អង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្ដីខ្មែរក្រហម ជូនដំណឹងពីការបន្តសវនាការដេញដោលលើវត្ថុតាងក្នុងសំណុំរឿង ០០២ វគ្គ ២ នៅថ្ងៃទី៣០ វិច្ឆិកា ដើមសប្ដាហ៍ក្រោយ។
សេចក្ដីប្រកាសព័ត៌មានរបស់សាលាក្ដីខ្មែរក្រហមអោយដឹងថា អង្គជំនុំជម្រះនឹងស្ដាប់សាក្សីមួយរូបទាក់ទងនឹងការដ្ឋានត្រពាំងថ្ម។
បន្ទាប់ទៅទៀត អង្គជំនុំជម្រះសាលាដំបូងនឹងស្ដាប់ភស្តុតាងទាក់ទងនឹងការចោទប្រកាន់ចំពោះការអនុវត្តប្រឆាំងនឹងជនជាតិវៀតណាម ក្នុងរយៈកាលនៃរបបកម្ពុជាប្រជាធិបតេយ្យ។
សេចក្ដីប្រកាសព័ត៌មានដដែលអោយដឹងថា សាក្សី និងដើមបណ្ដឹងរដ្ឋប្បវេណីចំនួន ១០រូប នឹងផ្ដល់សក្ខីកម្មក្នុងផ្នែកនេះ។
សំណុំរឿង ០០២ វគ្គ ២ គឺជាការជំនុំជម្រះដំណាក់កាលទី២ លើជនជាប់ចោទ នួន ជា និង ខៀវ សំផន។ សំណុំរឿងនេះមានបទចោទពីអំពើប្រល័យពូជសាសន៍លើជនជាតិចាម វៀតណាម ការបង្ខំរៀបការ រំលោភផ្លូវភេទ ការបោសសំអាតផ្ទៃក្នុង ការប្រព្រឹត្តលើពុទ្ធសាសនិក និងអតីតអ្នករដ្ឋការនៃរបបសាធារណរដ្ឋខ្មែរ និងឧក្រិដ្ឋកម្មនៅមន្ទីរសន្តិសុខចំនួន ៤ ការដ្ឋានចំនួន ៣ និងសហករណ៍មួយ។
ទាក់ទិននឹងសាលាក្ដីខ្មែរក្រហមនេះដែរ រដ្ឋាភិបាលជប៉ុន ប្រកាសផ្ដល់ថវិកាបន្ថែមចំនួនជាង ១,២លាន (១.២២១.២១៨) ដុល្លារ ដល់ភាគីអន្តរជាតិ។ គិតមកដល់ពេលនេះ ជំនួយថវិការបស់រដ្ឋាភិបាលជប៉ុន ដែលបានផ្ដល់ដល់សាលាក្ដីនេះមានចំនួនសរុបជាង ៨៣លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។