ឌុច នឹងផ្ដល់សក្ខីកម្មនៅសាលាក្ដីខ្មែរក្រហមក្នុងសំណុំរឿង០០២វគ្គ២
2016.05.18
អតីតប្រធានមន្ទីរសន្តិសុខ ស-២១ ឬគុកទួលស្លែង ក្នុងរបបខ្មែរក្រហម លោក កាំង ហ្កេកអ៊ាវ ហៅ ឌុច នឹងឡើងធ្វើជាសាក្សីផ្ដល់សក្ខីកម្មក្នុងការជំនុំជម្រះក្តីលើសំណុំរឿង ០០២ វគ្គ ២ ចាប់ពីថ្ងៃទី២៦ ខែឧសភា តទៅ។
សេចក្ដីប្រកាសព័ត៌មានរបស់សាលាក្ដីខ្មែរក្រហមផ្សព្វផ្សាយនៅថ្ងៃទី១៨ ខែឧសភា ឲ្យដឹងថា លោក កាំង ហ្កេកអ៊ាវ ត្រូវបានតុលាការកោះហៅមកផ្ដល់សក្ខីកម្មក្នុងប្រធានបទទី៤ នៃសំណុំរឿង ០០២ វគ្គ ២ ពាក់ព័ន្ធមន្ទីរសន្តិសុខ និងការបោសសំអាតផ្ទៃក្នុង ជាពិសេសគឺពាក់ព័ន្ធនឹងមន្ទីរសន្តិសុខ ស-២១។ អង្គជំនុំជម្រះសាលាដំបូងត្រៀមរយៈពេល ៩ថ្ងៃ ដើម្បីសាកសួរសាក្សីរូបនេះ។
នេះជាលើកទី២ ហើយ ដែលលោក កាំង ហ្កេកអ៊ាវ បង្ហាញខ្លួនក្នុងនាមជាសាក្សីក្នុងសំណុំរឿង ០០២ ប្រឆាំងនឹងលោក នួន ជា និង ខៀវ សំផន។ គាត់បានបង្ហាញខ្លួនក្នុងនាមជាសាក្សីក្នុងសំណុំរឿង ០០២ វគ្គ ១ កាលពីខែមីនា និងខែមេសា ឆ្នាំ២០១២។
លោក កាំង ហ្កេកអ៊ាវ ត្រូវបានសាលាក្ដីខ្មែរក្រហមរកឃើញថា គឺជាអតីតអ្នកទទួលខុសត្រូវខ្ពស់បំផុតមួយរូបចំពោះឧក្រិដ្ឋកម្មក្នុងរបបកម្ពុជាប្រជាធិបតេយ្យ ហើយកាត់ទោសឲ្យជាប់ពន្ធនាគារអស់មួយជីវិតក្នុងសំណុំរឿង ០០១ ពីបទឧក្រិដ្ឋកម្ម ប្រឆាំងមនុស្សជាតិ និងការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវ ឆ្នាំ១៩៤៩៕