អង្គជំនុំជម្រះសាលាដំបូងនៅថ្ងៃទី១៦ មិថុនា បានបញ្ចប់ការស្ដាប់សក្ខីកម្មរបស់សាក្សី កែវ លឿ ស្ដីពីការដ្ឋានសាងសង់វាលយន្តហោះនៅខេត្តកំពង់ឆ្នាំង ហើយងាកមកសក្ខីកម្មសាក្សីស្ដីពីការដ្ឋានការងារដោយបង្ខំនៅការដ្ឋានធ្វើទំនប់ ១ មករា នៅខេត្តកំពង់ធំ វិញ។ សាក្សីរូបនេះ បដិសេធការពាក់ព័ន្ធនឹងការសម្លាប់មនុស្ស។
សាក្សីឈ្មោះ យៀន លន់ ដែលអង្គជំនុំជម្រះសាលាដំបូងនៃសាលាក្ដីខ្មែរក្រហមស្ដាប់សក្ខីកម្មនៅថ្ងៃទី១៦ មិថុនា គឺជាអតីតកងឈ្លបមួយរូប នៅភូមិកងសៅ ក្នុងឃុំកំពង់ថ្ម ខេត្តកំពង់ធំ។
សាក្សីរូបនេះ បដិសេធចំពោះការចោទប្រកាន់របស់សាក្សីផ្សេងទៀតដែលថា រូបលោកជាពេជ្ឈឃាដខ្មែរក្រហមមួយរូបនៅភូមិកងសៅ ក្នុងខេត្តកំពង់ធំ កាលពីក្នុងរបបខ្មែរក្រហម៖ «គាត់ថា ហ្នឹង គឺខុសខ្លះត្រូវខ្លះ។ ស្អប់ចំពោះបុគ្គល គឺបុគ្គលណាស្អប់គឺថាទៅ ទោះជារឿងហ្នឹងមិនច្បាស់ក៏ថាទៅ ផ្សំផ្គុំឱ្យបានធំទៅ។ អានេះ គឺអ៊ីចឹង។ សំណួរ៖ ប៉ុន្តែគាត់បានហៅលោកថា ជាមេពេជ្ឈឃាដ តើលោកពិតជាពេជ្ឈឃាដមែនទេ? ខ្ញុំអត់ទេ។ ខ្ញុំអត់ទួលទេ។ ខ្ញុំអត់មានមេ រឿងពេជ្ឈឃាដ គឺអត់ទេ។ ខ្ញុំអត់ទទួលមេពេជ្ឈឃាដអីទេ ព្រោះគាត់មិនដឹងនរណាមេ គាត់ចេះតែថាខ្ញុំមេទៅ។ ចម្លើយហ្នឹង ខ្ញុំមិនទទួលថាត្រឹមត្រូវទេ»។
ការបដិសេធរបស់លោក យៀន លន់ គឺឆ្លើយតបទៅនឹងការចោទប្រកាន់របស់សាក្សីឈ្មោះ អ៊ុត សេង ដែលកាលពីថ្ងៃទី៣ មិថុនា បានជម្រាបអង្គជំនុំជម្រះសាលាដំបូងថា លោក យៀន លន់ គឺជាអ្នកសម្លាប់មនុស្សលេចមុខជាគេ នៅភូមិកងសៅ ក្នុងខេត្តកំពង់ធំ៖ «ព្រោះគាត់ជាមេឈ្លបនៅសង្កាត់កំពង់ថ្ម ហើយការសម្លាប់ដូចខ្ញុំនិយាយអ៊ីចឹង គឺថា មានដាវមានដំបងប្រឡាក់ឈាមដាក់តាមកង់ហ្នឹង គឺដូចគំរាមអ្នកដទៃឱ្យខ្លបខ្លាចអ៊ីចឹងដែរ។ ហៅកាត់ថា ជាមេពេជ្ឈឃាដអ៊ីចឹងមែនទេ? បាទ! គឺមែន ព្រោះនៅឃុំកំពង់ថ្ម គឺមានតែគាត់ម្នាក់ហ្នឹង ដែលបង្ហាញពីឥទ្ធិពល បង្ហាញពីភាពខ្លាំងក្លា ដែលមានដំបងមានដាវជាមេពេជ្ឈឃាដ។ គាត់បង្ហាញចរិតជាអ្នកខ្លាំងក្លា»។
សាក្សី អ៊ុត សេង ថ្លែងទៀតថា ក្រុមឈ្លបរបស់លោក យៀន លន់ មិនសូវទៅលើកទំនប់ ១ មករា ទេ គឺតែងនៅចាំឈ្លបយកការណ៍ពីប្រជាជនថ្មីនៅក្នុងភូមិ ជាពិសេស គឺប្រជាជនថ្មី ១៧ មេសា។ ប៉ុន្តែ លោក យៀន លន់ ជម្រាបអង្គជំនុំជម្រះសាលាដំបូងថា លោកក៏ត្រូវអង្គការឱ្យទៅធ្វើការដ៏លំបាក នៅការដ្ឋានលើកទំនប់ ១ មករា នោះដែរ៖ «ធ្វើការទំនប់ ១ មករានោះ ដោយគ្មានពេលឈប់ឈរទេ គឺធ្វើទាំងយប់ទាំងថ្ងៃទាំងខ្ញុំទាំងគេហ្នឹង។ ពេលធ្វើហ្នឹងវេទនាមែនទែន។ បានថា ក្នុងរបបហ្នឹងប្រជាពលរដ្ឋ ដែលនៅធ្វើទំនប់ ១ មករា ហ្នឹង ដោយវេទនា ហើយរងកម្មខ្លាំង»។
ថ្វីបើអង្គជំនុំជម្រះសាលាដំបូងត្រូវធ្វើសវនាការស្ដាប់សាក្សីលើអង្គហេតុស្ដីពីការងារដោយបង្ខំនៅការដ្ឋានលើកទំនប់ ១ មករា ក្ដី ក៏ការភាគីនានា ផ្ដោតការសួរដេញដោលសាក្សីច្រើន ទាក់ទងនឹងការចោទប្រកាន់អំពីការសម្លាប់មនុស្សនៅភូមិកងសៅនោះ។
ពាក់ព័ន្ធនឹងការបង្ខំឱ្យធ្វើការងារនៅទំនប់ ១ មករា លោក យៀន លន់ បញ្ជាក់ថា លោកបានដឹកនាំធ្វើការខ្លាំងមែន ប៉ុន្តែលោកថា បើសិនជាទុកឱ្យប្រជាជនទាំងនៅដេកដួល ខ្លាចថ្នាក់លើចោទថា ខ្ជិលច្រអូស និងយកទៅសម្លាប់។
ទោះជាយ៉ាងណាក្ដី ការចោទប្រកាន់អំពីការសម្លាប់មនុស្ស លោក យៀន លន់ ត្រូវអាជ្ញាធរខេត្តកំពង់ធំ ដាក់ពន្ធនាគាររយៈពេល ១០ឆ្នាំ គឺបន្ទាប់ពីរបបខ្មែរក្រហមដួលរលំ នៅឆ្នាំ១៩៧៩។ នៅពេលនេះ លោកក៏ត្រូវសាលាក្ដីខ្មែរក្រហមកោះហៅឱ្យមកធ្វើជាសាក្សីទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។