ការព្រួយបារម្ភគឺធ្វើតាមរយៈសេចក្ដីប្រកាសព័ត៌មានរបស់ក្រុមអ្នកការពារក្ដីជនសង្ស័យ ក្នុងសំណុំរឿងក្ដីលេខ ០០៤ ដែលមិនបញ្ចេញអត្តសញ្ញាណមួយរូប បន្ទាប់ពីសហចៅក្រមស៊ើបអង្កេតបន្តបដិសេធ មិនឱ្យមេធាវីការពារក្ដីទាំងនេះ បានមើលឯកសារសំណុំរឿង។
ក្រុមការពារក្ដីជនសង្ស័យក្នុងសំណុំរឿងក្ដីលេខ ០០៤ ដែលមានលោកមេធាវី មុំ លុជ្ស និងលោកមេធាវី ហ្គរ៉ាន ស៊្លូតធើរ (Goran Sluiter) បានសរសេរក្នុងសេចក្ដីប្រកាសព័ត៌មាន នៅថ្ងៃទី៨ មករា ថា ជនសង្ស័យត្រូវតែបានប្រាប់ឱ្យដឹងខ្លួនថា គាត់ជាប់សង្ស័យ ហើយបានមើលសំណុំរឿង។ ការបដិសេធមិនឱ្យគាត់មើលសំណុំរឿង គឺជាការមិនគោរពសិទ្ធិ និងប្រយោជន៍របស់គាត់។ ជាពិសេស ប៉ះពាល់សិទ្ធិរបស់ជនសង្ស័យក្នុងការទទួលបានការកាត់ក្ដីដោយយុត្តិធម៌ ព្រោះថា មានតែការបានមើលសំណុំរឿងទេ ដែលអាចឱ្យក្រុមអ្នកការពារក្ដី រៀបចំការការពារក្ដីបានល្អ និងមានប្រសិទ្ធភាព។
លើសពីនេះទៀត ការមើលឯកសារសំណុំរឿងជាការការពារផលប្រយោជន៍រដ្ឋបាលយុត្តិធម៌ ព្រោះបានអនុញ្ញាតឱ្យក្រុមការពារក្ដី បានចូលរួមក្នុងកិច្ចស៊ើបអង្កេត ដើម្បីធានានូវការស៊ើបអង្កេតមួយស្មើភាព និងមិនលំអៀង។
ក្រុមមេធាវីការពារក្ដីបញ្ជាក់ថា កិច្ចស៊ើបអង្កេតសំណុំរឿង ០០៤ គួរតែធ្វើក្នុងរូបភាពយុត្តិធម៌ និងមានតម្លាភាព បើមិនដូច្នេះទេ គួរទម្លាក់ចោលការស៊ើបអង្កេតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។