ទាំងនៅឆ្នាំមុន និងថ្ងៃទី២៣ ខែឧសភា លោក ចៅ នី តែងតែទទូចឱ្យជនជាប់ចោទ ខៀវ សំផន ប្រាប់លោកអំពីជោគវាសនារបស់ឪពុកមាលោក ឈ្មោះ ចៅ សៅ ដែលអតីតជាប្រធានធនាគារឥណទានជាតិ។ លោក ចៅ នី ជម្រាបអង្គជំនុំជម្រះ លោកមានព័ត៌មានថា ជនជាប់ចោទ ខៀវ សំផន ផ្ញើសំបុត្រទៅលោក ចៅ សៅ ឱ្យត្រឡប់ចូលភ្នំពេញវិញ នៅឆ្នាំ១៩៧៥។
ឆ្លើយតបបញ្ហានេះ ជនជាប់ចោទ ខៀវ សំផន ថ្លែងថា គាត់សោកស្ដាយដែលគាត់មិនមានដំណឹងអំពីលោក ចៅ សៅ ព្រោះគាត់ទាំងពីរបែកគ្នាតាំងពីឆ្នាំ១៩៦៧៖ «ខ្ញុំមិនមានមធ្យោបាយអី ផ្ញើសំបុត្រទៅអ៊ំរបស់លោកទាល់តែសោះ។ ខ្ញុំមិនដែលមានគំនិតអីនឹកភ្នកទៅរកអ៊ំរបស់លោក អញ្ជើញអ៊ំរបស់លោកឱ្យមកភ្នំពេញវិញក៏អត់សោះ។ អត់ទាល់តែសោះ។ នេះដោយសារតែមនោសញ្ចេតនារបស់ខ្ញុំគោរព និងយល់ច្បាស់នូវទុក្ខសោកសង្រេងរបស់លោក និងគ្រួសាររបស់លោក នឹករលឹកដល់របស់លោកនេះហើយ ដែលខ្ញុំត្រូវការជួបលោកដោយផ្ទាល់ ដើម្បីជម្រាបលោកដោយផ្ទាល់មាត់ ឱ្យអស់ពីថ្លើមពីចិត្តរបស់ខ្ញុំ ដើម្បីយើងទាំងពីរនាក់ជ្រះស្រឡះជាមួយគ្នា។ ខ្ញុំស្ដាយណាស់ ដោយខ្ញុំគ្មានមធ្យោបាយរួមចំណែកបំពេញសំណូមពររបស់លោក។ ខ្ញុំសង្ឃឹមថា លោកយល់ និងអធ្យាស្រ័យដល់ខ្ញុំ»។
ទោះជាដូច្នេះក្ដី លោក ចៅ នី នៅតែមិនអស់ចិត្ត ព្រោះលោក ចៅ សៅ និង ខៀវ សំផន ស្គាល់គ្នាជិតស្និទ្ធណាស់។
សាលាដំបូងនឹងធ្វើសវនាការបន្ត នៅថ្ងៃច័ន្ទ ទី២៧ ខែឧសភា ទៀត ដែលប្រធានអង្គជំនុំជម្រះ គឺលោកចៅក្រម និល ណុន ប្រកាសថា សាលាដំបូងគ្រោងស្ដាប់ដើមបណ្ដឹងរដ្ឋប្បវេណីមួយចំនួន ដែលនឹងថ្លែងអំពីការខូចខាត និងទុក្ខសោកវេទនារបស់ពួកគាត់ នៅក្នុងរបបកម្ពុជាប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។