ស៊ុយអែតផ្ដល់វិភាគទាន៣០លានក្រូណាដល់ភាគីអន្តរជាតិនៃសាលាក្ដីខ្មែរក្រហម
2014.07.10
ទិដ្ឋភាពក្នុងសវនាការនាថ្ងៃទី២៩ មិថុនា ២០០៩ នៅសាលាក្ដីខ្មែរក្រហម។
ប្រទេសស៊ុយអែត បានប្រកាសផ្តល់វិភាគទានចំនួន ៣០លានក្រូណា ប្រហាក់ប្រហែល ៤លាន ៥សែនដុល្លារសហរដ្ឋអាមេរិក ដល់ភាគីអន្តរជាតិ នៃអង្គជំនុំជម្រះវិសាមញ្ញក្នុងតុលាការកម្ពុជា ហៅកាត់ថា សាលាក្តីខ្មែរក្រហម សម្រាប់ឆ្នាំ២០១៤ និងឆ្នាំ២០១៥។
គិតសរុបជាមួយប្រាក់ជំនួយកន្លងមក បានបង្ហាញថា ប្រទេសស៊ុយអែត បានផ្តល់ជំនួយហិរញ្ញវត្ថុដល់សាលាក្តីខ្មែរក្រហមចំនួនជាង ១០លានដុល្លារសហរដ្ឋអាមេរិក ហើយ។
នៅក្នុងសេចក្តីប្រកាសព័ត៌មានរបស់សាលាក្តីខ្មែរក្រហម ថ្ងៃទី១០ កក្កដា ប្រកាសថា ប្រទេសស៊ុយអែត គឺជាប្រទេសម្ចាស់ជំនួយដ៏សំខាន់មួយរបស់សាលាក្តីខ្មែរក្រហម ហើយជាសមាជិកមួយក្នុងចំណោមក្រុមប្រទេសផ្តល់ជំនួយសំខាន់ៗរបស់សាលាក្តីខ្មែរក្រហម។
លោក ក្រាញ់ តូនី ប្រធានការិយាល័យរដ្ឋបាលស្តីទី និងលោក ឃ្នុត រូហ្សិនហក (Knut Rosandhaug) អនុប្រធានការិយាល័យរដ្ឋបាលនៃសាលាក្តីខ្មែរក្រហម ថ្លែងអំណរគុណចំពោះប្រទេសស៊ុយអែត ដែលបន្តផ្តល់ការគាំទ្រចំពោះសាលាក្តីខ្មែរក្រហម ដែលកំពុងស្វែងរកយុត្តិធម៌ជូនប្រជាជនកម្ពុជា។
កាលពីថ្ងៃទី២ កក្កដា កន្លងមក ប្រទេសអូស្ត្រាលី បានប្រកាសផ្តល់វិភាគទានចំនួន ៣លានដុល្លារសហរដ្ឋអាមេរិក ដល់ភាគីអន្តរជាតិ នៃសាលាក្តីខ្មែរក្រហមដែរ។ ប្រទេសអូស្ត្រាលី គឺជាប្រទេសម្ចាស់ជំនួយធំទីពីររបស់សាលាក្ដីខ្មែរក្រហម ហើយគាំទ្រសាលាក្ដីនេះចាប់តាំងពីពេលបង្កើតមក។
សាលាក្ដីខ្មែរក្រហម ត្រូវការថវិកាសរុបជាង ៣១លានដុល្លារ (៣១.៦) សម្រាប់ចំណាយក្នុងឆ្នាំ២០១៤។ ក្នុងនោះ ភាគីអន្តរជាតិត្រូវការចំនួន ២៥លាន ២សែនដុល្លារ ហើយភាគីជាតិត្រូវការ ៦លាន ៤សែនដុល្លារ។
មន្ត្រីនាំពាក្យរបស់សាលាក្ដីខ្មែរក្រហម លោក នេត្រ ភក្ដ្រា ឱ្យដឹងថា រហូតមកដល់ពេលនេះ ភាគីជាតិនៅខ្វះថវិកាជាង ២លានដុល្លារទៀត ដើម្បីបំពេញការងាររហូតដល់ចុងឆ្នាំ២០១៤។ ដោយឡែកខាងភាគីអន្តរជាតិ មិនមានបញ្ហារឿងថវិកាទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
ខ្មែរក្រហម
