អង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្តីខ្មែរក្រហម នឹងបើកកិច្ចប្រជុំពេញអង្គលើកទី១១ នៅថ្ងៃព្រហស្បតិ៍ ទី១៦ ខែតុលា ខាងមុខ។
មន្ត្រីនាំពាក្យសាលាក្តីខ្មែរក្រហម លោក នេត្រ ភក្ដ្រា មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា ក្នុងកិច្ចប្រជុំពេញអង្គនេះ គណៈកម្មាធិការវិធានផ្ទៃក្នុង នឹងជជែកពិភាក្សាលើអនុសាសន៍មួយចំនួន៖ «គោលបំណងដើម្បីពិនិត្យទៅលើសំណើសុំធ្វើវិសោធនកម្មលើវិធានផ្ទៃក្នុងចំនួន ៤ចំណុច ដែលទាក់ទងជាមួយនឹងវិសាលភាពរបស់សំណុំរឿង និងការចូលរួមរបស់ជនរងគ្រោះជាដើម ដែលស្នើឡើងដោយការិយាល័យសហព្រះរាជអាជ្ញា និងអង្គភាពគាំពារជនរងគ្រោះ ហើយចៅក្រម ព្រះរាជអាជ្ញា ដែលជាសមាជិកនៃគណៈកម្មាធិការវិធានផ្ទៃក្នុងនេះ នឹងពិនិត្យលើសំណើទាំងនោះ»។
លោក នេត្រ ភក្ដ្រា បន្តថា នៅក្នុងកិច្ចប្រជុំពេញអង្គនេះ ចៅក្រម ម៉ាទីន ខារ៉ុបគីន (Martin Karopkin) ជនជាតិអាមេរិកាំង នឹងត្រូវស្បថចូលកាន់តំណែងជាចៅក្រមអន្តរជាតិបម្រុងនៃសាលាក្តីខ្មែរក្រហម និងលោក អូលីវីយ៉េ បូវ៉ាល់ឡេ (Oliviar Beauvallet) ជនជាតិបារាំង នឹងស្បថចូលកាន់តំណែងជាសហចៅក្រមស៊ើបអង្កេតអន្តរជាតិបម្រុងផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។