អង្គជំនុំជម្រះវិសាមញ្ញក្នុងតុលាការកម្ពុជា ឬហៅថា សាលាក្ដីខ្មែរក្រហម បានចេញសេចក្ដីប្រកាសមួយថា សាលក្រមសំណុំរឿង ០០២ វគ្គ ១ ពាក់ព័ន្ធ នួន ជា និង ខៀវ សំផន នឹងត្រូវប្រកាសនៅខែសីហា ខាងមុខ។ សវនាការលើសំណុំរឿង ០០២ វគ្គ ១ បានចាប់ផ្ដើមតាំងពីខែវិច្ឆិកា ឆ្នាំ២០១១ និងបានដេញដោលធ្វើសេចក្ដីសន្និដ្ឋានបញ្ចប់ កាលពីខែតុលា ឆ្នាំ២០១៣ កន្លងទៅ។
សេចក្ដីប្រកាសព័ត៌មានរបស់សាលាក្ដីខ្មែរក្រហម បានលើកឡើងថា នៅក្នុងថ្ងៃអង្គជំនុំជម្រះសាលាដំបូងនៃសាលាក្ដីខ្មែរក្រហមប្រកាសសាលក្រម ទី៧ សីហា នោះ បើសិនជារកឃើញថា ជនជាប់ចោទទាំង ២ គឺ នួន ជា និង ខៀវ សំផន មានពិរុទ្ធភាព នោះសេចក្ដីសម្រេចអំពីការផ្ដន្ទាទោស និងការទាមទារសំណងរបស់ដើមបណ្ដឹងរដ្ឋប្បវេណី ក៏នឹងត្រូវប្រកាសនៅពេលនោះដែរ។
ជនជាប់ចោទនៅក្នុងសំណុំរឿង ០០២ វគ្គ ១ រួមមាន នួន ជា អតីតអនុលេខាបក្សកុម្មុយនិស្តកម្ពុជា និង ខៀវ សំផន អតីតប្រមុខរដ្ឋនៃកម្ពុជាប្រជាធិបតេយ្យ។ បទចោទប្រកាន់នានា នៅក្នុងសំណុំរឿង ០០២ វគ្គ ១ នោះ ផ្ដោតទៅលើឧក្រិដ្ឋកម្មប្រឆាំងមនុស្សជាតិ ដែលពាក់ព័ន្ធនឹងការផ្លាស់ទីលំនៅប្រជាជនដោយបង្ខំចេញពីភ្នំពេញ នៅខែមេសា ឆ្នាំ១៩៧៥ និងការផ្លាស់ប្រជាជនចេញពីតំបន់ផ្សេងៗ ក្នុងដំណាក់កាលក្រោយមកទៀត។ បទចោទទាក់ទងការសម្លាប់ទាហាននៃរបបសាធារណរដ្ឋខ្មែរ នៅទួលពោធិ៍ជ្រៃ ក្នុងខេត្តពោធិ៍សាត់។
លោក នេត្រ ភក្ត្រា អ្នកនាំពាក្យសាលាក្ដីខ្មែរក្រហមមានប្រសាសន៍នៅថ្ងៃទី២៩ ឧសភា ថា ការគ្រោងប្រកាសសាលក្រមនៅខែសីហា នេះ ដោយសារចៅក្រមត្រូវការពេលវេលាសិក្សាសរុបលទ្ធផលសវនាការមុននឹងសរសេរសាលក្រមប្រកាសចេញ៖ «ការប្រកាសសាលក្រមនៅក្នុងខែ៨នេះ គឺបន្ទាប់ពីចៅក្រមជំនុំជម្រះលោកបានពន្លឿនកិច្ចការក្នុងការសរសេរសាលក្រម ហើយនៅក្នុងរយៈពេល ១ខែ ខាងមុខទៀតនេះ គឺចៅក្រមបានប្រមើលឃើញថា យើងនឹងអាចបញ្ចប់»។
លោក នេត្រ ភក្ត្រា បានឲ្យដឹងបន្ថែមថា នៅក្នុងសំណុំរឿង ០០២ វគ្គ ១ មានដើមបណ្ដឹងរដ្ឋប្បវេណីដាក់ពាក្យចំនួនជិត ៤.០០០នាក់។ មកទល់ពេលនេះ គេមិនទាន់ដឹងថា ជនជាប់ចោទទាំង ២រូប មានពិរុទ្ធភាព និងត្រូវផ្ដន្ទាទោសកម្រិតណានៅឡើយទេ ប៉ុន្តែកន្លងមក ដើមបណ្ដឹងរដ្ឋប្បវេណីធ្លាប់ប្ដឹង និងទាមទារឲ្យចៅក្រមផ្ដន្ទាទោសជាទម្ងន់ដាក់ពន្ធនាគារមួយជីវិតនិងមានសំណងផង៖ «នៅក្នុងករណីមានពិរុទ្ធភាព សំណងដែលផ្ដល់ឲ្យនេះ គឺមានសំណងផ្លូវចិត្ត និងសំណងជាសមូហភាព។ ហើយគម្រោងសំណងនេះ គឺមាន ១៣ ដែលបានស្នើទៅកាន់អង្គជំនុំជម្រះយូរហើយ។ ដូចជាការកំណត់ទិវាជាតិនៃការចងចាំដោយយកថ្ងៃ២០ ឧសភា ការកសាងស្តូបដើម្បីរំលឹកទៅដល់វិញ្ញាណក្ខន្ធជនរងគ្រោះ ក៏ដូចជាផ្សេងៗទៀត»។
ចំពោះស្ថានភាពសុខភាពជនជាប់ចោទវ័យជរាទាំង ២នាក់នោះ លោក នេត្រ ភក្ត្រា បានឲ្យដឹងថា សុខភាពពួកគាត់ធម្មតា ដោយមានពេទ្យថែទាំ ដើម្បីឲ្យពួកគាត់អាចចូលរួមក្នុងដំណើរការសវនាការស្ដាប់ការប្រកាសសាលក្រមលើសំណុំរឿង ០០២ វគ្គ ១ និងចូលរួមក្នុងសវនាការបន្តលើសំណុំរឿង ០០២ វគ្គ ២ ជាបន្តទៀត។
ព័ត៌មានស្ដីពីគម្រោងប្រកាសសាលក្រមលើជនជាប់ចោទ នួន ជា និង ខៀវ សំផន នេះ ធ្វើឲ្យលោក ប៊ូ ម៉េង អតីតអ្នកទោសខ្មែរក្រហមជាប់ឃុំក្នុងគុកទួលស្លែង មានការសប្បាយចិត្ត ពីព្រោះ លោកសង្ឃឹមថា លោកបានឃើញជនប្រព្រឹត្តខុសត្រូវទទួលទោសតាមច្បាប់ មិនអាចគេចផុតពីសំណាញ់ច្បាប់ទេ៖ «ខ្ញុំថាអ៊ីចេះ ថ្នាក់ខាងលើនេះក៏ដូចជា ឌុច ដែរ។ ឧបមាថា បើ ឌុច រួចទោសពីការកាប់សម្លាប់ អ្នកខាងលើនេះក៏រួចទោស បើ ឌុច ជាមេប្រធានគុក ស្ដាប់បង្គាប់អ្នកខាងលើនេះ ទាំង ២ ទាំង ៣នាក់ហ្នឹង ឌុច ជាប់យ៉ាងណា អ្នកខាងលើជាប់យ៉ាងហ្នឹងដែរ។ ឌុច ទទួលបញ្ជាពីអ្នកខាងលើ អ៊ីចឹង ឌុច ជាប់មួយជីវិត ប្រហែលជា ឌុច ជាប់មួយជីវិតដែរ»។
ចំណែកមន្ត្រីសង្គមស៊ីវិលដែលតាមដានសង្កេតការណ៍កាត់ក្ដីនៅសាលាក្ដីខ្មែរក្រហម លោក ឡាត់ គី ធ្វើការនៅសមាគមការពារសិទ្ធិមនុស្សអាដហុក (ADHOC) មានប្រសាសន៍ថា ទោះបីប្រជាពលរដ្ឋធ្លាប់បានលើកឡើងថា ដំណើរការកាត់ក្ដីនៅសាលាក្ដីខ្មែរក្រហមនេះយឺតយូរ ប៉ុន្តែដំណឹងអំពីការប្រកាសសាលក្រមនេះ គឺជាដំណឹងមួយដែលមនុស្សទាំងអស់ចង់ដឹង។
ការជំនុំជម្រះក្ដីសំណុំរឿង ០០២ វគ្គ ១ ចាប់ផ្ដើមឡើងកាលពីថ្ងៃទី២១ ខែវិច្ឆិកា ឆ្នាំ២០១១ ជាមួយការធ្វើសេចក្ដីសន្និដ្ឋានបើកការសួរដេញដោលធ្វើឡើងដោយសហព្រះរាជអាជ្ញា និងមេធាវីតំណាងដើមបណ្ដឹងរដ្ឋប្បវេណី និងជនជាប់ចោទ។ ដំណើរការជំនុំជម្រះក្ដីនេះបានប្រើរយៈពេល ២០ខែដោយផ្ដោតលើសវនាការលើភស្តុតាងដែលបានបញ្ចប់កាលពីថ្ងៃទី២៣ ខែកក្កដា ឆ្នាំ២០១៣។ សំណុំរឿង ០០២ វគ្គ ១ នេះ បានធ្វើសេចក្ដីសន្និដ្ឋានបិទបញ្ចប់ការសួរដេញដោលនៅអំឡុងខែតុលា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។