សាលាក្ដីខ្មែរក្រហម នៅថ្ងៃទី២ ខែឧសភា បន្តធ្វើសវនាការដោយស្ដាប់សក្ខីកម្មរបស់សាក្សីថ្មីមួយរូបទៀត ឈ្មោះ លឹម សាត។ សាក្សី លឹម សាត បច្ចុប្បន្នមានអាយុ ៥៤ឆ្នាំ ជាអតីតយោធិនខ្មែរក្រហម ដែលដឹងអំពីការសម្លាប់អតីតទាហាន និងប៉ូលិសរបប លន់ នល់ នៅទួលពោធិ៍ជ្រៃ ក្នុងខេត្តពោធិ៍សាត់។
អតីតយោធិនខ្មែរក្រហមម្នាក់ក្នុងកងវរសេនាតូចលេខ២០២ នៅតំបន់៧ ក្នុងខេត្តពោធិ៍សាត់ ឈ្មោះ លឹម សាត ដែលមកធ្វើជាសាក្សីក្នុងសាលាក្តីខ្មែរក្រហម ថ្លែងថា នៅខែមេសា ឆ្នាំ១៩៧៥ នៅពេលដែលកងទ័ពខ្មែរក្រហមចូលកាន់អំណាច លោកជាអ្នកទទួលបញ្ជាឱ្យប្រមូលអតីតទាហាន និងប៉ូលិសក្នុងរបប លន់ នល់ ឱ្យទៅប្រជុំនៅសាលាខេត្ត ហើយបន្ទាប់មកគេដឹកយកទៅសម្លាប់នៅទួលពោធិ៍ជ្រៃ ក្នុងខេត្តនោះ៖ «បាទ! ខ្ញុំប្រមូលទៅ ខ្ញុំមិនចាប់អារម្មណ៍ថាគេសម្លាប់ចោលទេ ព្រោះអីខ្ញុំទទួលនាទីនៅយាមចាំឡានតាមផ្លូវ។ ឡានហ្នឹងពួកឡានទាហាន ហ្សេ.អឹម.សេ (GMC) ហើយពួកឡានសំណាញ់ ដឹកបានមនុស្ស ៣០នាក់។ ដឹកទៅទួលពោធិ៍ជ្រៃ តែម្ដង»។
សាក្សី លឹម សាត ដូចគ្នាសាក្សី អ៊ុង ឆាត់ កាលពីដើមសប្ដាហ៍នេះដែរ បានជម្រាបអង្គជំនុំជម្រះថា ពួកអតីតទាហាន ប៉ូលិស របប លន់ នល់ ទាំងនោះត្រូវបានពួកខ្មែរក្រហមបោកបញ្ឆោតថា យកទៅរៀនសូត្រ ហើយដឹកទៅទួលពោធិ៍ជ្រៃ នោះ៖ «បាទ! គេនិយាយប្រាប់ថា ជួបជុំទាហានអីហ្នឹង គេថា ឱ្យរៀនសូត្រ ហើយរៀនសូត្រហើយ ត្រឡប់មកវិញ គេថាអ្នកណាធ្វើការអី ឱ្យធ្វើខាងហ្នឹងវិញ»។
លោកថា មេបញ្ជាការរបស់លោក ប្រាប់លោកអំពីមូលហេតុដែលគេយកអតីតទាហាន និងប៉ូលិសក្នុងរបប លន់ នល់ ទាំងនោះមករៀនសូត្រថា បើទុកឱ្យពួកគេនៅ ពួកគេអាចនឹងរើបម្រះឡើងវិញ៖ «ខ្ញុំដឹងពីបញ្ជាការវរៈខ្ញុំ ប្រាប់ខ្ញុំថា ប្រមូលប៉ូលិសទៅរៀនសូត្រនេះ ដើម្បីថាពួកទាហានប៉ូលិសនៅខ្លាចគេរើបម្រះ។ ថ្នាក់បញ្ជាការវរៈខ្ញុំឈ្មោះ ហួន អនុវរៈឈ្មោះ ម៉ុល»។
លោកបន្តថា បញ្ជាដែលលោកបានទទួលនោះ គឺមេបញ្ជាការរបស់លោកទទួលពីថ្នាក់ដឹកនាំនៅគណៈកម្មាធិការមជ្ឈិមបក្សទៅ។ សាក្សីថ្លែងថា ជនជាប់ចោទ ខៀវ សំផន ជាអ្នកកាន់ទ័ពម្នាក់នៅប្រទេសកម្ពុជា ពេលនោះ។
សាក្សី លឹម សាត រៀបរាប់ទៀតថា វិធីដែលគេយកទាហាននោះទៅ គឺមានប្រធានភូមិភាគឈ្មោះ តា ញឹម និងប្រធានគណៈបញ្ជាការកងទ័ពភូមិភាគឈ្មោះ តា ខ្លែង ដែលបញ្ជាឱ្យដឹកយកទៅម្ដងពីរឡាន ហើយក្នុងមួយឡានៗមានមនុស្សប្រហែល ៣០នាក់។ លោកប៉ាន់ស្មានថា អតីតទាហាន និងប៉ូលិសរបប លន់ នល់ ដែលគេយកទៅសម្លាប់នៅទួលពោធិ៍ជ្រៃ នោះ មានចំនួនប្រហែលជា ២ពាន់នាក់។
ទោះជាដូច្នេះក្ដី សាក្សីថ្លែងថា លោក និងក្រុមរបស់លោកមិនបានចូលរួមសម្លាប់អ្នកទាំងនោះទេ ហើយលោកត្រូវបញ្ជាឱ្យនៅយាមឡានដែលដឹកទៅនោះ។ ទីតាំងដែលលោកទទួលបញ្ជាឱ្យយាមឡានដែលដឹកទៅនោះ គឺមានចម្ងាយប្រមាណ ១០គីឡូម៉ែត្រ ពីទីតាំងសម្លាប់ទួលពោធិ៍ជ្រៃ។ ប៉ុន្តែ លោកដឹងថា កម្លាំងអ្នកសម្លាប់ដែលនៅទួលពោធិ៍ជ្រៃ នោះ អាចមានចំនួន ៥០នាក់។
ការស្ដាប់សក្ខីកម្មរបស់សាក្សី លឹម សាត នៅមិនទាន់បញ្ចប់ទេ គឺអង្គជំនុំជម្រះនឹងបន្តស្ដាប់សាក្សីរូបនេះទៀតនៅថ្ងៃសុក្រ ទី៣ ខែឧសភា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។