[ សាច់ញាតិរៀបចំធ្វើបុណ្យសពលោក អៀង សារីOpens in new window ]
លោក អៀង សារី ស្លាប់ក្នុងអាយុ ៨៨ឆ្នាំ និងក្នុងពេលលោកមានឋានៈជាជនជាប់ចោទរបស់សាលាក្ដីខ្មែរក្រហម។ លោកបានចូលសម្រាកពេទ្យលើកចុងក្រោយកាលពីថ្ងៃទី៤ មីនា កន្លងទៅ ហើយស្នាក់នៅព្យាបាលរហូតដល់ស្លាប់នៅក្នុងមន្ទីរពេទ្យ។
សាកសពលោក អៀង សារី បានដឹកចេញពីមន្ទីរពេទ្យមិត្តភាពខ្មែរ-សូវៀត វេលាម៉ោងជិត ៣រសៀល ទៅធ្វើបុណ្យនៅផ្ទះគាត់នៅស្រុកម៉ាឡៃ ខេត្តបន្ទាយមានជ័យ តាមការចាត់ចែងរបស់សាច់ញាតិគ្រួសារនៃសព ក្រោយពីសហព្រះរាជអាជ្ញានៃសាលាក្ដីខ្មែរក្រហមបានយល់ព្រម។
លោកស្រី ជា លាង សហព្រះរាជអាជ្ញាសាលាក្ដីខ្មែរក្រហម មានប្រសាសន៍នៅក្នុងសន្និសីទកាសែតនៅថ្ងៃទី១៤ មីនា នៅមន្ទីរពេទ្យមិត្តភាពខ្មែរ-សូវៀត ថា តាមព័ត៌មានពីខាងគ្រូពេទ្យព្យាបាល និងការពិនិត្យសាកសពពីមន្ត្រីសាលាក្ដី គឺលោក អៀង សារី ស្លាប់ដោយសារជំងឺ និងចុះខ្សោយកម្លាំងបេះដូង។
លោកស្រី ជា លាង៖ «គ្រូពេទ្យព្យាបាលលោក អៀង សារី បានបញ្ជាក់ថា មូលហេតុនៃមរណភាពរបស់លោក គឺអស់សមត្ថភាពនៃបេះដូង។ ក្នុងរយៈពេល ១ឆ្នាំចុងក្រោយនេះ លោក អៀង សារី បានចូលមកសម្រាកពេទ្យជាច្រើនដង។ លើកចុងក្រោយនៅថ្ងៃ៤ មីនា ឆ្នាំ២០១៣ ដោយសារអាការក្អួតចង្អោរ និងចុះខ្សោយបេះដូង»។
លោកស្រី ជា លាង បានឲ្យដឹងបន្ថែមថា តាមសំណូមពរពីខាងគ្រួសារ និងមេធាវីការពារលោក អៀង សារី គួបផ្សំជាមួយប្រវត្តិមានជំងឺកន្លងមករបស់លោក អៀង សារី នោះ សហព្រះរាជអាជ្ញាសាលាក្ដីខ្មែរក្រហមសម្រេចមិនធ្វើការវះកាត់សាកសព ពិនិត្យមូលហេតុនៃការស្លាប់នេះទេ ហើយ តាមមាត្រា ៧ នៃក្រមនីតិវិធីព្រហ្មទណ្ឌអនុវត្តនៅប្រទេសកម្ពុជា ការស្លាប់របស់លោក អៀង សារី នេះ គឺបញ្ចប់ការចោទប្រកាន់នានាទៅលើរូបលោក ដែលពាក្យច្បាប់ហៅថា ការរំលត់នៃបណ្តឹងអាជ្ញា។
លោកស្រី ជា លាង៖ «អនុលោមតាមវិធាន ៣២ស្ទួន នៃវិធានផ្ទៃក្នុងនៃ អ.វ.ត.ក ការិយាល័យសហព្រះរាជអាជ្ញាមានភារកិច្ចកំណត់មូលហេតុនៃមរណភាពនៃជនជាប់ចោទដែលកំពុងជាប់ឃុំឃាំង។ ក្រោយពេលលោក អៀង សារី ទទួលមរណភាពនៅព្រឹកមិញនេះ មន្ត្រីបុគ្គលិកនៃការិយាល័យសហព្រះរាជអាជ្ញា បានចូលរួមដើម្បីកំណត់អំពីមូលហេតុនៃមរណភាព។ ការិយាល័យសហព្រះរាជអាជ្ញាសង្ឃឹមថា នឹងចេញផ្សាយសេចក្ដីសន្និដ្ឋានមួយនៅក្នុងរយៈពេលប៉ុន្មានថ្ងៃខាងមុខនេះ»។
មន្ត្រីសាលាក្ដីខ្មែរក្រហមបានឲ្យដឹងថា ទោះបីជាលោក អៀង សារី ស្លាប់ហើយក៏ដោយ តែសំណុំរឿង ០០២ នៃសាលាក្ដីខ្មែរក្រហមនៅតែបន្តដំណើរការជាធម្មតា ជាមួយជនជាប់ចោទដែលនៅរស់។ ជនជាប់ចោទដែលនៅរស់ក្នុងសំណុំរឿង ០០២ មានលោក ខៀវ សំផន អតីតប្រធានគណៈប្រធានរដ្ឋរបស់របបខ្មែរក្រហម លោក នួន ជា អតីតប្រធានរដ្ឋសភានៃរបបខ្មែរក្រហម។
កាលពីនៅរស់ លោក អៀង សារី ជាជនជាប់ចោទរបស់សាលាក្ដីខ្មែរក្រហម ហើយត្រូវឃុំខ្លួនក្នុងសាលាក្ដីខ្មែរក្រហម។ សហព្រះរាជអាជ្ញាសាលាក្ដីខ្មែរក្រហមបានចោទលោក អៀង សារី ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងការរំលោភបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ ឆ្នាំ១៩៤៩។
លោក អាង ឧត្តម សហមេធាវីការពារក្តីលោក អៀង សារី បានឲ្យដឹងថា ព័ត៌មានពីប្រភពគ្រួសារលោក អៀង សារី បាននិយាយថា ការស្លាប់របស់លោក អៀង សារី នេះ ក្រុមគ្រួសារសាច់ញាតិនៅលាក់សិន មិនទាន់ឲ្យលោកស្រី អៀង ធីរិទ្ធ ជាភរិយាដឹងនៅឡើយទេ ដោយសារលោកស្រីមានជំងឺខាងស្មារតី។
ចំពោះការស្លាប់របស់លោក អៀង សារី ដោយមិនទាន់មានសាលក្រមផ្ដន្ទាទោសពីសំណាក់សាលាក្ដីខ្មែរក្រហមនេះ មានមនុស្សជាច្រើននាក់ដែលធ្លាប់រងគ្រោះនៅក្នុងរបបខ្មែរក្រហមគ្រប់គ្រងកាលពីឆ្នាំ១៩៧៥ ដល់ ១៩៧៩ បណ្ដាលឲ្យមនុស្សជិត ២លាននាក់ស្លាប់នោះ មានការសោកស្ដាយ ដោយសារពួកគេមិនទាន់ដឹងថា តើកំហុសលោក អៀង សារី នោះ ត្រូវមានទោសរបៀបណា?
ជនរងគ្រោះមួយរូបក្នុងរបបខ្មែរក្រហម ហើយជាអ្នកធ្លាប់ជាប់ឃុំក្នុងគុកទួលស្លែង គឺលោក ជុំ ម៉ី មានយោបល់ថា ការកាត់ក្តីរបស់សាលាក្ដីខ្មែរក្រហមនេះយឺតពេក បានជាធ្វើឲ្យជនជាប់ចោទស្លាប់ដោយមិនទាន់មានសាលក្រមផ្ដន្ទាទោស។
លោក ជុំ ម៉ី៖ «ការស្លាប់របស់លោក អៀង សារី ដូចជាការបរាជ័យរបស់សាលាក្ដី អ.វ.ត.ក អ៊ីចឹង។ បានជាខ្ញុំថាអ៊ីចឹង មកពីការកាត់ទោសនោះវាយូរពេក ហួសការស្មាន ការសន្និដ្ឋានរបស់ខ្ញុំ មិនដឹងថា នីតិវិធីវាអូសបន្លាយពេលច្រើនឆ្នាំអ៊ីចឹងទេ។ ឯកសារមានគ្រប់គ្រាន់ទាំងអស់ ឯកសាររស់មានគ្រប់គ្រាន់ទាំងអស់ ហេតុអ្វីធ្វើមិនកើត? យើងត្រូវរកពីមូលហេតុ តើមូលហេតុខ្វះអី»?
លោក អៀង សារី ជាអតីតមេដឹកនាំជាន់ខ្ពស់នៃរបបខ្មែរក្រហម។ លោកធ្លាប់ត្រូវតុលាការរបស់របបសាធារណរដ្ឋប្រជាមានិតកម្ពុជា កាត់ទោសប្រហារជីវិតកាលពីខែសីហា ឆ្នាំ១៩៧៩។ ប៉ុន្តែក្រោយមក នៅឆ្នាំ១៩៩៦ លោកបានទទួលការលើកលែងទោសពីព្រះមហាក្សត្រ ដោយសារលោកបានដឹកនាំកងទ័ពអតីតទាហានខ្មែរក្រហមជាច្រើនពាន់នាក់ ចុះចូលជាមួយរដ្ឋាភិបាល។ ក្រោយពេលតុលាការកូនកាត់ខ្មែរ និងអង្គការសហប្រជាជាតិបង្កើតឡើងដែលគេហៅថា សាលាក្ដីខ្មែរក្រហម ដើម្បីកាត់ទោសអ្នកទទួលខុសត្រូវខ្ពស់បំផុតក្នុងរបបខ្មែរក្រហម នៅក្នុងខែវិច្ឆិកា ឆ្នាំ២០០៧ លោក អៀង សារី បានត្រូវចាប់ ហើយឃុំខ្លួនតាំងពីពេលនោះមករហូតដល់ស្លាប់ក្នុងមន្ទីរពេទ្យ៕
សូមស្ដាប់ជីវប្រវត្តិសង្ខេបរបស់លោក អៀង សារី ដែលរាយការណ៍ជូនដោយលោក ជី វិតា៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។