អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២០ ខែមេសា បានបន្តការស្ដាប់សក្ខីកម្មលោក ញ៉ែម អេន អតីតអ្នកថតរូបនៅមន្ទីរសន្តិសុខ ស-២១ ឬគុកទួលស្លែង។ លោក ញ៉ែម អេន ជម្រាបអង្គជំនុំជម្រះថា ការដាក់ឈ្មោះ និងលេខរៀងអ្នកទោសពេលថតរូប គឺដើម្បីងាយមើលប្រវត្តិរូប។
សាក្សី ញ៉ែម អេន បញ្ជាក់នៅថ្ងៃទី២០ មេសា ថា ការងារថតរូបអ្នកទោសដែលមានដាក់ឈ្មោះ និងលេខរៀងដែលបន្សល់មកដល់សព្វថ្ងៃនេះ គឺជាការសម្រេចរបស់ប្រធានគុកទួលស្លែង កាំង ហ្កេកអ៊ាវ ហៅ ឌុច និងរដ្ឋមន្ត្រីការពារប្រទេស គឺលោក សុន សេន។
ទោះជាដូច្នេះក្ដី លោកថ្លែងថា មានកុមារជាច្រើននាក់ គេមិនបានថតរូបទុកទេ លើកលែងតែកុមារជាកូនរបស់អ្នកទោសជាកម្មាភិបាល ឬអ្នកមានឋានៈខ្ពស់ ដែលត្រូវគេចាប់បញ្ជូនមកគុកទួលស្លែង៖ «កូនក្មេងដែលខ្ញុំបានឃើញដឹកមកទាំងឡានៗ ដែលដឹកឪពុកម្ដាយមកហើយ គែចាប់កូន។ និយាយរួមទៅ ទាំងមួយពូជៗ ក៏មាន ប្រហែលមិនក្រោមមួយពាន់នាក់ជាង ឬពីរពាន់នាក់។ កាលសម័យនោះ ឱ្យតែចាប់ម្ដាយឪពុកហើយ គឺក្មេងអត់រួចទេ។ ទាំងពូជៗ ប៉ុន្តែអត់បានថតរូបទេ»។
លោកឱ្យដឹងថា ក្រៅពីការងារថតរូបអ្នកទោសនៅក្នុងគុកទួលស្លែង និងព្រៃស លោកក៏ត្រូវទទួលបញ្ជាទៅថតកុនអំពីសកម្មភាពលើកទំនប់ជីកប្រឡាយរបស់កម្មករ នៅតាមភូមិភាគដែរ។ សក្ខីកម្មរបស់លោក ញ៉ែម អេន នៅថ្ងៃទី២០ មេសា គឺជាសក្ខីកម្មប្រឆាំងជនជាប់ចោទ នួន ជា និង ខៀវ សំផន នៅក្នុងសំណុំរឿង ០០២ វគ្គ ២។
ទន្ទឹមគ្នានេះ សាលាក្ដីខ្មែរក្រហមក៏បានចេញសេចក្ដីថ្លែងការណ៍ទាក់ទងនឹងសំណុំរឿង ០០៤ គឺមេធាវីអន្តរជាតិមួយរូប ឈ្មោះ ចន ចូនស៍ (John R.W.D. Jones) បានទទួលមរណភាព។
លោក ចន ចូនស៍ ជាជនជាតិអង់គ្លេស ត្រូវបានអង្គភាពគាំពារការពារក្ដី នៃសាលាក្ដីខ្មែរក្រហម ចាត់តាំងជាសហមេធាវីអន្តរជាតិ ដើម្បីតំណាងជនសង្ស័យ អ៊ឹម ចែម ក្នុងសំណុំរឿង ០០៤ កាលពីថ្ងៃទី១ ខែមេសា ឆ្នាំ២០១៤។ លោកមានបទពិសោធន៍ការពាររឿងក្ដីនៅសាលាក្ដីសំខាន់ៗ ព្រមទាំងធ្វើជាគ្រូឧទ្ទេសនាម និងបោះពុម្ពស្នាដៃនិពន្ធជាច្រើន។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា ថ្លែងថា តាមនីតិវិធីនៅសាលាក្ដីខ្មែរក្រហម ជនសង្ស័យ អ៊ឹម ចែម ត្រូវមានសិទ្ធិទទួលបានមេធាវីពីររូប ដើម្បីការពារក្ដីរបស់ខ្លួន។ ដូច្នេះ អង្គភាពគាំពារការការពារក្ដីស្នើសុំចាត់តាំងមេធាវីអន្តរជាតិមួយរូបថ្មីទៀត បន្ទាប់ពីការរៀបចំពិធីកាន់ទុក្ខ៖ «ប៉ុន្តែត្រង់ថា ឥឡូវនេះនីតិវិធីយើងមិនទាន់ដឹងថា វិវឌ្ឍយ៉ាងម៉េចទេ គឺអង្គភាពគាំពារការការពារក្ដី គាត់នឹងធ្វើការងារជាមួយជនសង្ស័យ អ៊ឹម ចែម ក៏ដូចជាក្រុមការងារការពារក្ដីឱ្យជនសង្ស័យរូបហ្នឹង ដើម្បីស្នើសុំជ្រើសរើសជាផ្លូវការ មេធាវីអន្តរជាតិមួយជំនួសអ្នកស្លាប់បាត់បង់ជីវិតហ្នឹង»។
ករណីជនសង្ស័យ អ៊ឹម ចែម នៅក្នុងសំណុំរឿង ០០៤ ត្រូវបានការិយាល័យសហចៅក្រមស៊ើបអង្កេត បិទបញ្ចប់កិច្ចស៊ើបសួរ កាលពីថ្ងៃទី១៨ ខែធ្នូ ឆ្នាំ២០១៥។ ជនសង្ស័យ អ៊ឹម ចែម ត្រូវបានដាក់ឱ្យស្ថិតនៅក្រោមការត្រួតពិនិត្យ ទាក់ទងនឹងបទចោទរំលោភច្បាប់ព្រហ្មទណ្ឌកម្ពុជា ឆ្នាំ១៩៥៦ ឧក្រិដ្ឋកម្មប្រឆាំងមនុស្សជាតិ ការរំលោភបំពានអនុសញ្ញាក្រុងហ្សឺណែវ ឆ្នាំ១៩៤៩ ហើយបទឧក្រិដ្ឋទាំងនោះ ត្រូវបានប្រព្រឹត្តនៅមន្ទីរសន្តិសុខភ្នំទ្រយោង និងការដ្ឋានស្ពានស្រែង ខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។