ជនរងគ្រោះ និងជាដើមបណ្ដឹងរដ្ឋប្បវេណីនៃសាលាក្ដីខ្មែរក្រហម នៅបន្តខ្វែងគំនិតគ្នាក្នុងការទាមទារសំណងជួសជុលផ្លូវចិត្ត នៅគ្រាដែលអង្គជំនុំជម្រះវិសាមញ្ញក្នុងតុលាការកម្ពុជា (ECCC) គ្រោងនឹងប្រកាសសាលក្រមសំណុំរឿង០០២ វគ្គ១ ដែលមានជនជាប់ចោទ នួន ជា និង ខៀវ សំផន នៅដើមខែសីហា ឆ្នាំ២០១៤ ខាងមុខ។
ការទាមទារសំណងនេះ ត្រូវបានជនរងគ្រោះលើកឡើងក្នុងវគ្គហ្វឹកហ្វឺនសម្រាប់តំណាងដើមបណ្ដឹងរដ្ឋប្បវេណី ដែលរៀបចំឡើងដោយសមាគមអាដហុក (Adhoc) នៅខេត្តកំពង់ឆ្នាំង នាព្រឹកថ្ងៃទី១៩ ខែមិថុនា។
តំណាងដើមបណ្ដឹង និងជាជនរងគ្រោះក្នុងរបបកម្ពុជាប្រជាធិបតេយ្យ ឬខ្មែរក្រហម សរុបជាង ៥០នាក់ មកពីតាមបណ្ដាខេត្តក្រុងចំនួន១២ បានជួបជជែកគ្នា និងទទួលយកព័ត៌មានថ្មីៗទាក់ទងនឹងដំណើរការកាត់ទោសមេដឹកនាំកំពូលៗរបស់ខ្មែរក្រហម។ អ្នកចូលរួមលើកឡើងថា ការផ្ដល់សំណងជាសមូហភាព គឺមិនអាចផ្សះផ្សាផ្លូវចិត្តជនរងគ្រោះបានឡើយ ដាច់ខាតត្រូវតែមានសំណងជាបុគ្គលម្នាក់ៗ។
តំណាងដើមបណ្ដឹងក្នុងសំណុំរឿងលេខ០០២ មកពីខេត្តកណ្ដាល លោក ហេង ប៊ុនណែត មានប្រសាសន៍ថា ប្រសិនបើគេផ្ដល់សំណងជាបុគ្គល គឺអាចស្ដារជីវភាពជនរងគ្រោះបានឡើងវិញ និងអាចធ្វើបុណ្យទានផ្សេងៗ ដើម្បីឧទ្ទិសកុសលជូនដល់ឪពុកម្ដាយ និងបងប្អូនដែលត្រូវគេវាយសម្លាប់ចំនួន ៦នាក់ ក្នុងរបបខ្មែរក្រហម៖ «សំណងជាបុគ្គលជារឿងមួយដែលដើមបណ្ដឹងចង់បាន។ គាត់យល់ដូចខ្ញុំច្រើន ក៏ប៉ុន្ដែគាត់មិនសូវហ៊ានបញ្ចេញមតិ មូលហេតុដោយថាមេធាវីគាត់និយាយច្រំដែលៗ ថាអត់មានសំណងជាបុគ្គល តែចំពោះខ្ញុំៗត្រូវតែទាមទារឲ្យបាន»។
ចំណែកតំណាងដើមបណ្ដឹងម្នាក់ទៀតនៅខេត្តស្វាយរៀង លោក ប៉ែន សឺន ថ្លែងបញ្ជាក់ថា ស្ទើរគ្រប់សិក្ខាសាលាទាំងអស់ លោកតែងតែទាមទារនូវការផ្ដល់សំណងជាបុគ្គលនេះ ប៉ុន្តែខាងមេធាវីតែងតែការពារ និងពង្វាង ដោយយកនិយមន័យផ្សេងៗយកមកដាក់ ដើម្បីបំភ័ន្តការយល់ដឹងរបស់តំណាងដើមបណ្ដឹងមួយចំនួន៖ «សមាគមអាដហុក ដែលរៀបចំវេទិកានីមួយៗ តែងតែមានមេធាវី ហើយមេធាវីនោះមិនបានការពារនូវផលប្រយោជន៍ឲ្យពួកខ្ញុំៗគិតថា តាំងពីដើមទីរហូតដល់ថ្ងៃនេះ អ៊ីចឹងទេ ប្រសិនជាមេធាវីនោះនៅតែរឹងរូសមិនព្រមទទួលសំណើពីពួកខ្ញុំ នាំទៅដល់សាលាក្ដីទេ សូមឲ្យសមាគមអាដហុក ហ្នឹង ជួយរៀបចំគណៈកម្មការមួយចេញពីជនរងគ្រោះ ដើម្បីទំនាក់ទំនងការងារទាសំណងនេះផ្ទាល់ជាមួយនឹងសហមេធាវី និងសហព្រះរាជអាជ្ញារបស់តុលាការនេះ»។
ឆ្លើយតបបញ្ហានេះ ប្រធានគម្រោងសាលាក្ដីខ្មែរក្រហម នៃសមាគមអាដហុក លោក ឡាត់ គី យល់ថា គ្រប់មេធាវីខិតខំប្រឹងប្រែងការពារផលប្រយោជន៍ជូនជនរងគ្រោះ ប៉ុន្តែរាល់ការបកស្រាយទាំងឡាយ គឺឈរលើមូលដ្ឋានច្បាប់ជាធរមាន ជាពិសេសផ្អែកលើបទបញ្ជាផ្ទៃក្នុងដែលបានបញ្ញត្តិ។ ចំពោះសំណូមពរបង្កើតគណៈកម្មការ គឺជារឿងមួយលំបាក ដែលទាមទារឲ្យមានពេលវេលាគ្រប់គ្រាន់ក្នុងការជជែកជាមួយពួកគាត់ឲ្យបានលម្អិតឡើងវិញ៖ «សម្រាប់បុគ្គលជាដើមបណ្ដឹងរដ្ឋប្បវេណីដទៃឯទៀត ដែលមានបំណងចង់បានសំណងជាបុគ្គល អាចលើកឡើងអាចធ្វើការតស៊ូមតិគ្រប់កាលៈទេសៈ តាមលទ្ធភាពដែលពួកគាត់ចង់ធ្វើ។ សម្រាប់យើងខ្ញុំជាអង្គការមិនមែនរដ្ឋាភិបាល ដែលសម្របសម្រួល តែងតែជួយសម្រួលដូចជាការផ្ដល់ឱកាសឲ្យគាត់បានបញ្ចេញនូវសំឡេងទុក្ខលំបាក សំឡេងនូវទស្សនៈដែលគាត់ចង់បានតាមលទ្ធភាពដែលយើងខ្ញុំមាន»។
អ្នកនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍ថា ទាក់ទងនឹងការផ្ដល់សំណងជូនជនរងគ្រោះមានពីរប្រភេទ គឺសំណងសមូហភាព និងសំណងផ្លូវចិត្ត ប៉ុន្តែមិនអាចផ្ដល់ជាសំណងបុគ្គលម្នាក់ៗនោះទេ ដោយសារតែដើមបណ្ដឹងមានចំនួនច្រើន។ លោកបញ្ជាក់ថា ដើមបណ្ដឹងរដ្ឋប្បវេណីក្នុងសំណុំរឿងលេខ០០២ ដែលមានជនជាប់ចោទ នួន ជា និង ខៀវ សំផន មានចំនួនជិត ៤ពាន់នាក់ (៣.៨៦៧)៖ «ការប្រកាសសាលក្រមនេះនឹងចាប់ផ្ដើមធ្វើនៅវេលាម៉ោង ៩ព្រឹក ហើយប្រសិនបើសាលក្រមមានពិរុទ្ធភាពនោះ ការប្រកាសអំពីសំណងទៅដល់ជនរងគ្រោះ ក៏នឹងធ្វើឡើងនៅពេលនោះដែរបាទ»។
ជនរងគ្រោះ និងជាតំណាងដើមបណ្ដឹងរដ្ឋប្បវេណីជាច្រើននាក់ កំពុងតែទន្ទឹងរង់ចាំយុត្តិធម៌តាមរយៈការប្រកាសសាលក្រមរបស់សាលាក្ដីខ្មែរក្រហម លើសំណុំរឿងលេខ០០២ នេះ ដែលនឹងប្រកាសនៅព្រឹកថ្ងៃព្រហស្បតិ៍ ទី៧ ខែសីហា ឆ្នាំ២០១៤។ ប៉ុន្តែទាក់ទងនឹងការផ្ដល់សំណង ពួកគាត់នៅតែទាមទារឲ្យមានការផ្ដល់ជាបុគ្គល លើសំណងផ្លូវចិត្ត និងសមូហភាព ដើម្បីផ្សះផ្សាផ្លូវចិត្តជនរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។