សាស្ត្រាចារ្យប្រវត្តិសាស្ត្រ លោក ហ៊ិនរ៉ី ឡូខាត (Henry Locard) ត្រូវបានសារព័ត៌មានខេមបូឌា ដេលី (Cambodia Daily) ដកស្រង់សម្ដីកាលពីថ្ងៃអង្គារ ទី២ មេសា ថា លោក អៀង សារី ត្រូវបានរដ្ឋាភិបាលចិន ផ្តល់លិខិតឆ្លងដែនក្រោយពេលរបបខ្មែរក្រហមត្រូវបានកងទ័ពវៀតណាម ផ្ដួលរំលំ កាលពីឆ្នាំ១៩៧៩។ លិខិតឆ្លងដែនលោក អៀង សារី ចេញកាលពីថ្ងៃទី២៧ មករា ឆ្នាំ១៩៧៩ ដោយក្រសួងការបរទេសចិន។ ក្នុងលិខិតឆ្លងដែននោះ លោក អៀង សារី ត្រូវបានគេដាក់ឈ្មោះថ្មីថា ស៊ូ ហាវ (Su Hao) មានទីកន្លែងកំណើតនៅទីក្រុងប៉េកាំង និងកើតនៅថ្ងៃទី១ មករា ឆ្នាំ១៩៣០។
លោក ហ៊ិនរ៉ី ឡូខាត បន្តថា រដ្ឋាភិបាលចិន កាលនោះគាំទ្រខ្មែរក្រហម ដើម្បីបង្ខំបណ្ដេញកងទ័ពវៀតណាម ចេញពីកម្ពុជា។ លោក អៀង សារី បានប្រើប្រាស់លិខិតឆ្លងដែនចិន ធ្វើដំណើរជាញឹកញាប់ ក្នុងនោះរួមមានប្រទេសនៅតំបន់អាស៊ី ទីស្នាក់ការអង្គការសហប្រជាជាតិ នៅសហរដ្ឋអាមេរិក និងប្រទេសថៃ ជាដើម។
បន្ទាប់ពីលោក អៀង សារី បានចុះចូលនឹងរដ្ឋាភិបាលកម្ពុជា កាលពីឆ្នាំ១៩៩៦ រហូតដល់ឆ្នាំ២០០១ លោកប្រើប្រាស់លិខិតឆ្លងដែនការទូតកម្ពុជា ចេញដោយក្រសួងការបរទេសកម្ពុជា។
មន្ត្រីនាំពាក្យក្រសួងការបរទេសកម្ពុជា បានឲ្យដឹងថា លោកមិនដឹងអំពីមូលហេតុអ្វីបានជាលោក អៀង សារី មានលិខិតឆ្លងដែនការទូត ពីព្រោះលិខិតឆ្លងដែនការទូតទុកសម្រាប់មន្ត្រីរដ្ឋាភិបាល មិនមែនសម្រាប់ជនជាប់សង្ស័យពីបទឧក្រិដ្ឋកម្មសង្គ្រាមឡើយ។
លោក អៀង សារី ត្រូវបានចាប់ខ្លួនដោយសាលាក្តីខ្មែរក្រហម នៅឆ្នាំក្នុងខែវិច្ឆិកា ឆ្នាំ២០០៧ ជាប់ចោទពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ ដែលកើតឡើងក្នុងរបបខ្មែរក្រហម។
ក្រោយពីមរណភាព លោក អៀង សារី ក៏មានព័ត៌មានស្ដីពីទ្រព្យសម្បត្តិលោកនៅបរទេស ត្រូវបានផ្សព្វផ្សាយជាសាធារណៈ។ សារព័ត៌មានបរទេសកាលពីសប្ដាហ៍មុនផ្សាយថា លោក អៀង សារី ធ្លាប់មានលុយរក្សាទុកក្នុងធនាគារហុងកុង ប្រមាណ ២០លានដុល្លារ ដែលមួយចំណែកត្រូវផ្តល់ដោយរដ្ឋាភិបាលចិន សម្រាប់ខ្មែរក្រហមប្រើប្រាស់ និងមួយចំណែកបានមកពីការលក់ត្បូង និងព្រៃឈើនៅតាមជួរព្រំដែនកម្ពុជា និងថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។