សាលាក្ដីខ្មែរក្រហមដែលធ្វើនៅថ្ងៃទី២៤ មិថុនា មិនបានស្ដាប់សក្ខីកម្មរបស់សាក្សី ឬអ្នកជំនាញដូចរាល់ដងទេ គឺអង្គជំនុំជម្រះងាកមកជជែកដេញដោលគ្នាអំពីឯកសារដែលពាក់ព័ន្ធទៅនឹងការចូលរួមចំណែករបស់ជនជាប់ចោទនៅក្នុងឧក្រិដ្ឋកម្ម ដែលពាក្យបច្ចេកទេសរបស់តុលាការហៅថា សហឧក្រិដ្ឋកម្មរួម (Joint Criminal Enterprise (JCE)។
នៅក្នុងពេលបើកសវនាការ ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសដល់ភាគីអំពីគោលបំណងសវនាការនេះថា មិនមែនជាសវនាការដេញដោលថា តើឯកសារណាមួយអាចទទួលយកបាន ឬមិនបាននោះទេ៖ «វាជាសវនាការមួយដែលភាគីលើកយកឯកសារសំខាន់ៗ ទាំងឯកសារដាក់បន្ទុក និងឯកសារដោះបន្ទុក ដើម្បីជាជំនួយដល់អង្គជំនុំជម្រះក្នុងការវាយតម្លៃលើតម្លៃនៃភស្តុតាង នៅពេលដែលអង្គជំនុំជម្រះធ្វើការថ្លឹងថ្លែងលើទម្ងន់នៃភស្តុតាងទាំងនោះ បន្ទាប់ពីសវនាការពិភាក្សាលើភស្តុតាងត្រូវបានបញ្ចប់។ ម្យ៉ាងទៀត សវនាការនេះក៏ជួយដល់សាធារណជនយល់បានកាន់តែច្បាស់នូវឯកសារដែលបានពិភាក្សាក្នុងពេលកន្លងមក ដោយសារតែសំណុំរឿងក្ដីនេះមានទំហំធំ ហើយស្មុគស្មាញ»។
លោកបញ្ជាក់បន្ថែមថា អង្គជំនុំជម្រះសាលាដំបូងបានជូនដំណឹងកាលពីថ្ងៃទី៣១ ខែឧសភា ឆ្នាំ២០១៣ ថា អង្គជំនុំជម្រះនឹងបង្ហាញឯកសារគន្លឹះសំខាន់ៗដែលភាគី និងអង្គជំនុំជម្រះយល់ថា ជាប់ពាក់ព័ន្ធបំផុតទៅនឹងសំណុំរឿង ០០២ វគ្គ ១ ហើយឯកសារនោះធ្លាប់ជជែកដេញដោលគ្នានៅចំពោះមុខអង្គជំនុំជម្រះរួចហើយ។
កន្លងមក សហព្រះរាជអាជ្ញា និងមេធាវីនាំមុខដើមបណ្ដឹងរដ្ឋប្បវេណី យល់ថា ឯកសារទាំងនេះមានប្រយោជន៍ជាជំនួយដល់អង្គជំនុំជម្រះក្នុងវាយតម្លៃភស្តុតាង។
សវនាការនៅថ្ងៃច័ន្ទ អង្គជំនុំជម្រះបានផ្ដល់ឱកាសរបស់ភាគីសហព្រះរាជអាជ្ញា និងមេធាវីនាំមុខដើមបណ្ដឹងរដ្ឋប្បវេណី ដើម្បីលើកយកឯកសារពាក់ព័ន្ធជនជាប់ចោទ នួន ជា និង ខៀវ សំផន ជូនអង្គជំនុំជម្រះ។ ឯកសារគន្លឹះទាំងនេះ គឺផ្ដោតលើអង្គហេតុនៃសហឧក្រិដ្ឋកម្មរួម ទម្រង់នៃការទទួលខុសត្រូវ និងតួនាទីរបស់ជនជាប់ចោទ។
ឯកសារដែលលើកឡើងដោយសហព្រះរាជអាជ្ញា នៅថ្ងៃទី២៤ មិថុនា គឺទាក់ទងនឹងផែនការជម្លៀសពលរដ្ឋដោយបង្ខំ ទាំងលើកទីមួយ និងទីពីរ ដែលជាឯកសារផ្លូវការបោះពុម្ពផ្សាយដោយបក្សកុម្មុយនិស្តកម្ពុជា មានដូចជា លក្ខន្តិកៈបក្ស និងទង់បដិវត្តន៍ អត្ថបទអ្នកស្រាវជ្រាវប្រវត្តិសាស្ត្រ និងសេចក្ដីថ្លែងការណ៍របស់ជនជនជាប់ចោទជាដើម។
សហព្រះរាជអាជ្ញាលើកឡើងថា ឯកសារទាំងនេះ ជាមនោគមវិជ្ជាស្នូលដល់ការចម្រាញ់ខ្មាំង និងជម្លៀសពលរដ្ឋស៊ីវិល។ ការជម្លៀស គឺយោងទៅលើការជម្លៀសនៅខេត្តកំពង់ចាម ក្រចេះ សៀមរាប ភូមិភាគបូព៌ា និរតី ជាពិសេសនៅឧត្ដុង្គ ឆ្នាំ១៩៧៣។ ក្នុងនេះក៏មានតេឡេក្រាមស្ដីពីការជម្លៀស និងសម្លាប់ជនស៊ីវិលនៅចុងឆ្នាំ១៩៧៤ និងសន្ទរកថារបស់ជនជាប់ចោទ ខៀវ សំផន ដែលឈានទៅដល់ការជម្លៀសលើកទីមួយ និងឯកសារដែលថា គាត់ក៏នៅក្នុងផែនការនោះដែរ។
សវនាការនឹងបន្តនៅថ្ងៃទី២៥ មិថុនា ទៀត ដោយផ្ដល់ឱកាសឱ្យភាគីមេធាវីនាំមុខដើមបណ្ដឹងរដ្ឋប្បវេណីជាអ្នកលើកឯកសារម្ដង។ បន្ទាប់ពីភាគីសហព្រះរាជអាជ្ញា អង្គជំនុំជម្រះនឹងផ្ដល់ឱកាសដល់មេធាវី និងជនជាប់ចោទ នួន ជា និង ខៀវ សំផន ឡើងឆ្លើយតបចំពោះឯកសារដែលលើកឡើងដោយភាគីសហព្រះរាជអាជ្ញា និងមេធាវីដើមបណ្ដឹងរដ្ឋប្បវេណី ដែលបន្ទុកលើភាគីខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។