សេចក្ដីប្រកាសព័ត៌មានរបស់សហព្រះរាជអាជ្ញា ចេញផ្សាយនៅថ្ងៃទី២ ខែមេសា ឆ្នាំ២០១៣ បានធ្វើសេចក្ដីសន្និដ្ឋានថា មរណភាពរបស់ជនជាប់ចោទ អៀង សារី ក្នុងមន្ទីរពេទ្យមិត្តភាពខ្មែរ-សូវៀត កាលពីថ្ងៃទី១៤ ខែមីនា ឆ្នាំ២០១៣ គឺដោយសារមូលហេតុធម្មជាតិ។
មន្ត្រីនាំពាក្យនៃសាលាក្ដីខ្មែរក្រហម លោក នេត្រ ភក្ដ្រា បញ្ជាក់បន្ថែមថា សហព្រះរាជអាជ្ញាបានធ្វើសេចក្ដីសន្និដ្ឋានចុងក្រោយថា មរណភាពរបស់ជនជាប់ចោទ អៀង សារី គឺបណ្ដាលមកពីការស្ទះសរសៃឈាមបេះដូង ដែលមិនអាចធ្វើឱ្យប្រសើរឡើងវិញបាន និងការស្ពៀតសរសៃឈាមចិញ្ចឹមបេះដូង ដែលមានតាំងពីមុនការចាប់ខ្លួន និងឃុំខ្លួននៅសាលាក្ដីខ្មែរក្រហមម្ល៉េះ៖ «ការរកឃើញនេះ ត្រូវបានបញ្ជាក់អះអាងដោយ (១) ….រហូតដល់គាត់ទទួលមរណភាពនៅពេលក្រោយមកនាព្រឹកនោះ»។
នៅក្នុងការស៊ើបអង្កេតនោះ សហព្រះរាជអាជ្ញាពុំបានរកឃើញមានកាលៈទេសៈគួរឱ្យសង្ស័យណាមួយ ដែលទាក់ទងនឹងមរណភាពរបស់ជនជាប់ចោទ អៀង សារី ទេ។
សហព្រះរាជអាជ្ញា បញ្ជាក់ថា ដោយសារមានភស្តុតាងច្បាស់លាស់ និងមានភាពស៊ីសង្វាក់គ្នាចំពោះមូលហេតុនៃមរណភាពនេះ ទើបការវះកាត់សាកសពជនជាប់ចោទ អៀង សារី ដើម្បីពិនិត្យ គឺពុំចាំបាច់ឡើយ ហើយការធ្វើពិសោធន៍រកជាតិពុលក្នុងឈាម ក៏ពុំចាំបាច់ដែរ។ ម្យ៉ាងទៀត ក្រុមគ្រួសារ និងមេធាវីរបស់គាត់ ក៏មិនមានបំណងការវះកាត់នោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។