អង្គជំនុំជម្រះសាលាដំបូងនៃសាលាក្ដីខ្មែរក្រហម នៅពេលនេះ កំពុងបន្តធ្វើសវនាការលើអង្គហេតុថ្មីមួយទៀត ស្ដីពីការដ្ឋានការងារ ទំនប់ ១ មករា ខេត្តកំពង់ធំ។ អង្គហេតុនេះ គឺបន្ទាប់ពីបានបញ្ចប់អង្គហេតុមន្ទីរសន្តិសុខក្រាំងតាចាន់ និងសហករណ៍ត្រាំកក់ នៅខេត្តតាកែវ។ អង្គជំនុំជម្រះសាលាដំបូង បានស្ដាប់សក្ខីកម្មរបស់សាក្សីមួយរូប អតីតជាអ្នកបច្ចេកទេសនៅការដ្ឋានទំនប់ ១ មករា ខេត្តកំពង់ធំនោះ។
សាក្សីឈ្មោះ ប៉ិច សុខា ដែលជាអតីតអ្នកបច្ចេកទេសវាស់ស្ទង់មួយរូបនៅការដ្ឋានទំនប់ ១ មករា ក្នុងខេត្តកំពង់ធំ ត្រូវបានសាលាដំបូងនៃសាលាក្ដីខ្មែរក្រហម ធ្វើសវនាការស្ដាប់សក្ខីកម្មនៅថ្ងៃទី២១ ខែឧសភា។ សក្ខីកម្មនេះ គឺធ្វើតាមរយៈការបញ្ជូនរូបភាព និងសំឡេងពីស្រុកអន្លង់វែង ខេត្តឧត្ដរមានជ័យ។
សាក្សី ប៉ិច សុខា ជម្រាបអង្គជំនុំជម្រះថា លោកនៅក្នុងក្រុម ៤នាក់ ធ្វើការនៅការដ្ឋាននោះបានរយៈពេលមួយឆ្នាំ ដោយមិនមានជម្រើសប្រកែកបាន។ លោកថា ការងារវាស់ស្ទង់សម្រាប់ការដ្ឋានសង់ទំនប់នោះ គឺតាមប្លង់របស់អង្គការថ្នាក់លើ៖ «ប្លង់នេះមិនមែនពួកខ្ញុំជាអ្នកផលិតទេ។ ថ្នាក់លើ តែមិនដឹងជាអ្នកណាដែរ តែខ្ញុំទទួលបានពីមេក្រុមខ្ញុំ គាត់យកមកបង្ហាញ ហើយពិភាក្សាគ្នាធ្វើតាមប្លង់ហ្នឹង។ ប៉ុន្តែដឹងថា ប្លង់ហ្នឹងមកពីអង្គការថ្នាក់លើ ប៉ុន្តែមិនដឹងអ្នកណាផលិត ខ្ញុំក៏មិនដឹងដែរ»។
ការដ្ឋានធ្វើទំនប់ ១ មករា នៅខេត្តកំពង់ធំ គឺជាការដ្ឋានមួយ ដែលល្បីរន្ទឺថា មានមនុស្សជាច្រើនបានស្លាប់ដោយសារតែការបង្ខំឱ្យសម្រុកធ្វើការធ្ងន់បាក់កម្លាំង និងខ្លះទៀត ត្រូវគេយកទៅសម្លាប់ដោយសារតែត្រូវចោទប្រកាន់ថាជាខ្មាំង។
លោក ប៉ិច សុខា ជម្រាបអង្គជំនុំជម្រះថា ការងារនៅការដ្ឋានទំនប់ ១ មករា នោះពិតជាលំបាកមែន៖ «យើងមើលទៅហាក់ដូចជាសប្បាយគ្រឹកគ្រាក់ (មាន) មេក្រូ។ ប៉ុន្តែការលំបាកវាលំបាក។ ហូបចុកមិនគ្របគ្រាន់ ទាក់ទងនឹងបញ្ហាសុខាភាព ការងារពលកម្មធ្ងន់ ហ្នឹងហើយគួរឱ្យរន្ធត់»។
ទាក់ទងនឹងអង្គហេតុធ្វើការងារដោយបង្ខំបាក់កម្លាំង អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងធ្វើសវនាការផ្ដោតលើការដ្ឋានការងារចំនួន ៣ តាមលំដាប់លំដោយ គឺទី១ ការដ្ឋានទំនប់ ១ មករា ខេត្តកំពង់ធំ ទី២ ការដ្ឋានសាងសង់វាលយន្តហោះ ខេត្តកំពង់ឆ្នាំង និងទី៣ គឺការដ្ឋានធ្វើទំនប់អាងត្រពាំងថ្ម ក្នុងខេត្តបន្ទាយមានជ័យ។
មន្ត្រីនាំពាក្យនៃអង្គជំនុំជម្រះវិសាមញ្ញក្នុងតុលាការកម្ពុជា លោក នេត្រ ភក្ត្រា ឱ្យដឹងថា អង្គជំនុំជម្រះនឹងរៀបចំស្ដាប់ការផ្ដល់សក្ខីកម្មពីដើមបណ្ដឹងរដ្ឋប្បវេណី និងសាក្សីចំនួន ១០រូប សម្រាប់អង្គហេតុទាក់ទងនឹងការដ្ឋានការងារទំនប់ ១ មករា នៅក្នុងខេត្តកំពង់ធំ។ លោក ប៉ិច សុខា ជាសាក្សីទី ២ ហើយ ដែលត្រូវបានសាលាដំបូងកោះហៅឱ្យផ្ដល់សក្ខីកម្ម បន្ទាប់ពីសាក្សីទី ១ គឺលោក ឱ ហូ អតីតជាកម្មាភិបាលខ្មែរក្រហម ដែលបានធ្វើការនៅតំបន់នោះដែរ។
សវនាការលើអង្គហេតុការដ្ឋានការងារនេះ អង្គជំនុំជម្រះសាលាដំបូងនឹងបន្តនៅថ្ងៃច័ន្ទ ទី២៥ ឧសភា សប្ដាហ៍ក្រោយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។