អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី១៥ ខែមិថុនា បានបន្តស្ដាប់សាក្សីមួយរូបទាក់ទងនឹងអង្គហេតុការងារដោយបង្ខំនៅការដ្ឋានសាងសង់វាលយន្តហោះក្នុងខេត្តកំពង់ឆ្នាំង។ សាក្សីឈ្មោះ កែវ លឿ ជាអតីតជាមេបញ្ជាការអនុសេនាធំ អង្គភាពយោធាពិការ "ក៤" ក្នុងកងពល ៣១០។
សាក្សីឈ្មោះ កែវ លឿ បានជម្រាបអង្គជំនុំជម្រះសាលាដំបូងថា លោកបានឮអំពីឈ្មោះគុកថា ស-២១ នៅក្នុងរបបខ្មែរក្រហម។
អតីតមេបញ្ជាការអនុសេនាធំរូបនេះ រំលឹកថា លោកបានឮឈ្មោះគុកនេះ គឺក្នុងពេលប្រជុំរៀនសូត្រ បន្ទាប់ពីពួកកម្មាភិបាលខ្មែរក្រហមមកពីភូមិភាគនិរតី ចាប់មេបញ្ជាការរបស់លោក ឈ្មោះ អឿន និង គឹម នៅកងពល ៣១០៖ «នៅពេលនោះគេមិនបានប្រាប់ថា យកចម្លើយមកពីណាទេ គ្រាន់តែប្រាប់ថា នេះជាចម្លើយមេៗ ពួកអស់ឯង។ ប្រុងចាំស្ដាប់។ ក្រោយមកទើបដឹងថា នេះជាសំឡេងថ្នាក់ដឹកនាំរបស់ខ្លួន។ ស្ដាប់សំឡេងខ្សែអាត់រួចហើយ ពួកគេបានប្រកាសថា មិត្តទាំងអស់គ្នា មេៗ របស់មិត្តឯងយកទៅ ស-២១»។
លោកជម្រាបអង្គជំនុំជម្រះថា ក្រោយការចាប់ខ្លួនមេបញ្ជាការអស់លោកត្រូវបានកម្មាភិបាលថ្នាក់ លើបញ្ជូនទៅធ្វើការលត់ដំនៅការដ្ឋានសាងសង់វាលយន្តហោះក្នុងខេត្តកំពង់ឆ្នាំង។ នៅទីនោះក្រោមការគ្រប់គ្រងរបស់ភូមិភាគនិរតី លោកថ្លែងថា ការធ្វើការងារមានស្ថានភាពលំបាក និងមានអាហារហូបចុកមិនគ្រប់គ្រាន់ ហើយក៏មានការចាប់ខ្លួនដែរ៖ «ខ្ញុំបាទដូចជាមិនដែលបានឃើញលោក នួន ជា និង ខៀវ សំផន ទេ។ ពួកអ្នកនៅដឹកនាំ គឺអ្នកមកពីនិរតី មិនដែលហ៊ានមើលមុខគេផង។ សំណួរ៖ «ក្នុងពេលប្រជុំ លោកមានធ្លាប់ឃើញគេចាប់ខ្លួនមនុស្ស ហើយយកចេញទៅទេ? បាទ! ធ្លាប់ឃើញ ហើយនាំចេញទៅ មិនដែលឃើញវិលវិញទេ អ្នកដែលចាប់ខ្លួនទៅ»។
សាក្សី កែវ លឿ ថ្លែងទៀតថា រឿងហេតុដែលកើតឡើងនោះ គឺដោយសារតែមេកងពលលេខ ៣១០ របស់លោក ឈ្មោះ តា អឿន និង តា គឹម មានផែនការក្បត់ និងប្រុងវាយប្រហាររបបកម្ពុជាប្រជាធិបតេយ្យ។ មេរបស់លោក គឺតា អឿន ថា បើចង់ឱ្យទ័ពមានប្រាក់ខែសុខស្រួល ត្រូវវាយបកកម្ពុជាប្រជាធិបតេយ្យ។
សាក្សី កែវ លឿ នឹងត្រូវផ្ដល់សក្ខីកម្មបន្តទៀត នៅព្រឹកថ្ងៃទី១៦ មិថុនា។ ប្រធានអង្គជំនុំជម្រះសាលាដំបូង លោកចៅក្រម និល ណុន ប្រកាសថា បន្ទាប់ពីសាក្សី កែវ លឿ ដោយសារតែមានបញ្ហាក្នុងការរៀបចំអង្គជំនុំជម្រះអាចនឹងធ្វើសវនាការស្ដាប់សាក្សីមួយរូប ដែលមានរហស្សនាមថា 2TCW830 ទាក់ទងនឹងការដ្ឋានទំនប់ ១ មករា នៅខេត្តកំពង់ធំ សិន។ បន្ទាប់មក អង្គជំនុំជម្រះ នឹងត្រឡប់មកស្ដាប់សាក្សីទាក់ទងនឹងការដ្ឋានសាងសង់វាលយន្តហោះនៅខេត្តកំពង់ឆ្នាំងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។