ការិយាល័យរដ្ឋបាលនៃសាលាក្ដីខ្មែរក្រហម ចាប់ផ្ដើមចែកចាយសៀវភៅសាលក្រមសំណុំរឿងលេខ ០០២ វគ្គ ១ ជាលើកដំបូង ក្រោយពេលដែលអង្គជំនុំជម្រះសាលាដំបូងប្រកាសសេចក្ដីសម្រេចឱ្យជនជាប់ចោទ នួន ជា និង ខៀវ សំផន ជាប់គុកអស់មួយជីវិត កាលពីថ្ងៃទី៧ ខែសីហា ឆ្នាំ២០១៤។ ការិយាល័យរដ្ឋបាលនៃសាលាក្ដីខ្មែរក្រហម ចាប់ផ្ដើមចែកផ្សព្វផ្សាយសៀវភៅសាលក្រម និងសាលដីកាដល់និស្សិតសកលវិទ្យាល័យប្រមាណ ៣០០នាក់ កាលពីព្រឹកថ្ងៃទី១២ ខែឧសភា។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា បញ្ជាក់ថា ការចែកសៀវភៅសាលក្រម និងសាលដីកាដល់និស្សិតផ្នែកច្បាប់ ចៅក្រម និងមេធាវី គឺដើម្បីជាឯកសារសំខាន់ដល់ការស្រាវជ្រាវរបស់អ្នកសិក្សាក្នុងវិស័យតុលាការ និងច្បាប់៖ «ការចែកសៀវភៅសាលក្រមនេះទៅដល់និស្សិត ក៏ដូចជានិស្សិតចៅក្រម និស្សិតច្បាប់ផ្សេងៗ និស្សិតមេធាវី គឺដើម្បីឱ្យពួកគាត់យកទៅសិក្សាអំពីកិច្ចការ ដែលតុលាការបានធ្វើ ជាពិសេសគឺខាងផ្នែកយុត្តិសាស្ត្រ បទពិសោធន៍ការងារនៅកន្លែងនេះ។ ទីពីរក៏ចង់ឱ្យពួកគាត់បានដឹងផងដែរអំពីដំណើរការនៃប្រវត្តិសាស្ត្រ បន្ទាប់ពីការជំនុំជម្រះក្ដីទៅ គឺព័ត៌មានត្រូវបានចងក្រងចេញជាសាលក្រមនេះ គឺជាឯកសារប្រវត្តិសាស្ត្រដ៏មានតម្លៃសម្រាប់ពួកគាត់ធ្វើការសិក្សា ហើយទីបី គឺមើលអំពីនីតិវិធីផ្សេងៗ ដែលគេមានលើកឡើងនៅក្នុងសវនាការនេះ ដើម្បីផ្ដល់បទពិសោធន៍បន្ថែមទៅដល់គាត់នៅក្នុងពេលសិក្សា និងអនុវត្តន៍ការងារ»។
លោកថ្លែងថា ការចែកនេះ គឺជាការចាប់ផ្ដើមលើកទីមួយ ក្នុងគម្រោងចែកផ្សព្វផ្សាយទូទៅដល់ក្រសួងស្ថាប័ន សកលវិទ្យាល័យ អង្គការក្រៅរដ្ឋាភិបាល និងដើមបណ្ដឹងរដ្ឋប្បវេណី នៅខេត្ត ក្រុងចំនួន ២៥។ ការចែកនេះ ក៏ជាការលើកទឹកចិត្តឱ្យមានការសិក្សាបន្ថែម និងស្វែងយល់កាន់តែច្បាស់អំពីសំណុំរឿងលេខ ០០២ វគ្គទី ១ (០០២/០១)។
ស្របនឹងគោលបំណងនេះ និស្សិតនៃសកលវិទ្យាល័យបញ្ញាសាស្ត្រមួយរូប គឺលោក យ៉ុង ហេង យល់ថា សៀវភៅសាលក្រម និងសាលដីកា ដែលលោកបានទទួលនេះ គឺអាចជួយឱ្យលោកយល់ថែមទៀតអំពីការជំនុំជម្រះរបស់ក្ដីសាលាក្ដី លើអតីតមេដឹកនាំជាន់ខ្ពស់ខ្មែរក្រហមក្នុងរបបកម្ពុជាប្រជាធិបតេយ្យ៖ «យើងមកអ៊ីចឹង ក៏បានរៀនសូត្របានច្រើនពីសាលាក្ដីខ្មែរក្រហម ហើយចំពោះឯកសារដែលខ្ញុំបានពីរក្បាលនៅដៃស្ដាំហ្នឹង គឺខ្ញុំគិតថា នៅក្នុងនេះ វាទាក់ទងជាមួយការបើកសវនាការជម្រះក្ដីតាំងពីវគ្គទី១ វគ្គទី២ គឺតាំងពីសំណុំរឿង ០០១ និង ០០២។ អ្វីដែលខ្ញុំទន្ទឹងហ្នឹង គ្រាន់តែចង់បានជាទិន្នន័យមួយទាក់ទងអំពីសាលាក្ដីខ្មែរក្រហម ឬដែលគេហៅថា សាលាក្ដីកូនកាត់នេះតែប៉ុណ្ណោះ»។
ទោះជាដូច្នេះក្ដី មានដើមបណ្ដឹងរដ្ឋប្បវេណីក្នុងសំណុំរឿងលេខ ០០២ ខ្លះ ដូចជាលោក ហេង ប៊ុនណែត មិនបានសាទរចំពោះសាលក្រម ដែលអង្គជំនុំជម្រះបានចេញនេះទេ ព្រោះមានតែសំណងសមូហភាព គឺមិនមានសំណងជាបុគ្គលសម្រាប់ដើមបណ្ដឹងរដ្ឋប្បវេណី៖ «ថាសមូហភាពក៏សមូហភាពចុះ ប៉ុន្តែសមូហភាពហ្នឹងធ្វើម៉េចឱ្យបានផលប្រយោជន៍ដល់បុគ្គលធ្វើជាដើមបណ្ដឹងរដ្ឋប្បវេណីផង។ ឧទាហរណ៍ថា មានកន្លែងឧក្រិដ្ឋកម្មមួយ ដែលយើងធ្វើស្តូបទៅហើយ យើងនឹងធ្វើទីតាំងស្អាតបាតហើយ ប៉ុន្តែនៅពេលភ្ញៀវបរទេសគាត់ចេញចូល យើងត្រូវលក់សំបុត្រ។ ពេលលក់សំបុត្រ ថវិកាហ្នឹងត្រូវធ្វើម៉េចបានដល់ដើមបណ្ដឹងរដ្ឋប្បវេណី»។
លោក នេត្រ ភក្ត្រា បញ្ជាក់បន្ថែមថា សាលក្រមលើសំណុំរឿងលេខ ០០២ វគ្គ ១ ដែលមានកម្រាស់ ៩៨១ ទំព័រនេះ មិនទាន់ចាត់ទុកថា ជាសាលក្រមស្ថាពរទេ ពីព្រោះភាគីជនជាប់ចោទកំពុងប្ដឹងជំទាស់ទៅតុលាការកំពូលនៅឡើយ។
ទន្ទឹមគ្នានេះ សាលដីកានៃសំណុំរឿងលេខ ០០១ ដែលផ្ដន្ទាទោសប្រធានគុកទួលស្លែង ឈ្មោះ កាំង ហ្កេកអ៊ាវ ហៅ ឌុច ដាក់គុកអស់មួយជីវិត ក៏ត្រូវបានសាលាក្ដីចែករួមគ្នាដែរ។
សំណុំរឿងលេខ ០០២ វគ្គ ១ មានជនជាប់ចោទពីររូប គឺជនជាប់ចោទ នួន ជា និងជនជាប់ចោទ ខៀវ សំផន។ ជនជាប់ចោទទាំងពីរ ត្រូវបានអង្គជំនុំជម្រះសាលាដំបូង សម្រេចផ្ដន្ទាទោសដាក់គុកអស់មួយជីវិត កាលពីថ្ងៃទី៧ ខែសីហា ឆ្នាំ២០១៤ ក្រោមបទចោទថា បានប្រព្រឹត្តឧក្រិដ្ឋកម្មប្រឆាំងមនុស្សជាតិ ដូចជាការសម្លាប់រង្គាល ការធ្វើមនុស្សឃាត ការធ្វើទុកបុកម្នេញមូលហេតុនយោបាយ និងអំពើអមនុស្សធម៌ ដូចជា ការផ្លាស់លំនៅដោយបង្ខំ ការបាត់ខ្លួនដោយបង្ខំ និងការប៉ះពាល់សេចក្ដីថ្លៃថ្នូររបស់មនុស្ស។ ក្នុងពេលដែលរង់ចាំការសម្រេចពីតុលាការកំពូលលើបណ្ដឹងឧទ្ធរណ៍ អង្គជំនុំជម្រះសាលាដំបូងកំពុងធ្វើសវនាការលើជនជាប់ចោទទាំងពីរ បន្តវគ្គទី ២ ទៀត ក្នុងអង្គហេតុទាក់ទងនឹងសហករណ៍ត្រាំកក់ និងមន្ទីរសន្តិសុខក្រាំងតាចាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។