគរបាលទាំងអស់ ចាប់ទាំងប្រពន្ធ និងកូន នៅពេលមេគ្រួសារណាត្រូវចាប់ខ្លួន។ លោកបន្តថា មាគ៌ាបក្សក៏តម្រូវថា ត្រូវតែសម្លាប់អ្នកទោសដែរ នៅពេលណាគេចាប់ហើយ ហើយគោលការណ៍មិនអាចជជែកតវ៉ាបានឡើយ៖ «នេះវាជាគោលការណ៍សកលរបស់បក្សកុម្មុយនិស្តកម្ពុជា ហើយ។ ចាប់ត្រូវតែកម្ទេច។ ដូច្នេះទៅនិយាយពីជោគវាសនាអីទៀត។ អត់ទេ។ អត់មានជជែកគ្នាលើមាគ៌ាបក្សទេ។ មាគ៌ាបក្សមិនមែនជារបស់ជជែកគ្នាពិភាក្សា ត្រូវ ឬមិនត្រូវទេ។ បក្សកំណត់យ៉ាងម៉េច ត្រូវតែធ្វើអ៊ីចឹង។ នេះមាគ៌ាបក្ស ឲ្យតែចាប់ហើយ សួរហើយ ឃុំហើយ បើរឹងរូសពេក មិនចាំបាច់ទុកតទេ គេកម្ទេច ហើយមិត្ត ប៉ង់ បែបគេកម្ទេចចោលដោយមិនចាំបាច់សួរអីផង។ ខ្ញុំឃើញគាត់ឆ្លើយច្របល់ ចម្លើយមិត្ត ប៉ង់ ដែលគេមកឲ្យខ្ញុំ»។
ទាក់ទងនឹងការលាក់ការណ៍សម្ងាត់ សាក្សី ឌុច កាលពីសប្ដាហ៍មុន ជម្រាបអង្គជំនុំជម្រះថា ជនជាប់ចោទ ខៀវ សំផន អតីតប្រធានរដ្ឋ គឺជាមនុស្សពូកែលាក់ការណ៍ជាសម្ងាត់ មិនដែលបរិហាររឿងអ្វីទេ។ សវនាការនៅថ្ងៃទី២២ មិថុនា សាក្សី ឌុច ត្រូវបានមេធាវីការពារក្ដីជនជាប់ចោទ ខៀវ សំផន សួរដេញដោលអំពីរឿងដែលថា លោកធ្លាប់ប្រជុំជាមួយ ខៀវ សំផន ម្ដងកាលពីថ្ងៃទី៦ ខែមករា ឆ្នាំ១៩៧៩។
អតីតប្រធានគុកទួលស្លែងរូបនេះ នឹងបន្តផ្ដល់សក្ខីកម្មរបស់លោកជាបន្តទៀត នៅថ្ងៃព្រហស្បតិ៍ ទី២៣ ខែមិថុនា៕