សាក្សី ឌុច បន្តបដិសេធភស្តុតាងនៅមន្ទីរស-២១ខ្លះថាជាភស្តុតាងត្រូវបានគេបង្កើតឡើង
2016.06.27
អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៧ ខែមិថុនា បានបញ្ចប់ការស្ដាប់ការផ្ដល់សក្ខីកម្មរបស់សាក្សី កាំង ហ្កេកអ៊ាវ ហៅ ឌុច អតីតប្រធានមន្ទីរស-២១។ សាក្សី ឌុច បន្តបដិសេធភស្តុតាងនៅអតីតសារមន្ទីរ ស-២១ ខ្លះថា ជាភស្តុតាងត្រូវបានគេបង្កើតឡើងនៅក្រោយថ្ងៃទី៧ ខែមករា ឆ្នាំ១៩៧៩ ដែលជាថ្ងៃរបបខ្មែរក្រហមដួលរលំ។
ការបដិសេធភស្តុតាងនេះ គឺសាក្សី កាំង ហ្កេកអ៊ាវ ហៅ ឌុច បញ្ជាក់នឹងសំណួររបស់មេធាវីការពារក្ដីជនជាប់ចោទ នួន ជា លោក វិកទ័រ កូប៉េ (Victor Koppe) មុនពេលបញ្ចប់សក្ខីកម្មអស់រយៈពេល ១២ថ្ងៃរបស់លោកនៅថ្ងៃទី២៧ មិថុនា នេះ៖ «នៅ ស-២១ រហូតដល់ថ្ងៃ៧ មករា គ្មានអាងជ្រមុជទឹក គ្មានក្ដារខៀន ហើយសរសេរស្អី វិន័យសន្តិបាល ដែលគេសរសេរជាអក្សរនេះ គ្មានទេ ហើយក៏គ្មានចំណាររបស់យួននៅលើឯកសាររបស់ ស-២១ ដែរ។ ឯចំណែកឯកសារក្រោយមកនេះ វាមាន។ ខ្ញុំបានបដិសេធហើយ តាំងពីសម័យស៊ើបអង្កេតម្ល៉េះ។ នៅសម័យស៊ើបអង្កេតខ្ញុំបានបដិសេធស្អី វិន័យសន្តិបាលទាំង ១០ខ»។
លោកថា ចំណុចដែលលោកបញ្ជាក់ថា មិនពិតនោះ គឺចំណុចដែលនិយាយទាក់ទងនឹងកម្ពុជា ក្រោម៖ «ចៅក្រម ម៉ាកសែល ឡឺម៉ុង (Marcel Lemonde) សួរថា យ៉ាងម៉េចបានជាអ្នកឯងថា មិនពិត? ខ្ញុំថា អាចំណុចទី៨នោះ ដែលថា កុំអាងយកកម្ពុជាក្រោមធ្វើជាលេសមិនឆ្លើយ មិនបាន។ ខ្ញុំថាគ្មានទេ។ ស-២១ អត់មានណែនាំពីរឿងទឹកដីកម្ពុជាក្រោមទៅដល់អ្នកសួរទេ ហើយឯអាងជ្រមុជទឹកស្អីហ្នឹង កុន ប៊ីហ្សូ (Francois Bizot) ថតទៅផ្សេងទៅ។ ឯចំណែកអាងជ្រមុជទឹករបស់ ផា ថា ចាន់ គាត់ឱ្យ វ៉ាន់ ណាត គូរនោះទៅផ្សេងទៅ។ តាមពិត វាគ្មានអាងជ្រមុជទឹកទេ។ ជាក់ស្ដែង គ្មានអីពិបាកយល់ទេ ចំណារជាអក្សរយួននៅលើឯកសារ ស-២១ ជាចំណារក្រោយ ៧ មករា»។
កាលពីថ្ងៃទី៩ មិថុនា សាក្សី ឌុច ធ្លាប់បដិសេធម្ដងហើយថា ឧបករណ៍ធ្វើទារុណកម្មខ្លះដែលមានតាំងនៅសារមន្ទីរប្រល័យពូជសាសន៍ទួលស្លែងសព្វថ្ងៃនេះ លោកមិនដែលឃើញទេ ពេលលោកធ្វើជាប្រធានគុកទួលស្លែង។
នៅពេលនេះ សាក្សី ឌុច ក៏បដិសេធឯកសារភាពយន្តរបស់ក្រុមអ្នកកាសែតកងទ័ពវៀតណាម គឺលោក ហូ វ៉ាន់តាយ ដែរ។ ក្រុមលោក ហូ វ៉ាន់តាយ ជាអ្នកចូលទៅដល់ និងថតទិដ្ឋភាពមន្ទីរ ស-២១ ឬគុកទួលស្លែងមុនគេ ក្រោយពេលដែលពួកខ្មែរក្រហមរត់ចោលទីនោះ នៅខែមករា ឆ្នាំ១៩៧៩។
លោក ឌុច ក៏ចាត់ទុកភាពយន្តឯកសាររបស់លោក ហូ វ៉ាន់តាយ ថាជាភាពយន្តឯកសារក្លែងបន្លំ។ ពេលលោកមកធ្វើទស្សនកិច្ចកម្ពុជា កាលពីខែកុម្ភៈ ឆ្នាំ២០០៩ លោក ហូ វ៉ាន់តាយ ប្រាប់អ្នកកាសែតថា លោកបានឃើញសាកសពជាប់ខ្នោះជារូបភាពរន្ធត់នៅទីនោះ។ លោកបានជួបកុមារដែលនៅរួចផុតពីការសម្លាប់នៅទីនោះ។ ពេលនោះហើយ ដែលលោក នង ចាន់ផល ចេញមកអះអាងថា លោកជាអតីតកុមារដែលសល់ពីស្លាប់នៅគុកទួលស្លែងនោះ។
ទោះជាបដិសេធពីខាងដើមក្ដី ចំណុចកុមារនៅរស់នេះ សាក្សី ឌុច ទទួលស្គាល់ថា លោក នង ចាន់ផល ពិតជាកុមារនៅគុកទួលស្លែងនោះ៖ «កាលនោះ លោកជំទាវ ខាត រ៉ាយស៍ (Silvia Cartwright) ថា គាត់ខំបញ្ចាំងរូបកូនក្មេងម្នាក់ស្រាត។ គាត់សួរថា អ្នកនេះ? ខ្ញុំសង្កេតមើលមុខជនរងគ្រោះនោះ ខ្ញុំឆ្ងល់។ បានចុងបញ្ចប់ខ្ញុំថា សុំឱ្យការិយាល័យសហព្រះរាជអាជ្ញារកសលាកបត្រ ស-២១ មកឱ្យខ្ញុំបញ្ជាក់អំពីម្ដាយ នង ចាន់ផល។ កាលនោះព្រះរាជអាជ្ញាខ្មែរ តាន់ សេណារ៉ុង យកសលាកបត្រ ស-២១ មកឱ្យខ្ញុំ។ ឃើញថាម្ដាយរបស់ នង ចាន់ផល ឈ្មោះអ្នកមីង មុំ យ៉ូវ ត្រូវបានចាប់មកនៅ ស-២១ មែន។ ខ្ញុំថា សុំទោស នង ចាន់ផល។ អ្នកឯងពិតជាមានតួនាទីនៅក្នុងកុនហ្នឹងមែន។ ខ្ញុំទទួលស្គាល់ថា អ្នកឯងកំព្រាអត់ម៉ែអត់ឪមែន។ ម៉ែឪអ្នកឯងត្រូវស្លាប់នៅ ស-២១ មែន។ ឯចំណែកកុនរបស់ ហូ វ៉ាន់តាយ ធ្វើហ្នឹង គឺជាការក្លែងបន្លំ»។
លោក ឌុច ត្រូវសាលាក្ដីខ្មែរក្រហមផ្ដន្ទាទោសឱ្យជាប់ពន្ធនាគារអស់មួយជីវិតក្នុងតួនាទីរបស់លោកជាប្រធានមន្ទីរ ស-២១ ឬគុកទួលស្លែង ដែលមានអ្នកទោសជាង ១ម៉ឺន ២ពាន់នាក់ ត្រូវបានពួកលោកយកទៅសម្លាប់។ សាលាដំបូងបានកោះហៅលោក ឌុច ឱ្យមកធ្វើជាសាក្សីរយៈពេល ១២ថ្ងៃកន្លងមកនេះ នៅក្នុងសំណុំរឿង ០០២ វគ្គ ២ ប្រឆាំងនឹងជនជាប់ចោទ នួន ជា និង ខៀវ សំផន ទាក់ទងនឹងការបញ្ជាលើមន្ទីរ ស-២១។ បន្ទាប់បីសាក្សី ឌុច អង្គជំនុំជម្រះសាលាដំបូងនឹងស្ដាប់សក្ខីកម្មរបស់ជនរងគ្រោះជាដើមបណ្ដឹងរដ្ឋប្បវេណីមួយរូបនៅអង្គារ ទី២៨ ខែមិថុនា៕