ការកាត់ក្តីលើសំណុំរឿង ០០២ វគ្គ ២ នឹងចាប់ផ្ដើមនៅពេលឆាប់ៗខាងមុខនេះ ក្រោយពេលអង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា ឬហៅថា សាលាក្ដីខ្មែរក្រហម ចេញសាលក្រមលើសំណុំរឿង ០០២ វគ្គ ១ រួចហើយ។
នៅពេលចៅក្រមរៀបចំពិនិត្យនិងកាត់ក្តីលើសំណុំរឿង ០០២ វគ្គ ២ នេះ អង្គភាពគាំពារ ជនរងគ្រោះក៏មានគម្រោងជួបជុំដើមបណ្ដឹងរដ្ឋប្បវេណី និងអ្នកពាក់ព័ន្ធ ដើម្បីរៀបចំទាមទារសំណងទាក់ទងសំណុំរឿង ០០២ វគ្គ ២ ដែរ។
មនុស្សប្រមាណ ១០០នាក់ ដែលជាដើមបណ្ដឹងរដ្ឋប្បវេណីនិងអ្នកពាក់ព័ន្ធទាក់ទងសំណុំរឿង ០០២ វគ្គ ២ មានគម្រោងជួបប្រជុំគ្នានៅពាក់កណ្ដាលខែមិថុនា ដើម្បីពិភាក្សាផែនការទាមទារសំណង។
លោក ហង្ស វណ្ណៈ ប្រធានអង្គភាពគាំពារជនរងគ្រោះថ្លែងឲ្យដឹងនៅថ្ងៃទី៤ មិថុនា ថា ការជួបជុំនៅថ្ងៃទី១១ មិថុនា ខាងមុខ គឺមានសមាសភាពដើមបណ្ដឹងរដ្ឋប្បវេណី អង្គការសង្គមស៊ីវិល សមាគមជនរងគ្រោះ អាជ្ញាធរ និងម្ចាស់ជំនួយ ហើយពួកគេមកជួបជុំគ្នាដើម្បីកំណត់លើសំណើគម្រោងសំណងដែលមានផលប្រយោជន៍ដល់ជនរងគ្រោះនៃអតីតរបបខ្មែរក្រហម។
លោក ហង្ស វណ្ណៈ ឲ្យដឹងបន្ថែមថា អ្នកដែលមានសិទ្ធិទាមទារសំណងបានទាល់តែជាដើមបណ្ដឹងរដ្ឋប្បវេណី។ ក្នុងករណីដែលជនជាប់ចោទគ្មានលទ្ធភាពសងតាមការទាមទារនោះ គឺមានតែបង្កើតគម្រោងសំណងតែប៉ុណ្ណោះ។
សេចក្ដីប្រកាសព័ត៌មានរបស់សាលាក្ដីខ្មែរក្រហមចេញថ្ងៃទី៤ មិថុនា ទាក់ទងការចាប់ផ្ដើមធ្វើផែនការសម្រាប់គម្រោងសំណងលើសំណុំរឿង ០០២ វគ្គ ២ បានសរសេរជាអាទិ៍ថា អ្នកពាក់ព័ន្ធទាំងអស់ដែលមានចំណាប់អារម្មណ៍ស្ដីពីគម្រោងសំណងនៅចំពោះមុខសាលាក្ដីខ្មែរក្រហមត្រូវបានស្វាគមន៍ចូលរួមនៅក្នុងដំណើរការនោះ។ ដើមបណ្ដឹងរដ្ឋប្បវេណីអាចទាមទារសំណងជាលក្ខណៈសមូហភាព និងផ្លូវចិត្តបាន។
សេចក្ដីប្រកាសព័ត៌មានបានសរសេរថា ឧក្រិដ្ឋកម្មជាច្រើនដែលនឹងត្រូវដាក់បញ្ចូលនៅក្នុងសវនាការសំណុំរឿង ០០២ វគ្គ ២ នោះ មានដូចជា ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម។ អង្គភាពគាំពារជនរងគ្រោះ និងអង្គភាពសហមេធាវីនាំមុខ នឹងស្វះស្វែងបង្កើតឲ្យមានសំណើផ្សេងៗ ពាក់ព័ន្ធទៅនឹងព្យសនកម្មដែលជាផលវិបាកនៃឧក្រិដ្ឋកម្មដែលចោទប្រកាន់ និងបង្កើតឲ្យមានសំណងដល់ដើមបណ្ដឹងរដ្ឋប្បវេណី។
លោក អ៊ុំ រិទ្ធី ដែលជាជនរងគ្រោះមួយរូបក្នុងរបបខ្មែរក្រហម និងជាដើមបណ្ដឹងរដ្ឋប្បវេណីរស់នៅខេត្តសៀមរាប មានប្រសាសន៍ថា ទោះបីច្បាប់បានកំណត់ថា សំណងដល់ដើមបណ្ដឹងរដ្ឋប្បវេណីនៅសាលាក្ដីខ្មែរក្រហមមានតែត្រឹមជាសំណងផ្លូវចិត្ត និងសំណងសមូហភាពក៏ដោយ ប៉ុន្តែចំពោះរូបលោក និងដើមបណ្ដឹងរដ្ឋប្បវេណីមួយចំនួន គឺចង់បានសំណងជាក់ស្ដែង ជាប្រាក់ ឬទ្រព្យសម្បត្តិតែម្តង។
លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម មានប្រសាសន៍ថា ដើមបណ្ដឹងរដ្ឋប្បវេណីលើសំណុំរឿង ០០២ វគ្គ ២ មានជិត ៤.០០០នាក់ ហើយជនជាប់ចោទនៅក្នុងសំណុំរឿងនេះ មាន នួន ជា និង ខៀវ សំផន។ ចំពោះបទចោទវិញ មានទាក់ទងជាមួយបទប្រល័យពូជសាសន៍ប្រឆាំងជនជាតិចាម និងជនជាតិវៀតណាម អង្គហេតុទាក់ទងឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ។
លោក នេត្រ ភក្ត្រា បានឲ្យដឹងថា ការជំនុំជម្រះលើសំណុំរឿង ០០២ វគ្គ ២ អាចធ្វើនៅចុងឆ្នាំ២០១៤ នេះ។
កាលពីថ្ងៃទី២៩ ឧសភា សាលាក្ដីខ្មែរក្រហមបានចេញផ្សាយសេចក្ដីប្រកាសព័ត៌មានថា សាលក្រមលើសំណុំរឿង ០០២ វគ្គ ១ នឹងប្រកាសនៅថ្ងៃទី៧ សីហា ខាងមុខ។ បទចោទប្រកាន់នានានៅក្នុងសំណុំរឿង ០០២ វគ្គ ១ នោះផ្ដោតទៅលើឧក្រិដ្ឋកម្មប្រឆាំងមនុស្សជាតិ ដែលពាក់ព័ន្ធនឹងការផ្លាស់ទីលំនៅប្រជាជនដោយបង្ខំចេញពីភ្នំពេញ នៅខែមេសា ឆ្នាំ១៩៧៥ និងការផ្លាស់ប្រជាជនចេញពីតំបន់ផ្សេងៗ ក្នុងដំណាក់កាលក្រោយមកទៀត និងបទចោទទាក់ទងការសម្លាប់ទាហាននៃរបបសាធារណរដ្ឋខ្មែរនៅទួលពោធិ៍ជ្រៃ ក្នុងខេត្តពោធិ៍សាត់។
មកទល់ពេលនេះ គេមិនទាន់ដឹងថា ជនជាប់ចោទទាំង ២រូប មានពិរុទ្ធភាព និងត្រូវផ្ដន្ទាទោសកម្រិតណានៅឡើយទេ ប៉ុន្តែកន្លងមក ដើមបណ្ដឹងរដ្ឋប្បវេណីធ្លាប់ប្ដឹងនិងទាមទារឲ្យចៅក្រមផ្ដន្ទាទោសជាទម្ងន់ដាក់ពន្ធនាគារមួយជីវិត និងមានសំណងផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។