អង្គជំនុំជម្រះសាលាដំបូងនៃសាលាក្ដីខ្មែរក្រហម គ្រោងស្ដាប់សក្ខីកម្មរបស់សាក្សីទាក់ទងនឹងការប្រព្រឹត្តចំពោះជនជាតិចាម ក្នុងរបបកម្ពុជាប្រជាធិបតេយ្យ។ សក្ខីកម្មនេះ នឹងជាអង្គហេតុថ្មីនៅក្នុងសំណុំរឿង ០០២ វគ្គ ២ ប្រឆាំងជនជាប់ចោទ នួន ជា និង ខៀវ សំផន។
ជំនុំជម្រះសាលាដំបូងនៃសាលាក្ដីខ្មែរក្រហម ចេញសេចក្ដីប្រកាសឱ្យដឹងថា ចាប់ពីថ្ងៃច័ន្ទ ទី៧ កញ្ញា ទៅ អង្គជំនុំជម្រះសាលាដំបូង នឹងបើកសវនាការដេញដោលសាក្សី និងភស្តុតាង ដែលផ្ដោតលើការចោទប្រកាន់ទាក់ទងនឹងការប្រព្រឹត្តទៅលើក្រុមជនជាតិចាម។
ប្រធានអង្គជំនុំជម្រះសាលាដំបូង លោកចៅក្រម និល ណុន បានបញ្ជាក់មុនពេលប្រកាសបិទសវនាការនៅថ្ងៃទី៣ ខែកញ្ញា ថា កាលវិភាគស្ដាប់អង្គហេតុថ្មីនេះ នឹងធ្វើឡើងបន្ទាប់ពីការឆ្លើយតបរបស់មេធាវីការពារក្ដីជនជាប់ចោទ ខៀវ សំផន៖ «នឹងផ្ដើមស្ដាប់សក្ខីកម្មសាក្សីដែលមានរហស្សនាម 2TCW 813 ពាក់ព័ន្ធនឹងអង្គហេតុចោទប្រកាន់លើក្រុមមនុស្សជាក់លាក់ចំពោះជនជាតិចាម។ សូមភាគីជ្រាប និងចូលរួមតាមពេលកំណត់នេះ»។
សេចក្ដីប្រកាសព័ត៌មានរបស់សាលាក្ដីខ្មែរក្រហមនៅថ្ងៃទី៤ កញ្ញា សរសេរថា ការស្ដាប់សាក្សី និងភស្តុតាងស្ដីពីការប្រព្រឹត្តទៅលើក្រុមជនជាតិចាមនេះ គឺជាចាប់ផ្ដើមសវនាការលើកទី១ ទាក់ទងនឹងការចោទប្រកាន់ពីបទឧក្រិដ្ឋកម្មប្រល័យពូជសាសន៍ប្រឆាំងជនជាប់ចោទ ខៀវ សំផន និង នួន ជា នៅក្នុងសំណុំរឿង ០០២/០២។
សេចក្ដីប្រកាសព័ត៌មានបន្តថា ការជំនុំជម្រះលើអង្គហេតុថ្មីនេះ អង្គជំនុំជម្រះសាលាដំបូង នឹងកោះហៅសាក្សី និងដើមបណ្ដឹងរដ្ឋប្បវេណីចំនួន ១៤រូប និងអ្នកជំនាញ ១រូប ឱ្យមកផ្ដល់សក្ខីកម្មនៅចំពោះមុខអង្គជំនុំជម្រះ។
យោងតាមដីកាដំណោះស្រាយនៅសាលាក្ដីខ្មែរក្រហមរកឃើញថា ជនជាតិចាម ត្រូវបានគេកំណត់ជាមុខសញ្ញា និងសម្លាប់ជាលក្ខណៈប្រព័ន្ធ ហើយបក្សកុម្មុយនិស្តកម្ពុជា បានអនុវត្តគោលនយោបាយបំផ្លិចបំផ្លាញទាំងស្រុង ឬមួយផ្នែកលើក្រុមជនជាតិចាម។ ដីកាដំណោះស្រាយបង្ហាញថា ជនជាតិចាម ត្រូវបានគេកំណត់គោលដៅជាលក្ខណៈប្រព័ន្ធ ហើយត្រូវបានសម្លាប់ដោយសារតែសមាជិកភាពរបស់ពួកគេនៅក្នុងក្រុមជនជាតិចាមនេះ ហើយក៏ត្រូវបានផ្លាស់ទីលំនៅដោយបង្ខំ និងបានបញ្ចូលទៅក្នុងភូមិរបស់ប្រជាជនខ្មែរ ព្រមទាំងបានហាមឃាត់មិនឱ្យមានការគោរពប្រតិបត្តិសាសនារបស់ពួកគេផងដែរ។ ថ្នាក់ដឹកនាំសាសនាឥស្លាម និងប្រជាជនចាស់ទុំ និងអ្នកដែលនៅតែបន្តអនុវត្តសាសនារបស់ពួកគេ ត្រូវបានគេឃុំខ្លួន ហើយបន្ទាប់មកសម្លាប់ចោល។ វប្បធម៌ ភាសា និងសំលៀកបំពាក់របស់ចាម ត្រូវបានហាមឃាត់។
របាយការណ៍របស់អ្នកស្រាវជ្រាវអំពីជនជាតិចាម នៅក្នុងរបបខ្មែរក្រហម លោក អ៊ីសា ឧស្មាន បង្ហាញថា មានជនជាតិចាម ប្រមាណ ៤សែននាក់នៅក្នុងប្រទេសកម្ពុជា ត្រូវបានគេសម្លាប់នៅក្នុងរបបកម្ពុជាប្រជាធិបតេយ្យ។
ដីកាដំណោះស្រាយរបស់សាលាក្ដីខ្មែរក្រហម បានចោទប្រកាន់ថា នួន ជា និង ខៀវ សំផន ជាអ្នកទទួលខុសត្រូវជាបុគ្គល ចំពោះឧក្រិដ្ឋកម្មដែលបានប្រព្រឹត្តឡើងប្រឆាំងនឹងក្រុមជនជាតិចាមទាំងនោះ តាមរយៈតួនាទីផ្សេងៗ របស់គាត់ក្នុងជួរបក្សកុម្មុយនិស្តកម្ពុជា។
សំណុំរឿង ០០២ វគ្គ ២ ជនជាប់ចោទ នួន ជា និង ខៀវ សំផន ត្រូវបានចោទប្រកាន់ពីបទឧក្រិដ្ឋកម្មមួយចំនួន ដែលបានប្រព្រឹត្តឡើងនៅមន្ទីរសន្តិសុខចំនួន ៤ ការដ្ឋានការងារចំនួន ៣ និងនៅសហករណ៍មួយ ការរៀបការដោយបង្ខំ និងការរំលោភផ្លូវភេទ នៅក្នុងបរិបទនៃការរៀបការដោយបង្ខំនោះ ការបោសសម្អាតផ្ទៃក្នុង ការប្រព្រឹត្តលើពុទ្ធសាសនិកជន ការកំណត់គោលដៅលើអតីតមន្ត្រីរដ្ឋការនៃរបបសាធារណរដ្ឋខ្មែរ ព្រមទាំងឧក្រិដ្ឋកម្មប្រល័យពូជសាសន៍ប្រឆាំងជនជាតិចាម និងជនជាតិវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។